राजविराज । अदालतको आदेश कार्यान्वयन गर्न पुगेका प्रहरी र जनप्रतिनिधि कै सामुन्ने बुधबार एक विवादित पोखरीबाट डेढ लाख भन्दा बढी मुल्यको माछा लुटिएको रोचक घटना भएको छ ।
सप्तरीको रुपनी गाउँपालिका ३ कटैयास्थित धामी पोखरीबाट १ लाख ८० हजार मुल्य बराबरको करिब ६ सय केजी माछा लुटपाट गरिएको हो ।
उक्त पोखरी पालिका सार्वजनिक र स्थानीय एक पक्षले निजि भएको दाबी गर्दै आएका छन् । यसरी दुई पक्षले आ–आफ्नो भएको दाबी गर्न थालेपछी उक्त विवाद अदालत पुगेको थियो ।
सप्तरी जिल्ला अदालतले उक्त पोखरी विवादको अन्तिम किनारा नलागुन्जले उक्त पोखरीमा रहेको माछा बिक्रि गरि प्राप्त आम्दानी गाउँपालिकाको राजश्व खातामा जम्मा गर्न आदेश दिएको थियो ।
सो वडाका इनरदेव चौधरी धामीले पुर्खौदेखी आफूहरुले हकभोग र रेखदेख तथा संरक्षण गर्दै आएको उक्त पोखरी आफूहरु कै परिवारको रहेको दाबी गर्दै आएका थिए । तर वडा कार्यालयले उक्त पोखरी निजि नभई सार्वजनिक भएको दाबी गर्दै आएको थियो ।
अदालतको आदेश कार्यान्वयनका सिलसिलामा पत्थरगाढा प्रहरी चौकीका असई बैजु यादव, वडाअध्यक्ष अमरलाल मुखिया सुरक्षाकर्मीसहित पोखरी पुगेका थिए । उनीहरुकै उपस्थितिमा पोखरीबाट झण्डै ६ सय केजी माछा बाहिर निकालिसकिएको थियो । तर एक्कासी आएको गाउँलेहरुको एक भिडले ती सबै माछा लुटेर लगेको प्रहरीको भनाई छ ।
प्रहरी नायब उपरिक्षक जितेन्द्र कुमार बस्नेतले अचानक ठूलो संख्यामा आएको समूहले माछा लुटपाट गरेको र सो ’bout आवश्यक अनुसन्धान भइरहेको जनाएका छन् ।
