पोखरा । देशभर बुधबारदेखि सुरु कोरोना विरुद्धको खोप अभियानअन्तर्गत गण्डकीमा पनि सुरुवात भयो । गण्डकी प्रदेशको राजधानी पोखरास्थित पोखरा स्वास्थ्य विज्ञान प्रतिष्ठानका उपकुलपति प्राडा बुद्धिबहादुर थापालाई ‘कोभिशिल्ड’ लगाएर कोरोनाबिरुद्धको खोपको शुभारम्भ भयो ।

खोप लगाइसकेपछि प्रतिक्रिया दिँदै प्राडा थापाले सामान्य दुखाइबाहेक अन्य समस्या नआएको र खोप सुरक्षित भएकाले नडराउन सबैमा आग्रह गरे । खोपप्रति आश्वास्त बनाउन आफूले खोप लगाएको बताउँदै उनले भने, ‘विश्व स्वस्थ्य संगठनबाट सर्टिफाइड भएको र यो लगाएकाहरु सबै सुरक्षित रहेकाले हामी त्रसित हुनुपर्ने कारण छैन ।’

सो अवसरमा मुख्यमन्त्री पृथ्वीसुब्बा गुरुङले पोखरा स्वास्थ्य विज्ञान प्रतिष्ठान अन्तर्गत पश्चिमाञ्चमाञ्चल क्षेत्रीय अस्पतालका निर्देशक सहप्राध्यापक डा. अर्जुन आचार्यलाई कोभिशिल्ड किट हस्तान्तरण गरेका थिए । त्यस लगत्तै स्वास्थ्यकर्मीले उपकुलपति प्राडा थापालाई कोभिशिल्ड खोप लगाइदिएका हुन् ।

गण्डकी प्रदेश स्वास्थ्य निर्देशनालयका निर्देशक डा. विनोदविन्दु शर्माले प्रदेशका सबै ११ वटै जिल्लामा कोभिशिल्ड खोप लगाउन शुरु भएको जानकारी दिए । कार्यक्रममा मुख्यमन्त्री गुरुङले कोरोना भाइरस (कोभिड–१९) विरुद्धको खोप लगाएर सम्पूर्ण नेपालीलाई सुरक्षित बनाउने प्रधानमन्त्रीको सपना झण्डै १ वर्षपछि पूरा हुन लागेको बताए । सामाजिक विकास मन्त्री नरदेवी पुनले कोरोना खोप लगाएर प्रदेशवासीलाई सुरक्षित बनाइने बताइन् ।

गण्डकी प्रदेशमा पहिलो चरणमा माघ १८ सम्म खोप लगाइने डा. विनोदबिन्दु शर्माले जनाए । प्रदेशमा १७ हजार ३ सय ९६ जनामा कोरोना भाइरसविरुद्धको खोप लगाइने छ । गण्डकी प्रदेशमा ३९ हजार १ सय ३९ मात्रा भ्याक्सिन आइसकेको र प्राप्त भ्याक्सिन सुरक्षित रुपमा भण्डारण गरिएको छ ।

कास्कीमा ५ हजार ६ सय ७१, गोरखा १ हजार ८ सय ८, स्याङ्जामा १ हजार ५ सय ४१, लमजुङमा १ हजार ५ सय ८२, बागलुङमा १ हजार ७ सय ७०, पर्वत १ हजार २ सय ३९, तनहुँमा १ हजार ६ सय ९९, म्याग्दीमा ८ सय ४३, नवलपुरमा १ हजार ५२, मुस्ताङमा २ सय १९ र मनाङमा २ सय ६ जनालाई खोप लगाइनेछ ।

जिल्लागतरुपमा विभिन्न अस्पतालमा व्यवस्था गरिएको छ भने पोखरामा पोखरा स्वास्थ्य विज्ञान प्रतिष्ठान, संक्रामक तथा सरुवा रोग अस्पताल, मणिपाल शिक्षण अस्पताल र गण्डकी मेडिकल कलेजमा खोप लगाउने व्यवस्था गरिएको छ । पहिलो चरणमा सरकारी अस्पताल, गैरसरकारी अस्पताल, निजी अस्पताल र मेडिकल कलेजमा कार्यरत चिकित्सक, नर्सलगायत स्वास्थ्यकर्मी, महिला स्वास्थ्य स्वयंसेविका र अस्पतालको फोहोरमैला व्यवस्थापनमा खटिने कर्मचारीलाई लगाइने छ ।  पहिलो चरणमा खोप लगाएकाहरुलाई २८ दिनपछि दोस्रो खोप लगाइने चिकित्सकले जनाएका छन् ।