काठमाडौं । आगामी ६ जेठमा हुने राष्ट्रियसभाको रिक्त एक सिटका लागि एमालेका दुई नेताबीच भिडन्त हुने भएको छ । केपी शर्मा ओली नेतृत्वको नेकपा एमालेबाट रामबहादुर थापा ‘बादल’ र अर्का नेता माधवकु्मार नेपालको समूहबाट डा. खिमलाल देवकोटा चुनावी मैदानमा उत्रने भएका छन् । बादललाई माओवादीले कारबाही गरेपछि रिक्त सो पदमा ६ जेठमा उपनिर्वाचन हुन लागेको हो । बादल एमाले प्रवेश गरेपछि उनलाई माओवादीले कारबाही गरेको हो । ओलीले तिनै बादललाई अघि सारेका छन् ।
नेपाल समुहले अघि सारेका डा. देवकोटालाई माओवादी, नेपाली कांग्रेस र जसपाको उपेन्द्र यादव पक्षको साथ रहेको छ ।
संघीयताविद् डा. देवकोटाले २०७६ असारमा बागमती प्रदेशको नीति तथा योजना आयोगका उपाध्यक्ष पदबाट राजीनामा दिएका थिए । विकास अर्थशास्त्रमा विद्यावारिधि गरेका देवकोटा वित्तिय संघीयता व्यवस्थापनका विज्ञ मानिन्छन् । अर्थशास्त्रमा एमए, आर्थिक विश्लेषणमा एमएसी र विकास अर्थशास्त्रमा विद्यावारिधि गरेका उनले स्थानीय निकाय वित्तीय आयोगमा लामो समय विज्ञ भई काम गरिसकेका छन् ।