भद्रपुर (झापा) । नेपाल शैक्षिक परामर्श संघ (इक्यान)ले नेपाललाई विदेशी विद्यार्थीको शैक्षिक गन्तव्यका रूपमा विकास गर्ने संकल्पसहित ‘झापा घोषणापत्र २०८३’ जारी गरेको छ ।

झापाको बिर्तामोडमा सम्पन्न शैक्षिक परामर्श संघको तेस्रो संस्करण (लिडर्स मिट)को आज यहाँ समापन कार्यक्रममा १० बुँदे ‘झापा घोषणापत्र’ जारी गर्दै विदेशी विद्यार्थीलाई नेपालमा आकर्षित गर्ने ‘इनबाउन्ड एजुकेसन मोबिलिटी’ (विदेशी विद्यार्थी तथा शोधकर्ताहरूको आगमन) लाई संस्थागत रूपमा अघि बढाउने उल्लेख गरेको छ ।

इक्यानका पूर्वअध्यक्ष शेषराज भट्टराईले नेपाली विद्यार्थीलाई विदेश पठाउने भूमिकासँगै नेपालमा विदेशी विद्यार्थी भित्र्याउने सम्भावनामा पनि काम गर्नुपर्ने बताए । “नेपालमा गुणस्तरीय शैक्षिक संस्था र प्राकृतिक तथा सांस्कृतिक विविधता छन् । यसलाई अन्तरराष्ट्रियस्तरमा प्रवद्र्धन गर्नसके विदेशी विद्यार्थीलाई नेपालमा आकर्षित गर्न सकिन्छ,” उनले भने ।

इक्यानले अन्तरराष्ट्रिय शैक्षिक साझेदारी विस्तार तथा नेपालमा अन्तरराष्ट्रिय शिक्षा बजार विकासका सम्भावनामा काम गर्ने जनाएको छ । कोशी प्रदेशमा विदेशी विद्यार्थी आकर्षित गर्न सकिने सम्भावना रहेको भन्दै अन्तरराष्ट्रिय शैक्षिक संस्था तथा साझेदारसँग सहकार्य विस्तार गर्ने घोषणापत्रमा उल्लेख छ ।

इक्यान केन्द्रका प्रथम उपाध्यक्ष वासुदेव दाहालले शैक्षिक परामर्श क्षेत्रलाई व्यवस्थित, जिम्मेवार र अन्तरराष्ट्रियस्तरमा प्रतिस्पर्धी बनाउने उद्देश्यले घोषणापत्र जारी गरिएको बताए । घोषणापत्रमा विद्यार्थी तथा अभिभावकको सुरक्षा, व्यावसायिक अधिकारको संरक्षण, पारदर्शी नियमन र अन्तरराष्ट्रिय साझेदारीलाई प्राथमिकता दिइएको उनले बताए ।

इक्यानले शैक्षिक परामर्श, भाषा शिक्षण तथा तयारी कक्षा सञ्चालनसम्बन्धी नियमावली, २०८३ का केही प्रावधानप्रति असहमति जनाउँदै सम्बन्धित निकायसँग संवाद र आवश्यक कानुनी प्रक्रिया अघि बढाउने जनाएको छ ।

२ असोजदेखि तीन दिनसम्म सञ्चालन भएको लिडर्स मिटमा देशभरका शाखा प्रमुख, केन्द्रीय नेतृत्व, पूर्वअध्यक्ष, सल्लाहकार तथा सदस्य गरी करिब १५० जनाको सहभागिता थियो । सहभागीबीचको छलफल र सुझावका आधारमा घोषणापत्र तयार गरिएको इक्यान झापाका अध्यक्ष राजकुमार कार्कीले जानकारी दिए ।

सम्बन्धित समाचार

भोटेकोशी बाढी प्रभावित बालबालिकाको शिक्षाका लागि एक अर्ब रुपैयाँको छात्रवृत्ति योजना घोषणा राष्ट्रिय पाठ्यक्रम प्रारूप परिमार्जनका लागि सातै प्रदेशमा सरोकारवालासँग छलफल गरी सुझाव तथा पृष्ठपोषण संकलन गरिने आयुर्वेद तथा वैकल्पिक चिकित्सालयमा अन्तरङ्ग सेवा सुरु गरिँदै विद्यालय शिक्षालाई रोजगारमुखी, प्रयोगात्मक र विद्यार्थीको रुचिमा आधारित बनाउन सुझाव बृहत् आँखा शिविरः एक हजार चार सय लाभान्वित काभ्रेका ३२ जनामा डेङ्गु सङ्क्रमण पुष्टि स्वास्थ्यकर्मीको सुरक्षा सुनिश्चित गर्न ऐन संशोधनको तयारी पार्टी एकताका लागि त्याग गर्न तयार रहेको कोइरालाको सन्देश