गुल्मी । गुल्मीमा भुस्याहा कुकुरले टोक्दा १७ जना घाइते भएका छन् । बुधबार र बिहीबार जिल्लाको छत्रकोट गाउँपालिकामा १४ र रुरुक्षेत्र गाउँपालिकामा तीन जनालाई कुकुरले टोकेको हो । कुकुरले टोकेर घाइते भएका सबैलाई उपचारका लागि पाल्पाको मिसन अस्पतालमा पठाइएको थियो । जसमध्ये छत्रकोटका १४ र रुरुक्षेत्रका एक गरी १५ जना घर फर्किएका छन् ।
रुरुक्षेत्रका दुई जना अझै पनि मिसन अस्पतालमा रहेका छन् । रुरुक्षेत्र गाउँपालिकाका अध्यक्ष यदु ज्ञवालीका अनुसार एक जना ७२ वर्षीया महिलाको हातको औंला टोकेकोले शल्यक्रिया गर्नुपर्ने भएको छ । त्यस्तै, अर्को एक जनाको साप्रा र औंलामा टोकेकाले थप उपचारका लागि मिसन अस्पतालमै राखिएको छ ।
छत्रकोट गाउँपालिकाका पशु शाखा प्रमुख टेकबहादुर खनालले दुई दिनसम्म कुकुरले आतंक नै फैलाएको बताए । यद्यपि, उपचारमा गएका छत्रकोटका सबै नागरिक घर फर्किएको उनले बताए । कुकुरले अधिकांशको खुट्टामा टोकेको थियो । कुकुरले टोकेकामा १३ देखि ७५ वर्षसम्मका रहेका छन् ।
