भोजपुर । भोजपुर सदरमुकाम नजिकै रहेको काफ्ले डाँडालाई पर्यटकीय क्षेत्रको रूपमा विकास गर्ने काम अघि बढाइएको छ। भोजपुर नगरपालिका–९ मा पर्ने यस स्थानलाई आन्तरिक तथा बाह्य पर्यटकलाई लक्षित गर्दै संरक्षण तथा संरचना निर्माणको काम निरन्तर रहेको वडाध्यक्ष रामबहादुर तामाङले जानकारी दिए ।
वडाको ६ लाख र प्रदेश सरकारको रु. १० लाख गरी कुल रु. १६ लाखमा यहाँ दुई तिरबाट बारा(रेलिङ) सहितको पदमार्ग, धारा, शौचालय र पिकनिक स्थल निर्माण गरिएको छ।‘हामी काफ्ले डाँडालाई व्यवस्थित पर्यटकीय गन्तव्यका रूपमा विकास गर्दैछौँ,’ वडाध्यक्ष तामाङले भने,‘यो स्थान सुन्दर मात्र होइन, सदरमुकाम नजिक भएकाले पर्यटकलाई आकर्षित गर्ने धेरै सम्भावना छ। त्यसैले उपलब्ध स्रोत साधनले भ्याएसम्मका संरचनाहरू तयार गरेका छौँ।’
यस वर्ष पनि थप संरचना निर्माणका लागि वडाले १ लाख ५० हजार विनियोजन गरेको छ। काफ्ले डाँडालाई अझ आकर्षक बनाउन बुद्धको मूर्ति स्थापना र दुईतिरबाट बारा राखेर सुरक्षित पैदलमार्ग बनाउने योजना रहेको वडाध्यक्ष तामाङले बताए । बजेट अभावका कारण केही काम अधुरो रहेको उनको भनाइ छ।
काफ्ले डाँडाबाट भोजपुर बजार, आसपासका बस्ती, हरियाली वनक्षेत्र तथा टाढासम्मका हिमश्रृङ्खलासमेत अवलोकन गर्न सकिने भएकाले यहाँ दैनिक रूपमासमेत घुमफिर तथा फोटो खिच्न आउनेको संख्या बढ्दो छ। विशेषगरी बिदाका दिन, नयाँ वर्ष तथा फूल फुल्ने मौसममा यहाँ आगन्तुकको चहलपहल उल्लेख्य रूपमा देखिने गरेको स्थानीयले बताएका छन्।
पर्यटन व्यवसायीहरूले यस क्षेत्रको प्रभावकारी व्यवस्थापन र प्रचार–प्रसार हुन सकेमा स्थानीय अर्थतन्त्रमा प्रत्यक्ष फाइदा हुने अपेक्षा राखेका छन् ।
