काठमाडौं । नेपाली प्रविधि उद्यमीहरूले विकास गरेको कृत्रिम बुद्धिमत्ता (एआई)मा आधारित मार्केटिङ प्लेटफर्म विदेशी बजारमा विस्तार गर्ने तयारी गरेका छन् । फिक्रा भेन्चर्सले भिडियो निर्माणदेखि सामाजिक सञ्जाल व्यवस्थापन, डिजिटल विज्ञापन र उपभोक्ताको प्रतिक्रिया विश्लेषणसम्मका काम एउटै प्रणालीबाट गर्न सकिने प्लेटफर्म विकास गरिरहेको जनाएको छ ।

कम्पनीका अनुसार प्लेटफर्मले व्यवसायलाई मार्केटिङ सामग्री निर्माण, सामाजिक सञ्जालमा प्रकाशन, विज्ञापन सञ्चालन, त्यसको प्रभाव मापन तथा उपभोक्ताबाट प्राप्त प्रतिक्रियाका आधारमा अर्को सामग्री तयार गर्न सहयोग गर्नेछ । विशेषगरी साना तथा मझौला व्यवसायलाई लक्षित गरी प्लेटफर्म विकास गरिएको कम्पनीले जनाएको छ ।

फिक्रा भेन्चर्सको एआई भिडियो निर्माण उपकरण ‘फिक्राजेन’ ले सामान्य विचार वा स्क्रिप्टबाट व्यावसायिक भिडियो तयार गर्न सहयोग गर्ने कम्पनीको दाबी छ । प्रयोगकर्ताले स्क्रिप्ट र भ्वाइसओभर स्वीकृत गरेपछि भिडियो तयार गर्न सक्नेछन् ।

कम्पनीका अनुसार यसको एआई इन्जिनले भिडियोका लागि आवश्यक डिजाइन र एनिमेसन स्वचालित रूपमा तयार गर्छ । ब्रान्ड किट, बहुभाषिक भ्वाइसओभर, व्यक्तिगत आवाजको क्लोनिङ, वेबसाइट क्याप्चर, क्याप्सन, विभिन्न स्क्रिन आकारअनुसार भिडियो तथा दृश्यस्तरको सम्पादन सुविधा यसमा समावेश गरिएको छ ।

फिक्रा भेन्चर्सले सामाजिक सञ्जाल व्यवस्थापनका लागि ‘फिक्रासोसल’ विकास गरेको जनाएको छ । यसबाट सामाजिक सञ्जालका अकाउन्ट जोड्ने, सामग्री प्रकाशन तथा समय निर्धारण गर्ने र कमेन्ट, सन्देश तथा प्रतिक्रियाको विश्लेषण गर्न सकिनेछ ।

एआईमार्फत उपभोक्ताको भावना, उद्देश्य र दोहोरिने विषय पहिचान गर्न सकिने कम्पनीको दाबी छ । डिजिटल विज्ञापनतर्फ लक्षित ग्राहकसम्म विज्ञापन पुर्‍याउने, त्यसबाट आएका ग्राहक तथा बिक्रीको मापन गर्ने, लगानीअनुसारको प्रतिफल विश्लेषण गर्ने र विभिन्न विज्ञापन सामग्रीको तुलनात्मक परीक्षण गर्ने सुविधा विकास गरिँदै छ ।

कम्पनीले विज्ञापन वा सामाजिक सञ्जालमा प्राप्त प्रतिक्रियालाई अर्को सामग्री निर्माणको आधार बनाउने प्रणाली विकास गरिरहेको जनाएको छ । यसलाई कम्पनीले निरन्तर सुधारमा आधारित ‘क्लोज्ड लुप’ कार्यप्रणाली भनेको छ ।
नेपालमा विकास भएको एआई प्रविधिलाई नेपाली व्यवसायमा मात्र सीमित नराखी विदेशी बजारमा समेत पुर्‍याउने लक्ष्य फिक्रा भेन्चर्सले लिएको जनाएको छ । कम्पनीले अंग्रेजीबाहेक अरबीसहित अन्य प्रमुख अन्तर्राष्ट्रिय भाषामा सामग्री निर्माण र भ्वाइसओभर सुविधा विस्तार गर्ने योजना बनाएको छ ।

सम्बन्धित समाचार

शव व्यवस्थापनमा सरकार गम्भीर बन्नुपर्छः कुलमान घिसिङ वरिष्ठ सञ्चारकर्मी कुमार यात्रु सम्मानित, पौरखी नेपालको नयाँ अध्यक्षमा सिन्धु भोटेकोशी बाढीपीडितका लागि युरोपको ट्रिप इन होटल समूहले दियो ५१ लाख रुपैयाँ जेनजी सहिद परिवारका शिक्षा र स्वास्थ्यको सारथि सशस्त्र प्रहरीमा ठूलो संख्यामा खुल्यो नयाँ भर्ना रोलिङ नेक्सस २३औँ वर्षमा प्रवेश, मानव संसाधन क्षेत्रमा सेवा विस्तार राहत कोषमा प्याब्सनको १२ करोड सहयोग, काठमाडौं प्यबसनबाट ४ करोड रुपैयाँ माथिल्लो त्रिशूली–१ को सुरूङमा थप ७ शव फेला