काठमाडौं । नेपाली कांग्रेसको १५औँ केन्द्रीय महाधिवेशनअन्तर्गत जारी वडा अधिवेशन प्रक्रिया ६३ जिल्लामा सम्पन्न भएको छ।
कांग्रेस केन्द्रीय कार्यसमितिका अनुसार असोज ५ गतेसम्म ताप्लेजुङदेखि कञ्चनपुरसम्मका ६३ जिल्लामा वडा अधिवेशन सम्पन्न भएको हो। केही जिल्लामा भने अधिवेशन अन्तिम चरणमा पुगेको छ।
धनुषा क्षेत्र नम्बर ४, मोरङ क्षेत्र नम्बर ६, अछामका तीन वडा, नवलपरासी क्षेत्र नम्बर २, डडेल्धुराका चार वडा, रुपन्देहीका तीन वडा, महोत्तरीका आठ वडा, सप्तरी क्षेत्र नम्बर २ र ४, सिरहा, रौतहट क्षेत्र नम्बर १ तथा सर्लाही क्षेत्र नम्बर २ का वडामा अधिवेशन अन्तिम चरणमा रहेको कांग्रेसले जनाएको छ।
त्यस्तै, धादिङ, नुवाकोटसहित असोज ५ गते सम्पन्न हुन बाँकी रहेका वडाको अधिवेशन असोज ६ गते पनि जारी रहनेछ।
कांग्रेसको १५औँ केन्द्रीय महाधिवेशन असोज १६ देखि १९ गतेसम्म आयोजना हुँदैछ।
