दार्चुला । नेपाल–भारत लकडाउनको मौका छिपी भारतका विभिन्न क्षेत्रबाट नेपालीहरू ट्युबमार्फत नेपाल भित्रिएका छन् । मालिकार्जुन गाउँपालिका र लेकम गाउँपालिका भएर भारतमा काम गर्ने नेपाली घर फर्किएका हुन् ।
यो क्षेत्रका स्थानीय मात्र नभई बैतडी र बझाङका नेपाली मजदुर ट्युबमार्फत घर फर्किएका हुन् । दुवै देश लकडाउन भइरहेको बेला भारतमा रोकिएर रहेका नेपाली ट्युबमार्फत घर फर्किएको स्थानीय बताउँछन् ।
ट्युबमा चढेर दिनहँु नेपाली मजदुर भित्रिएका छन् । प्रतिव्यक्ति १ हजार रुपैयाँ तिरेर उनीहरू नेपाल प्रवेश गरेको एक स्थानीयले बताए । मालिकार्जुनको बाकु, गराडी, चुकिला डिन्सीलगायत क्षेत्रबाट रातको समयमा भारतबाट स्थानीय ट्युबमार्फत नेपाल आउने गरेको स्रोतको दाबी छ ।
त्यहीँका स्थानीयले अहिले विपद्को समयमा आम्दानीको स्रोतका रूपमा ट्युब बनाएका छन् । उकु बाकु हुँदै शुक्रबार राति २५ जना र शनिबार सोही संख्यामा मजदुर घर फर्किएको मालिकार्जुनका स्थानीय हीरासिंह धामीले जानकारी दिए । चेकजाँचबिना उनीहरू गाउँ पसेपछि गाउँमा जोखिम बढेको उनले बताए ।
लेकम गाउँपालिका स्वास्थ्य संयोजक हरिदत्त जोशीका अनुसार यसै साता बझाङका १३ जना नेपाली घर फर्किएको आफूले देखेको बताए । ‘पुल बन्द भएपछि यो ठाउँ भएर आएका थिए,’ उनले भने, ‘कुन ठाउँबाट तरे भन्ने जानकारी भएन । तर रातको समयमा ट्युबको माध्यमबाट नेपाल भित्रिने गरेको हल्ला छ । हामीले भारतबाट आएका व्यक्तिको पहिचान गर्न शुक्रबारदेखि स्वयंसेवक परिचालन गरेका छौं ।’
मालिकार्जुन गाउँपालिका ५ का वडाध्यक्ष तर्कराज ओझाले बैतडीका ५ जना ट्युबमार्फत नेपाल भित्रिएको बताए । उनीहरूलाई डाँडाकोट स्वास्थ्य चौकीमा चेकजाँच गरेर पठाइएको जानकारी दिए ।
मालिकार्जुन गाउँपालिका अध्यक्ष नरेन्द्रसिंह धामी अहिले पूलबाट आएका भन्दा पनि ट्युबमार्फत अवैध रूपमा नेपाल भित्रिरहेका मजदुरका कारण गाउँमा कोराना भाइरसको जोखिम बढेको बताउँछन् । उनले भने, ट्युबमार्फत रातको समयमा मात्रै नेपाल प्रवेश गर्छन् । उनीहरू स्वास्थ्य चेकजाँचबिनै गाउँघर पुगेका छन् ।’ ट्युबमार्फत नेपाल आउने बाटो पूर्ण रूपमा बन्द गर्न प्रमुख जिल्ला अधिकारी यदुनाथ पौडेललाई आग्रह गरेको अध्यक्ष धामीले बताए ।
जिल्ला प्रहरी कार्यालय दार्चुलाका डीएसपी दीपेन्द्रबहादुर शाही त्यस क्षेत्रमा रहेका ट्युबलाई स्थानीय र प्रहरीले नियन्त्रणमा लिइरहेको बताए । सीमा प्रहरी चौकी लाली, जौलजिवीले यो क्षेत्रका सबै ट्युब संकलन गर्ने काम गरिरहेको जानकारी दिए ।
स्थानीयका अनुसार नेपालतिरका ट्युब प्रहरीले नियन्त्रणमा लिएको भए पनि भारततिरका ट्युबमार्फत अहिले भारतमा रोकिएका नेपाली नेपालतिर आइरहेका छन् ।
सात तुइन हटाइयो, २१ ट्युब नियन्त्रणमा
व्यास गाउँपालिका सीमा क्षेत्र नेपाल–भारत आवतजावत गर्न बनाइएको अवैध तुइन हटाइएको छ । वर्षौंदेखि व्यास क्षेत्रका स्थानीयको आवतजावत गर्न बनाइका अवैध तुइन कोराना भाइरस (कोभिड–१९) को जोखिम बढेसँगै हटाइएको हो ।
व्यास क्षेत्रका मालघाट, गस्कुघाट, बरती घाट, मलघट्टे घाट, डोकट घाट, जंगती घाट, तावाघाटमा लगाइएका तुइन काटिएको जिल्ला प्रहरी कार्यालय दार्चुलाका डीएसपी शाहीले जानकारी दिए ।
मालका तुइन सञ्चालक कल्यानसिंह धामीले अहिले यो क्षेत्रमा तुइन पूर्ण रूपमा बन्द भएको बताए । ‘नेपाल–भारत दुवैतर्फ लकडाउन भएसँगै मान्छेको आवतजावत छैन,’ उनले भने, ‘यो क्षेत्रमा भारतीय क्षेत्रमा काम गर्ने भन्दा पनि यही क्षेत्रका नागरिक खाद्यान्न जोहो गर्ने गर्छन् ।’
सीमामा रोकिएका नेपाली ट्युबबाट धमाधम नेपालतर्फ
- Roshan Shrestha
- चैत्र १७, २०७६
- ४:३५ बिहान
Ads Space Available
अन्य समाचार पनि पढ्नुहोस्
कुरी-कुरी
आजको १० समाचार
- मलेसियमा झन्डै ६ लाख रिंगेट भेट्टाउने नेपाली को हुन् ?
- उपनिर्वाचनमा सत्तारूढ दलमै मैत्रीपूर्ण प्रतिस्पर्धा
- प्रधानमन्त्री प्रचण्ड र देउवाबीच भेटवार्ता
- छाया सेन्टर विवाद: ९ वर्षदेखि सर्वोच्चमा मुद्दा, २२…
- सकुशल भेटिइन् मेयर गोपाल हमालकी छोरी
- प्रतिनिधि र प्रदेशसभा उपनिर्वाचन: सत्तारूढ दलमै जुटेन सहमति
- ठमेल पर्यटन विकास परिषद्को कार्यक्रम घरधनीद्वारा बहिष्कार
- सर्वोच्चको आदेश : दुर्गा प्रसाईंले हतियार बोक्ने…
- उपनिर्वाचनका लागि नेकपा एसले उम्मेदवार तोक्यो,…
- रेशम चौधरी विदेशमा, रञ्जिताले बोलाइन केन्द्रीय समिति बैठक