सिन्धुली । मध्यपहाडी लोकमार्ग (राजमार्ग) अन्तर्गत सिन्धुलीको फिक्कल गाउँपालिका वडा नं.२ नवलपुरमा बसको ठक्करबाट सुनकोशी नदीमा कार खसेको छ । उक्त कारमा तीनजना सवार रहेको प्रहरीले पुष्टि गरेको छ । सोमबार दिउँसो सडक छेउमा रोकेर राखिएको प्रदेश ३–०१–०२४ च ९५७३ नम्बरको कारलाई काठमाडौंबाट ओखलढुंगातर्फ जाँदै गरेको वा.प्र.०८–००१ ख ०१४४ नम्बरको बसले ठक्कर दिँदा कार सुनकोशी नदीमा खसेको थियो ।

जिल्ला प्रहरी कार्यालय सिन्धुलीका प्रमुख एसपी रविन्द्र बहादुर सिंहका अनुसार कार चालक सिन्धुपाल्चोकको जुगल गाउँपालिका वडा नं. ७ का दिल कुमार लामा, कारमा मध्यपहाडी लोकमार्गको पुनःनिर्माणको काम खटिएका स्काईभेटर चालक गोलञ्जोर गाउँपालिका वडा नं. १ का गणेश थापा र स्काईभेटरका सहयोगी तिनपाटन गाउँपालिका वडा नं. ९ का १७ वर्षिय सुजन बलम्पाकी मगर वेपत्ता रहेका छन् ।

उनका अनुसार पानीको बहाव अत्यधिक भएकाले उद्धारमा कठिनाई उत्पन्न भएको छ । नेपाल प्रहरी, नेपाली सेना र सशस्त्र प्रहरीको विपद वेश क्याम्प खुर्कोटको गोताखोर टोलीले खोजी कार्य जारी राखेको छ । तर गाडी र वेपत्ताहरुको अवस्था पत्ता लाग्न सकेको छैन । कार सुनकोशी नदीमा खसेको पुष्टि भए पनि नदीमा कार देखिएको छैन । एसपी सिंहले भने, ‘कारमा रहेका तीनै जना बेपत्ता छन् । कार भेटिएको छैन । पानीको वहाव अत्यधिक भएकाले उद्धारका प्रयासहरु सफल हुन सकेका छैनन् ।’

मध्यपहाडी लोकमार्ग पुनःनिर्माणको ठेकेदार कम्पनी कालिमाता गौरा मिग्मा कन्ट्रक्सनको कार भएको र कार चालक उक्त कम्पनीको निर्माण व्यवसायी समेत भएको जानकारी प्राप्त भएको छ ।

घटना लगत्तै इलाका प्रहरी कार्यालय खुर्कोट, सशस्त्र प्रहरी बलको विपद् व्यवस्थापन टोली तथा स्थानीय जनप्रतिनिधि र स्थानीयवासी घटनास्थलमा पुगेर कार तथा त्यसमा सवार व्यक्तिहरूको खोजी कार्य सुरु गरेका थिए । पानीको वहाव अत्यधिक भएका कारण दिनभरका प्रयासहरु सफल भएका छैनन् ।

दुर्घटनामा संलग्न बस र बसका चालक फिक्कल गाउँपालिका ६ का हेम बहादुर तामाङलाई प्रहरी चौकी खाङसाङमा नियन्त्रणमा लिई राखिएको एसपी सिंहले जानकारी दिएका छन् । यस्तै प्रमुख जिल्ला अधिकारी स्किम श्रेष्ठ, जिल्ला प्रहरी कार्यालय सिन्धुलीका प्रमुख एसपी रविन्द्र बहादुर सिंह सहितको सुरक्षा प्रमुखहरुको टोली समेत घटनास्थल पुगेर फर्केको छ ।

सम्बन्धित समाचार

नेपाल भित्रियो जेन–४ नानो–बायो टेक्नोलोजी कीर्तिपुरमा कारभित्र जलेर मृत्यु भएका व्यक्तिको पहिचान खुल्यो काठमाडौं-३० का लेखा अधिकृत घुसरकमसहित पक्राउ महिला सेवाग्राहीलाई दुर्व्यवहार गर्ने पठाओ चालक पक्राउ पहिरोले नारायणगढ–मुग्लिन सडक अवरुद्ध सामाजिक सञ्जाल नियमन गर्न कानुन बनाउन माग माग सम्बोधन नभए आन्दोलन चर्काउने दुर्गा प्रसाईंको चेतावनी अप्ठेरोमा परेकालाई घर–घरमा खाना पकाउने ग्यास : प्रजिअ