देशमा रजनीतिक अन्योलता कायमै रहेको बेला ‘वेटिङ गभरमेन्ट’का रूपमा रहेको नेपाली कांग्रेस अझै पनि स्पष्ट कार्यदिशा निर्माण गरी अगाडि बढ्न सकिरहेको छैन । त्यसका पछाडि वर्तमान सरकारको विकल्पमा आफ्नो वैकल्पिक सरकार दिन नेपाली कांग्रेसमा विश्वस्तता पैदा हुन नसक्नु नै हो । नेपाली कांग्रेसको पटकपटक पार्टी बैठक, संसदीय दलको बैठक तथा जनवर्गीय संगठनको सुझावका बाबजुद पनि पार्टी नेतृत्वमा आस्वस्थता पैदा हुन नसकेको हो । यसले प्रतिपक्षमा रहेको स्वयं नेपाली कांग्रेस मात्र होइन देशलाई समेत अन्योलतामा राखेको छ । जसका कारण न त सरकारले विश्वासको मत लिन सकेको छ । न त प्रतिपक्ष दलको नेतृत्वमा अविश्वासको प्रस्ताव नै अगाडि बढाउन सकेको छ । प्रम ओली स्वयं विश्वासको मत लिन गम्भीर देखिएका छैनन् भने नेपाली कांग्रेस स्वयं अविश्वासको प्रस्ताव अघि बढाउन सक्ने अवस्थामा छैन । यसले देशलाई न त हाँसको चाल न त बकुल्लाको चालमा पु¥याएको छ ।
त्यसो त सरकार ढाली हाल्नुपर्छ र प्रतिपक्षसहितको बहुमतको सरकार बन्छ भन्ने ग्यारेन्टी पनि छैन र सो प्रकारको पूर्वाग्रहबाट प्रेरित भएर संसदीय कदम चालिहाल्नुपर्छ भन्ने पनि छैन । तर, सामान्य संसदीय मर्यादाअनुरूप सरकारले चालेको कदम विफल भएपछि सरकारले कम्तीमा पनि विश्वासको मत लिनुपर्ने वा सो सरकारप्रति हामीहरूको विश्वास छैन भनी प्रतिपक्षले मत जाहेर गर्नुपर्ने संसदीय मान्यता सर्वोपरि रहँदै आएको छ । यो कुनै सरकार वा दलप्रति लक्षित नभएर संसदीय पद्धति अंगीकरणको द्योतक बन्दै आएको छ । नेपालमा वर्तमान सरकार र प्रतिपक्ष ठीक यही बिन्दुमा आएर केही चुकेका हुन् कि भन्ने आशंका र तर्कवितर्क, विज्ञ तथा विश्लेषकका माझमा चर्को गरी उठिसकेको छ । यसलाई निराकरण गरी सरकारले विश्वासको मत देखाउनुपर्ने वा प्रतिपक्षसहितका दलले सरकारप्रति आफ्नो विश्वास छ वा छैन भनी स्पष्ट रूपमा राजनीतिक हिसाबले देखाउनैपर्छ । यसले मात्र वर्तमान सन्दर्भमा उठेका प्रश्न र प्रतिप्रश्नको निराकरण गर्न मद्दत पुग्छ । यसो नभएमा यसले आशंका त जन्माउँछ नै व्यवस्थाप्रतिको अनास्थामा समेत बढोत्तरी गर्ने अवस्था सिर्जना गर्छ । यसलाई आरेप प्रत्यारोपमार्फत होइन स्पष्ट संसदीय विधि मान्यता र प्रक्रियाअनुरूप आमजनतामा बोझ हुनेगरी राजनीतिक अभिव्यक्ति दिइनुपर्छ ।
सरकार र प्रतिपक्ष यसका लागि राजनीतिक रूपले तयार हुनुपर्छ र यसलाई प्रक्रियामा लैजान कत्ति पनि हिचकिचाउनुहुँदैन । यसो गर्न सकिएमा संसदीय व्यवस्थाप्रतिको जनचासोमा जनताको आस्था बढ्दै जान्छ र प्रक्रियाले देशलाई सापेक्ष स्थायित्वमा पनि लैजान्छ । यो जनादेश दाता, जनादेश प्राप्तकर्ता र सिंगो व्यवस्था सबैका लागि सकारात्मक बन्न पुग्दछ । त्यसैले, जनादेशको सम्मान बाँकी रहेको आवधिक निर्वाचनको कार्यकालमा गरिने कार्य र जनताले अपेक्षा गरेका कुरा राजनीतिक रूपमा विश्वासको अवस्थामा पुग्छन् । यसका लागि प्रतिपक्ष भूमिकामा रहेको नेपाली कांग्रेस सुझबुझका साथ दरो कदम चालेर अघि बढ्नु जरुरी छ । के गरौं, के नगरौंको अन्योलताको स्थिति अबका दिनमा नेपाली कांग्रेसका लागि पनि प्रतिउत्पादक साबित हुँदै जानेछ । त्यसैले, वर्तमान अन्योलताको अन्त्य गर ।






