खोटाङ । दशैँ, तिहार र छठमा घर फर्कने जिल्लावासीलाई सहज बनाउन जिल्ला विपद् व्यवस्थापन समिति खोटाङले जिल्लाका सबै सडक तत्काल मर्मत गरी यातायातयोग्य बनाउन आग्रह गरेको छ । यसका लागि स्थानीय तह र सम्बन्धित कार्यालयले आवश्यक व्यवस्थापन गर्ने–गराउने निर्णय समितिको बैठकले गरेको हो ।

जिल्लामा मध्यपहाडी लोकमार्गबाहेक सबै ग्रामीण सडक कच्ची भएकाले वर्षा सुरु हुनासाथ अवरुद्ध बन्ने गरेका छन् । वडा–वडासम्म सडक पुगे पनि कालोपत्रे नहुँदा वर्षमा करिब छ महिना मात्र यातायात चल्ने गरेको छ । “सडक निर्माण, मर्मत र सञ्चालनको जिम्मेवारी सम्बन्धित पालिकाको हो, यसमा हामी समन्वय गर्छौं,” समितिका संयोजक एवम् प्रमुख जिल्ला अधिकारी महेशकुमार गुरुङले भने, “चाडपर्व मान्न गाउँ आएका कसैले पनि दुःख पाउनुभएन ।

अवरुद्ध सडक सञ्चालनमा ल्याउन प्रशासनबाट सक्दो सहयोग हुनेछ ।” पर्वको समयमा मध्यपहाडी लोकमार्ग अन्तर्गतको दिक्तेल–हलेसी–जयरामघाट सडकखण्ड २४ सै घण्टा सञ्चालनमा राख्न समेत आग्रह गरिएको छ । भोजपुरका स्थानीयले समेत प्रयोग गर्ने यो सडकको मर्मतका लागि मध्यपहाडी लोकमार्ग आयोजना, सडक डिभिजन कार्यालय हर्कपुर, गाईघाट–दिक्तेल सडक आयोजना र सम्बन्धित पालिकाले समन्वय गर्ने निर्णय भएको छ ।

बैठकले निजी आवास पुनर्निर्माण तथा प्रबलीकरणको दोस्रो किस्ता वापत दिक्तेल रुपाकोट मझुवागढी–१२ का सुबिन श्रेष्ठ र कुमार श्रेष्ठलाई वितरण गरिएको तीन लाख ४० हजार अनुमोदन गरेको छ । त्यसैगरी साउन–१५, २५ र भदौ–१ को अविरल वर्षाले सोल्मा, पाथेका र खार्मीमा सडक तथा तटबन्धमा पुगेको क्षति मर्मतका लागि कोशी प्रदेशको आन्तरिक मामिला तथा कानून मन्त्रालयमा गरिएको सिफारिस अनुमोदन गर्दै जिल्लामा विपद् प्रतिकार्यको व्यावहारिक अभ्यास गर्ने निर्णय समेत गरिएको छ ।

सम्बन्धित समाचार

काठमाडौं उपत्यकामा नयाँ रुटसहित रात्रि बसको सेवा विस्तार बाढीले पक्की पुल बगाएको देवीघाटमा एक्रो ब्रिज जडान अझै ३–४ दिन कृष्णभीरको बाटो नखुल्ने कृष्णभीर सडक १ असोजदेखि खुला गर्ने लक्ष्य, ट्रयाक खुलेसँगै २१ वटा ठूला सवारी साधन बाहिरिए चार वर्षदेखि अँध्यारो कोठामा भीमा ग्रामीण क्षेत्रमा खानेपानीको पहुँच पुर्‍याउँदै प्रदेश सरकार कृष्णभीरमा ट्रयाक खोल्ने काम सकियो, बिहीबारदेखि दुईतर्फी यातायात सञ्चालन कृष्णभिरमा सडक दुईतर्फी सञ्चालन