काठमाडौं । काठमाडौं महानगर उपप्रमुख सुनीता डंगोलले महिला र पुरुषसँगसँगै अघि बढे मात्र पार्टी अध्यक्ष केपी शर्मा ओली तथा नेकपा एमालेले देखेको ‘समृद्ध नेपाल सुखी नेपाल’ सपना पूरा हुने बताएकी छन् ।
नेपाल कम्युनिस्ट पार्टी काठमाडौं महानगरपालिकाको जनसंठन अखिल नेपाल महिला संघको पहिलो अधिवेशन सम्बोधनका क्रममा उनले यस्तो बताएकी हुन् । महिला अघि बढ्नु भनेको पुरुषलाई पछि पार्नु नभएको बताउँदै उनले भनिन्, ‘हाम्रा पार्टीका श्रद्धेय अध्यक्ष पूर्वप्रधानमन्त्री केपी शर्मा ओली र नेकपा एमालेले देखेको समृद्ध नेपाल सुखी नेपालीको नारा महिला र पुरुष सँगसँगै एकजुट भएर अघि बढ्यो र एकअर्कालाई साथ दियौं भने मात्र बल्ल यथार्थमा बदलिन्छ ।’ युवा पुस्तालाई पनि सँगसँगै लिएर एकजुट भएर अघि बढ्ने हो भने नेकपा (एमाले)लाई अझ सशक्त बनाउन सकिने उनले बताइन् ।
यस्तै, काठमाडौं महानगरपालिका इन्चार्ज तथा पूर्वमन्त्री रामेश्वर फुयालले महिला गर्भदेखि चिहानसम्म अझै विभेदमा रहेको बताउँदै सोको अन्त्यका लागि महिला सशक्तीकरणको मुद्दा नेकपा एमालेले मूल मुद्दाका रूपमा उठाएको बताए । उनले भने, ‘नेपालमा अझै बोक्सी लाग्दै छ, छाउपडीप्रथा अझै छ, सामन्तवादका धेरै अवशेष बाँकी छन् ।’ उनले नेकपा एमालेले गास, बास, शिक्षा र स्वास्थ्यमा सुधारका लागि आर्थिक, सामाजिक र सांस्कृतिक क्रान्तिमार्फत समुन्नत नेपाल बनाउने बताए ।
अधिवेशनमा बाजागाजसहित महिलाको बाक्लो उपस्थिति थियो । साथै विभिन्न झाँकी प्रस्तुत गरिएको थियो । झाँकी शान्तिबाटिका सुरु भएको ¥याली रत्नपार्क, बागबजार, पुतलीसडक, पद्यमोदय विद्यालय, प्रदर्शनमार्ग राष्ट्रिय सभागृहमा पुगेको थियो । ¥यालीमा उपस्थित महिलाले ‘ महिला हिंसा अन्त्य गर, छुवाछुत तथा भेदभावविरुद्धको हक सुनिश्चित गर, भ्रष्टचारीलाई कारबाही गर, संविधानलाई कार्यान्वयन गर’, बढ्दो महँगी नियन्त्रण गरजस्ता नारा तथा प्लेकार्ड प्रस्तुत गरेका थिए ।
काठमडौं महानगर कमिटीका अध्यक्ष निर्मल देउलाले अखिल नेपाल महिला संघले नेपालको राजनीतिक इतिहस परिवर्तनमा अहं भूमिका खेलेको बताउँदै एकै रथका दुई पांग्रा मानिने पुरुष र महिला सँगसँगै भए मात्रै समृद्ध नेपाल सुखी नेपालीको सपना पूरा हुने उनको भनाइ थियो ।
काठमाडौं महानगर इन्चार्ज तथा पूर्वमन्त्री आनन्द पोखरेल, काठमाडौं महानगरका पूर्वमेयर विद्यासुन्दर शाक्य, नेकपा केन्द्रीय सदस्य तथा पूर्वसांसद नारायण सिलवाल, काठमाडौं जिल्ला अध्यक्ष दीपक निरौला, काठमाडौं जिल्ला सचिव राजेश शाक्यलगायतको उपस्थिति रहेको थियो ।
