भोजपुर । सामुदायिक विद्यालयको शैक्षिक सुधारसँगै अनिवार्य तथा निःशुल्क शिक्षा कार्यान्वयनलाई प्रभावकारी बनाउने उद्देश्यले पौवादुङमा गाउँपालिकामा ‘वृहत् शैक्षिक भेला २०८३’ सञ्चालन गरिएको छ । जनप्रतिनिधि, सरोकारवालासँगै गाउँपालिकाभित्र रहेका ३२ वटा विद्यालयका शिक्षकको उपस्थितिमा कार्यक्रम गरिएको हो ।

भेलामार्फत शिक्षक, जनप्रतिनिधि तथा सरोकारवालाबीच शैक्षिक सुधार, विद्यार्थी भर्ना अभियान, सिकाइ उपलब्धि अभिवृद्धि तथा विद्यालय व्यवस्थापनका विविध विषयमा विस्तृत छलफल गरिएको छ ।

यसै अवसरमा पौवादुङमा गाउँपालिकाभित्र ५ देखि १३ वर्ष उमेर समूहका सबै बालबालिका विद्यालय बाहिर नरहेको सुनिश्चितता घोषणा गरिएको छ । गाउँपालिकाका प्रमुख प्रशासकीय अधिकृत नवीन भट्टराईले यस उपलब्धिले अनिवार्य तथा निःशुल्क शिक्षाको कार्यान्वयनमा महत्वपूर्ण सफलता हासिल भएको बताए ।

गाउँपालिका अध्यक्ष किरण राईले शिक्षा नै समृद्ध समाज निर्माणको आधार भएको उल्लेख गर्दै कुनै पनि बालबालिका शिक्षाबाट वञ्चित हुन नहुनेमा जोड दिए । उनले गाउँपालिकाले शिक्षाको गुणस्तर सुधार गर्न आवश्यक नीति, योजना तथा स्रोतसाधन व्यवस्थापनमा प्राथमिकता दिँदै आएको बताए ।

साथै, शिक्षालाई व्यवहारिक, प्रविधिमैत्री तथा जीवनोपयोगी बनाउनेतर्फ स्थानीय तह प्रतिबद्ध रहेको धारणा राखे ।

त्यस्तै, गाउँपालिका उपाध्यक्ष ज्योत्सना राईले बालबालिकाको शिक्षामा पहुँच वृद्धि गर्न अभिभावक, शिक्षक तथा समुदायबीच सहकार्य अपरिहार्य रहेको बताइन् । उनले आर्थिक, सामाजिक तथा भौगोलिक कारणले शिक्षा पहुँच बाहिर रहेका बालबालिकालाई लक्षित गरी विशेष कार्यक्रम सञ्चालन गरिने जानकारी दिइन् । साथै, शिक्षालाई प्राथमिकतामा राख्दै गुणस्तरीय शिक्षा प्रवाहका लागि आवश्यक समन्वय, अनुगमन तथा मूल्यांकन प्रणालीलाई सुदृढ बनाउँदै लगिएको उल्लेख गरिन् ।

कार्यक्रममा सहभागी शिक्षकहरूले सिकाइ उपलब्धि सुधार, विद्यार्थी नियमितता, विद्यालय वातावरण सुधार तथा नवप्रवर्तनात्मक शिक्षण विधिको प्रयोग’bout आफ्ना अनुभव र सुझाव प्रस्तुत गरेका थिए ।

सम्बन्धित समाचार

झापा गाउँपालिकाः बीस वर्षपारि विवाह गर्ने किशोरीलाई प्रोत्साहन पौवादुङमा गाँउपालिकामा ‘शून्य होम डेलिभरी’ चट्टानी घर्तीभीर फोरियो, खोटाङ–तराई बाटो छोटियो पहिरोले मेची राजमार्गको राजदुवाली खण्ड अवरुद्ध ‘सुन्दरहरैंचाका महिलालाई सीप, सम्मान र नयाँ अवसर’ धनकुटामा एकै दिन ७९५ किलोग्राम गाँजा बरामद, दुई जना पक्राउ झापामा मकै उत्पादनमा ह्रास पूर्वी नेपालको पर्यटन पर्वद्धनमा महिला व्यवसायी सक्रिय