गुल्मी । ‘चौरासीमा पहिला : नेतृत्वमा महिला’ भन्ने मुल नाराका साथ गुल्मीमा अन्तरपुस्ता महिलावादी मञ्चको कोणसभा सम्पन्न भएको छ । सोमबार सदरमुकाम तम्घासमा सम्पन्न सभाले आगामी पालिका निर्वाचनलाई लक्षित गर्दै महिला नेतृत्वकेन्द्रित कोणसभा सम्पन्न गरेको हो ।

कार्यक्रममा बोल्ने महिलाहरुले महिला अधिकार, महिला शसक्तिकरण, राजनीतिक दल र सरकारमा महिलाले कम अवसर पाउने जस्ता बिषयमा धारणा राखेका थिए । सत्यवती गाउँपालिकाकी उपाध्यक्ष निरु मगरले आगामी निर्वाचनका लागि महिलाहरुले आजैबाट घरदैलो एवं जनसम्पर्क बढाउनुपर्ने धारणा राखिन् । काँग्रेस नेतृ लक्ष्मी पाण्डेले ०७९ सालको निर्वाचनमा थुप्रै महिलाहरु वडाध्यक्षको लागि इच्छ्या राखेपनि पार्टीबाट वञ्चित भएको बताइन् ।

उनले आफ्नो पनि पार्टीमा सहमतिभित्र पनि थुप्रै असहमति रहेको बताइन् । नेकपा नेतृ विनिता रोका पोखरेलले गणतन्त्र प्राप्तीको लागि महिलाहरुले महत्वपूर्ण भूमिका खेलेपनि नेतृत्वदायी भूमिकामा भने पछाडी परेको उल्लेख गरिन् । कालिगण्डकी गाउँपालिका उपाध्यक्ष मञ्जु कुमारी दर्लामीले महिलाहरुले पुरुषलाई दोष दिन भन्दा आफु नै सक्षम हुन आग्रह गरिन् ।

पत्रकार महासंघका पूर्व अध्यक्ष टोपलाल अर्यालले महिलाहरुलाई दलिय गुटभन्दा माथि उठ्न आग्रह गरे । कार्यक्रममा बोल्दै प्रमुख अतिथि समेत रहेकी पूर्व सासंद दिलशोभा पुनले आगामी निर्वाचनमा उठ्ने योजना भए अहिलेबाट नै तयारीमा लाग्नुपर्ने धारणा राखिन् ।

आगामी २०८४ सालको निर्वाचनलाई लक्षित गर्दै अन्तरपुस्ता महिलावादी मञ्चले देशव्यापी रुपमा पाँच बर्षे ‘अनुपम अभियान’ संचालन गरिरहेको छ । वि.स. २०७६ सालमा स्थापना भएको यो महिला मञ्च एक अनौपचारिक, साझा, स्वयम्सेवी र स्वतन्त्र महिलाहरुको संजाल हो ।

यसमा हाल ७७ वटै जिल्लाका हजारौं महिलाहरु आवद्ध छन् । गुल्मीमा महिलाहरुले ‘८४ मा पहिला, नेतृत्वमा महिला’, ‘पार्टी हामी जान्दैनौ, महिलाबाहेक छान्दैनौ’ जस्ता नारा लगाएको महिला नेतृ गीता थापाले जानकारी दिइन् ।

समग्र महिलाहरुको क्षमता विकास गरी उनीहरुलाई आगामी स्थानीय तहको निर्वाचनमा अधिकतम सहभागि गराउने उदेश्यले कार्यक्रमको आयोजना गरिएको थापाले बताइन् ।

सम्बन्धित समाचार

तीस महिनामा सम्पन्न हुनुपर्ने ६२ किमी हुलाकी सडक दस वर्षमा बनेन दुर्घटनामा परेका आफ्नै साथीको हत्या गर्ने चालक पक्राउ भैयापुरमा इँटा भट्टाको पर्खाल भत्किँदा दुई मजदुरको मृत्यु दाङमा सकियो ९४ प्रतिशत रोपाइँ २२ करोड १७ लाख राजश्व सङ्कलन रुपन्देहीको मर्चवारीमाईमा पूर्वाधारसँगै सामाजिक विकासमा जोड तीन दिनदेखि बेपत्ता कपिलवस्तुका पूर्वमेयर सिंह जंगलमा मृत भेटिए लुम्बिनीमा आरोग्य पर्यटन प्रवर्द्धन अभियान