राजधानी । सदरमुकाम फिदिममा जारी प्रथम वाइ वाइ अन्तराष्ट्रिय आमन्त्रण किरात गोल्डकपमा झापाको बिर्तामोड युनाइटेड क्लवले इलामको रेडहर्ष फुटवल क्लव विरुद्ध संघर्षपूर्ण जीत निकालेको छ ।
आइतबार फिदिम खेलमैदानमा भएको प्रतियोगिताको दोस्रो क्वाटरफाइन खेलमा कठिन जीत निकाल्दै बिर्तामोड युनाइटेड क्लवले सेमीफाइनल यात्रा तय गरेको हो । बिर्तामोडका लागि खेलको २२ औं मिनेटमा रोमन भुजेलको पासमा श्याम मुर्मुले गरेको गोल नै निर्णायक बन्यो ।
पहिलो हाफमा १–० ले पछि परेको रेडहर्षले दोस्रो हाफमा केहि सुन्दर अवशरहरु सिर्जना गरे पनि गोल गर्न चुक्दा नतिजा बिर्तामोडलाई सुम्पिनुप¥यो । खेलको म्यान अफ् दि म्याच बिर्तामोड युनाइटेडका जर्सी नं.११ श्याम मुर्मु बने । उनले नगद पाँच हजार रुपैंयाँ प्राप्त गरे ।
प्रतियोगिता अन्तर्गत सोमबार तेस्रो क्वाटरफाइन खेलमा डिएफसी मोरङ र पाहुना टोली युनाईटेड फुटवल क्लव दार्जिलिङ, भारत आमनेसामने हुनेछन् । खेल दिउँसो साँढे दुई बजेदेखि हुने आयोजक पाँचथर फुटवल क्लवले जनाएको छ ।
