धनगढी । सुदूरपश्चिम प्रदेशसभा सदस्य प्रकाशबहादुर देउवा पदमुक्त भएका छन् । देउवा सुदूरपश्चिम प्रदेश सरकारका पूर्वभौतिक पूर्वाधार विकास मन्त्री पनि हुन् । प्रदेशसभा बैठकमा बिना सूचना लगातार १० भन्दा बढी पटक अनुपस्थित भएपछि पदमुक्त गरिएको हो ।

११ महिनामा ७ लाख ५३ हजार भुक्तानी

देउवा पूर्व प्रधानमन्त्री तथा नेपाली कांग्रेसका पूर्व सभापति शेरबहादुर देउवाका भतिजा हुन् । उनी कैलाली निर्वाचन क्षेत्र नम्बर ५ को (२) बाट प्रदेशसभा सदस्यमा निर्वाचित भएका थिए ।

सुदूरपश्चिम प्रदेशसभा सचिवालयले तयार गरेको पद रिक्तसम्बन्धी टिप्पणी आदेश सभामुख भीमबहादुर भण्डारीले सदर गरेपछि देउवा पदमुक्त भएका हुन् । सभामुखले यस’bout आज बुधवार दिउँसो १ बजे बस्ने प्रदेशसभा बैठकमा जानकारी गराउने कार्यक्रम रहेको प्रदेशसभा सचिवालयले जनाएको छ ।

देउवा गत वर्ष भदौमा भएको जेन्जी आन्दोलनपछि २८ भदौमा व्यक्तिगत कामका लागि अमेरिका गएका थिए । त्यस क्रममा स्वास्थ्यमा समस्या देखिएपछि उपचारका लागि अमेरिकामै बसेका उनी ११ महिना बितिसक्दा पनि नेपाल फर्किएका छैनन् । छैटौँ अधिवेशनका क्रममा लगातार पाँच बैठकमा अनुपस्थित भएपछि देउवाले चैत २३ गते प्रदेशसभा सचिवालयलाई पत्र पठाउँदै आफू स्वास्थ्य परीक्षण तथा उपचारका क्रममा अमेरिकामा रहेको जानकारी गराएका थिए ।

सभामुखलाई सम्बोधन गरिएको पत्रमा उनले स्वास्थ्यमा पूर्ण सुधार भएपछि नेपाल फर्किएर संसदीय जिम्मेवारीमा सक्रिय हुने प्रतिबद्धता जनाएका थिए । तर पत्र पठाएको चार महिनाभन्दा बढी समय बितिसक्दा पनि उनी नेपाल फर्किएका छैनन् । उनको उपचारको अवस्था र नेपाल फर्किने मिति’bout नेपाली कांग्रेसका नेताहरूलाई समेत स्पष्ट जानकारी नरहेको बताएका छन् ।

नेपालको संविधानको धारा १८० को (घ) मा सभालाई सूचना नदिई लगातार १० वटा बैठकमा अनुपस्थित भएमा प्रदेशसभा सदस्यको पद रिक्त हुने व्यवस्था छ । यही संवैधानिक व्यवस्थाअनुसार देउवाको पद रिक्त भएको सभामुख भीमबहादुर भण्डारीले बताए । सुदूरपश्चिम प्रदेशसभा नियमावली, २०८० मा पनि यससम्बन्धी व्यवस्था रहेको छ ।

प्रदेशसभा सचिवालयका अनुसार छैटौँ अधिवेशनमा २५ वटा बैठक बसेकामा देउवा आठ दिन मात्रै उपस्थित भएका थिए । त्यसपछि सातौँ र आठौँ अधिवेशनका कुनै पनि बैठकमा उनी उपस्थित भएनन् । पछिल्ला २७ वटा बैठकमा उनको हाजिरीसमेत नरहेको सचिवालयको अभिलेखमा उल्लेख छ । सुदूरपश्चिम प्रदेशसभाको दोस्रो कार्यकालमा हालसम्म १२८ वटा बैठक बसेका छन् । तीमध्ये देउवा ६० वटा बैठकमा मात्रै उपस्थित सचिवालयले जनाएको छ ।

अमेरिकामा रहेका देउवाको खातामा प्रदेशसभा सचिवालयले पद कायम रहेसम्म सेवा–सुविधाबापतको रकम नियमित पठाउँदै आएको थियो । सचिवालयका अनुसार ११ महिनामा मात्रै देउवाले ७ लाख ५३ हजार ५ सय रुपैयाँ सेवा–सुविधाबापत बुझेका छन् । मासिक पारिश्रमिक, धारा–बिजुली, सञ्चार र अतिथि सत्कारलगायत शीर्षकमा उनको खातामा रकम जम्मा हुँदै आएको थियो ।

सचिवालयले मासिक रूपमा पारिश्रमिकबापत ५६ हजार ५ सय, धारा–बिजुलीबापत २ हजार, सञ्चार सुविधाबापत ३ हजार र अतिथि सत्कारबापत ७ हजार रुपैयाँ गरी कुल ६८ हजार ५ सय रुपैयाँ उपलब्ध गराउँदै आएको जनाएको छ । यसैगरी गत जेठमा निजी आवास मर्मत शीर्षकमा थप ३५ हजार रुपैयाँसमेत उनको खातामा पठाइएको थियो ।

यसअघि माघमा देउवा नेपालमा नरहेको भन्दै सचिवालयले उनको सेवा–सुविधा रोक्का गरेको थियो । तर कानुनअनुसार प्रदेशसभा सदस्य पद कायम रहेसम्म सेवा–सुविधा रोक्न नमिल्ने भएपछि जेठमा चार महिनाको रकम एकमुस्ट भुक्तानी गरिएको सचिवालयले जनाएको छ । लामो समयदेखि आफ्नो निर्वाचित प्रतिनिधि सम्पर्कविहीन रहेको भन्दै उनको निर्वाचन क्षेत्रका मतदाताले समेत असन्तुष्टि जनाउँदै आएका थिए ।

प्रदेशसभा बैठकमा लामो समयदेखि अनुपस्थित रहेका सांसदले राज्यबाट नियमित सेवा–सुविधा पाइरहेको विषय एकातिर थियो भने अर्कोतर्फ उनी कहिले नेपाल फर्किन्छन् भन्ने प्रश्न अनुत्तरित थियो । अब भने लगातार १० बैठकमा अनुपस्थित रहेको संवैधानिक व्यवस्थाअनुसार उनको प्रदेशसभा सदस्य पद नै रिक्त भएको छ ।

सम्बन्धित समाचार

दुर्गा प्रसाईँ र धवल शमशेरले गठन गरे ‘जय नेपाल पार्टी’ राजनीतिक नियुक्तिमा फेरि मनोमानी काँग्रेस विशेष महाधिवेशन विवादमा सर्वोच्चबाट पुनः सुरुदेखि सुनुवाइ हुने कांग्रेस केन्द्रीय समिति बैठक बस्दै, यी हुन् एजेन्डा यो सरकारले समयमै रासायनिक मल सुनिश्चित गर्न सकेन : प्रचण्ड देवानगञ्ज-कप्तानगञ्ज घटनामा न्यायिक आयोग गठन गर्न काँग्रेसको माग कोपमा सहभागी हुन प्रधानमन्त्री बालेनलाई टर्कीको निमन्त्रणा निराशालाई आशामा बदल्ने दायित्व कांग्रेसले लिनुपर्छ: देउवा