इलाम । निर्माण सकिएको नेपालटार मङ्गलवारे सडकको हालतले आजित बनेका पश्चिमी इलामका बासिन्दा गाग्रेभञ्ज्याङ्ग जीतपुर हुँदै बेलासे जोड्ने सडक चाँडो बन्ने भरोसामा थिए । तर निर्माण सम्पन्न गरिएको सडकको करिब चार किलोमिटर खण्ड एक वर्ष नहुँदै खाल्डाखुल्डी भएपछि स्थानीय यो बाटो बन्छ भन्नेमा विश्वस्त छैनन् । ६ वर्ष अगाडि निर्माण सुरु भएको सडक अवस्थाले सर्वसाधारण आजित छन् ।

गुणस्तरहीन सडक निर्माणमा म्याद थप्ने खेल र निकायको कमजोरीले अझै अनिश्चित

प्रदेश सरकारको लगानीमा सुरु भएको उक्त सडक खण्डको गाग्रेभञ्ज्याङ देखि जीतपुरे बजार सम्मको सडक काम नलाग्ने गरी बिग्रिएको छ । ढिलो गरेर निर्माण गरिएको सडक क्षत विक्षत भएपछि स्थानीय आक्रोशित बनेका हुन । जीतपुरे बजारका राम घिसिङले सडक निर्माणमा ठेकेदार र सम्बन्धित निकाय गैर जिम्मेवार भएको बताए । ठेक्का लागिसकेपछि सम्बन्धित निकायले कानमा तेल हालेको कारण सडकको अवस्था यस्तो भएको उनको गुनासो छ । गुणस्तरहीन सडक निर्माण, म्याद थप्ने खेल र निकायको कमजोरीका कारण गाग्रेभञ्ज्याङ–जीतपुर–बेलासे सडक अझै अनिश्चित बनेको छ ।

नेपालटार मङ्गलवारे सडकको हालत त छँदै छ अहिले बन्दै गरेको सडकको अवस्थाले यो सडक बन्छ भन्नेमा स्थानीय ढुक्क छैनन् । नेपालटार मङ्गलवारे सडकको वैकल्पिक मार्ग बन्छ भन्ने आस बोकेका पश्चिमी इलामका बासिन्दा बन्दै गरेको सडकको हालतले चिन्तित छन् ।

वर्षौँ देखिको प्रतीक्षा र करोडौँ खर्चपछि समेत सडक अधुरो हुँदा आक्रोशित बनेका स्थानीय निर्माण व्यवसायीको गैर जिम्मेवार, सम्बन्धित निकाय बेवास्ता र नेताहरूको राजनीतिक खेलकै कारण सडक अधुरो भएको बताउँछन् । स्थानीय कोपिला थापाले नेपालटार–मङ्गलवारे सडक पनि यसै गरी गुणस्तरहीन बनेर बिग्रिएको स्मरण गर्दै “वैकल्पिक भनेर बनेको यो सडक पनि त्यस्तै हालतमा रहेको बताइन । सडक बन्छ भन्दै पर्खेर बसेका स्थानीय अब हामी कहाँ जाने ? भन्दै प्रश्न गर्न थालेका छन् ।

पूर्वाधार विकास कार्यालय भद्रपुर झापाले २०७६ कार्तिकमा यो सडक निर्माणका लागि ठेकेदार प्यासिफिक ई लाइट जेभीसँग सम्झौता गरेको थियो । भ्याट सहित ३९ करोड ८६ लाखमा गाग्रेभञ्ज्याङ्ग जीतपुर बेलासे सडक निर्माणको सम्झौता भएको हो । गाग्रेभञ्ज्याङ्ग जीतपुर बेलासे सडक भनेर ठेक्का सम्झौता भए पनि यो सडक गाग्रेभञ्ज्याङ, जीतपुरे, नवमी, पञ्चमी हुँदै नामथला, सोयाक सम्म निर्माण हुने छ । साढे २२ किलोमिटर सडक कालोपत्रे गर्ने काम हालसम्म गाग्रेभञ्ज्याङ्गदेखि जीतपुर नवमी सम्म निर्माण भएको छ । बाँकी सोयाक देखि बेलासे सडक निर्माणमा पनि प्रदेशले कुनै चासो नदेखाएका कारण यो सडकको यात्रा जोखिम कायमै रहेको छ ।

कोसी प्रदेश सरकारका आर्थिक मामिला तथा योजना मन्त्री राम बहादुर रानाको घर छेउदेखि सुरु भएको यो सडकले प्रदेश सभा सदस्य गोविन्द गिरिको घर पनि जोड्दछ । आफ्नो घर गाउँमा निर्माण भएको सडकको अवस्था’bout दुवै जना बेखबर देखिन्छन् ।

ठेकेदार प्यासिफिक ई लाइट जेभीका प्रतिनिधि रवि लम्सालले प्रतिकुल मौसमले सडक निर्माणमा कठिनाइ भएको भन्दै गाग्रेभञ्ज्याङ्गदेखि जीतपुरे सम्मको बिग्रिएको सडकमा पनि पुन जोतेर कालोपत्रे गर्ने बताएका छन् । जीभीएसटी प्रकारको कालोपत्रे गर्दा सबै निर्माण सामग्रीको गुणस्तर मिल्नुपर्ने प्राविधिकहरू बताउँछन् ।

यस्तो सडक निर्माण पछि जति गाडी गुड्यो त्यति कालो देखिने बताउँछन् । लम्सालले चार किलोमिटर सडक दोहोराएर कालोपत्रे गरिने र बाँकी सडक खण्ड समेत चालु वर्षमा कालोपत्रे गरिसक्ने जानकारी दिए । तर उनले चालु वर्षमा सक्ने बताए पनि छ वर्षमा बनी नसकेको सडक अबको १० महिनामा सम्पन्न हुने अवस्था भने छैन ।

पूर्वाधार विकास कार्यालय भद्रपुर झापाका सी डी इ राजेश्वर महतोले उक्त ठेक्काको चार किलोमिटर सडकको पुन निर्माण नहुँदा सम्म ठेकेदारलाई रकम भुक्तानी रोकिएको बताए । उनले ठेकेदारसँग पटक पटक सम्पर्कमा रहेर काम गरेको बताए । तीन वर्ष अगावै निर्माण सक्नुपर्ने सडक ठेक्काको पटक पटक म्याद थप हुँदा पनि आधा निर्माण हुन सकेको छैन ।

यता ठेक्का सम्झौता अनुसार निर्माण कार्य सम्पन्न नहुँदै पूर्वाधार विकास कार्यालय भद्रपुर झापाबाट इलाममा जिम्मेवारी हस्तान्तरण भएको छ । प्रदेश सरकारले साबिकको सहरी विकास तथा भवन कार्यालयको नाम परिवर्तन गरी सबै जिल्लामा पूर्वाधार विकास कार्यालय स्थापना गरेको हो ।

सम्बन्धित समाचार

मुन्दुम पदमार्गलाई ‘तपोभूमि’को रुपमासमेत विकास गरिदै ओडारे–भण्डारे सिंचाई कुलो निर्माण सम्पन्न, स्थानीयलाई सहज चखेवा सडक खण्ड श्रमदानमार्फत मर्मत सुरु कोरियाको पर्खाइ मलेसिया यात्रा गाउँ गाउँमै पुगेर राष्ट्रिय परिचयपत्र वितरण एक किलोमिटर जग्गामा वडा पालिकाको फापर खेती करेन्ट लागेर सुपर हेवा हाइड्रोपावरमा कार्यरत मजदुरको मृत्यु