धनगढी । सुदूरपश्चिम प्रदेशमा राष्ट्रिय सभाका लागि तीन दलका ६ जनाको उम्मेदवारी दर्ता भएको छ । एमालेका ३, कांग्रेसका २ र माओवादी केन्द्रका एक जनाले धनगढीस्थित राष्ट्रिय सभा निर्वाचन अधिकृतको कार्यालय पुगेर उम्मेदवारी दर्ता गरेका हुन् ।
अल्पसंख्यक तथा अपांगतातर्फ कैलालीका रामचन्द्र जोशी अन्यतर्फ कञ्चनपुरका ईश्वरीप्रसाद खरेल, महिलातर्फ कैलालीकै सावित्री घिमिरेले उम्मेदवारी दर्ता गरेको सहायक निर्वाचन अधिकृत प्रेमराज भट्टले जानकारी दिए ।
खरेल एमालेको केन्द्रीय लेखा आयोग सदस्य हुन् । घिमिरे अनेम संघकी पूर्वकैलाली अध्यक्ष हुन् भने जोशी पार्टीको भ्रातृ संगठन अपांग संघका केन्द्रीय सदस्य हुन् ।
गठबन्धनबाट उम्मेदवार बनेका कांग्रेसका नारायणदत्त भट्ट र बलदेव बोहराले पनि उम्मेदवारी दर्ता गरेका छन् । भट्ट नेपाली कांग्रेस कैलाली जिल्ला सभापति हुन् । उनी २०६२-६३ सालको जनआन्दोलनमा घाइते भएका थिए ।
बोहरा कञ्चनपुर जिल्ला विकास समितिका सभापति तथा २०६४ सालका संविधानसभा सदस्यसमेत हुन् ।
त्यस्तै, नेकपा माओवादी केन्द्रकी नेतृ रेनु चन्दले राष्ट्रिय सभा सदस्य निर्वाचनमा उम्मेदवारी दर्ता गराएकी छन् । चन्द माओवादी केन्द्रीय सदस्य तथा पहिलो संविधानसभा सदस्य हुन् ।
गठबन्धनले सुदूरपश्चिममा कांग्रेसलाई अपांग र अन्यमा गरी २ र माओवादी केन्द्रलाई महिला कोटाको १ सिट दिने सहमति गरेको थियो ।
अन्यमा कांग्रेसका बलदेव बोहरा र एमालेका ईश्वरी खरेलबीच चुनावी प्रतिस्पर्धा हुनेछ । महिलामा माओवादीकी रेनु चन्द र एमालेकी सावित्री घिमिरे तथा अपांग अल्पसंख्यकमा एमालेका रामचन्द्र जोशी र कांग्रेसका नारायणदत्त भट्टबीच प्रतिस्पर्धा हुनेछ ।
सुदूरपश्चिममा नेकपा माओवादी केन्द्रका हरिराम चौधरी ‘उत्सव’ र महेश महरा तथा नेकपा एमालेकी इन्दु कडरियाको पदावधि सकिन लागेको हो ।
