काठमाडौं । एमालेको निर्वाचन समीक्षा तथा पार्टी पुनर्गठनका लागि गठन गरिएको कार्यदलको नाममा तयार भएको तेस्रो प्रतिवेदनमा अध्यक्ष केपी शर्मा ओलीको राजीनामा र नेतृत्वबाट हटाउने विषय गायब पारिएको छ ।

एमाले नेता प्रदिप ज्ञवालीले तयार पारेको २९ पुष्ठको प्रतिवेदनमा एमाले अध्यक्ष केपी शर्मा ओलीलाई ‘युगान्तकारी’ नेताका रूपमा चित्रण गर्दै निर्वाचनमा भएको पराजय र पार्टी पुनर्गठनको विषयभन्दा ओलीको नेतृत्व र विगतका उपलब्धिको प्रशंसालाई प्राथमिकता दिइएको कार्यदलका असन्तुष्ट सदस्यहरूको आरोप लगाएका छन् ।

कार्यदलका सदस्यहरूका अनुसार देशभरबाट संकलन गरिएका सुझावलाई आधार बनाएर पार्टीको नेतृत्व र संगठन पुनर्गठनको स्पष्ट खाका ल्याउनुपर्नेमा त्यसविपरीत प्रतिवेदन तयार भएको छ । उनीहरूले कार्यदलभित्रै छलफल नगरी बाहिरबाट तयार पारिएको प्रतिवेदनलाई आधिकारिक दस्तावेजका रूपमा स्वीकार गर्न नसकिने बताएका छन् ।

प्राप्त प्रतिवेदनमा ओलीको नेतृत्वमा संविधान निर्माण, उत्तरी नाका सञ्चालन, विकास निर्माण, कोभिड महामारीको सामना तथा खानी उत्खननको वातावरण निर्माणलगायत विषयलाई उपलब्धिका रूपमा प्रस्तुत गरिएको छ । प्रतिवेदनमा भनिएको छ, ‘वास्तवमा पार्टी अध्यक्षको नेतृत्वमा नेपालको राजनीतिमा हावी हुन खोजिरहेका हिंसा एवं जातिवाद र क्षेत्रीयवादमा आधारित विघटनकारी एजेन्डाहरूको प्रतिवाद गर्ने कुरामा महत्त्वपूर्ण सफलता हासिल भएको हो ।’

तर, ओलीको प्रशंसा गर्ने क्रममा ऐतिहासिक घटनाको सन्दर्भसमेत विवादास्पद ढंगले प्रस्तुत गरिएको कार्यदलका सदस्यहरूको दाबी छ । प्रतिवेदनमा ओलीकै नेतृत्वमा दोस्रो संविधानसभाको निर्वाचन र संविधान निर्माण भएको आशय व्यक्त गरिएको छ । त्यस्तै, २०७२ सालमा संविधान जारी हुँदा ओली प्रधानमन्त्री थिए ।

प्रतिवेदनमा संविधान जारी हुनु, उत्तरी नाका खोल्नु, दैलेखको खानी, मुस्ताङको युरेनियम तथा धौवादीको फलाम खानी उत्खननको वातावरण बनाउनुजस्ता विषयलाई ओली नेतृत्वका उपलब्धिका रूपमा समेटिएको छ । तर, २०८२ फागुन २१ गते सम्पन्न निर्वाचनमा एमालेले व्यहोरेको पराजयको विषय भने प्रतिवेदनमा सीमित रूपमा मात्र समेटिएको छ ।

प्रतिवेदनमा ‘पार्टी अध्यक्ष केपी शर्मा ओलीको नेतृत्वमा नेपालको कम्युनिस्ट आन्दोलनले हासिल गरेको सफलता र उत्कर्ष तथा निर्वाचनमा भएको इतिहासकै कमजोर पराजयसम्मका समग्र पक्षको वस्तुनिष्ठ समीक्षा गर्नुपर्ने’ उल्लेख गरिएको छ ।

सम्बन्धित समाचार

संघीय संसद्का दुवै सदनको बैठक बस्दै, यस्ता छन् सम्भावित कार्यसूची शहीदको सालिकको स्वरूपमा आफन्तको आपत्ति, अनावरण नगरी फर्किए गृहमन्त्री गुरुङ ‘विशेष महाधिवेशन गगनले खल्तीबाट बोलाएर हुन्छ ?’ प्रधानमन्त्रीको न्युयोर्क भ्रमण, जलवायु न्याय र विपद्को क्षतिपूर्ति प्रमुख प्राथमिकतामा देउवा समूहले अलग्गै महाधिवेशन गर्ने, गगन थापाको अफर अस्वीकार कार्यदलको प्रतिवेदनमा छलफल गर्न एमाले नेताहरु गुन्डुमा अख्तियारः कहाँ सुध्रियो, कहाँ चुक्यो ? संविधानको अक्षर र भावना दुवैप्रति सरकार पूर्ण प्रतिबद्ध छ : प्रधानमन्त्री