धनगढी । सुदूरपश्चिम प्रदेश सरकारले सरकारी अस्पताल तथा स्वास्थ्य संस्थाको ३०० मिटर वरिपरि सञ्चालनमा रहेका निजी स्वास्थ्य संस्थामाथि कडाइ गर्ने भएको छ ।

प्रदेशको सामाजिक विकास मन्त्रालयले सुदूरपश्चिम प्रदेश जनस्वास्थ्य सेवा ऐन, २०७६ को व्यवस्था कार्यान्वयन गर्न स्वास्थ्य निर्देशनालयलाई तत्काल प्रक्रिया अघि बढाउन निर्देशन दिएको छ ।

ऐनअनुसार सरकारी अस्पताल तथा स्वास्थ्य संस्थाको परिसरबाट ३०० मिटरभित्र निजी अस्पताल, क्लिनिक, पोलिक्लिनिक, नर्सिङ होम, प्रयोगशालालगायत स्वास्थ्यसम्बन्धी निजी व्यवसाय सञ्चालन गर्न पाइँदैन ।

तर धनगढीस्थित सेती प्रादेशिक अस्पताल आसपासमै दर्जनौँ निजी स्वास्थ्य संस्था सञ्चालनमा छन् । तीमध्ये कतिपयले आवश्यक अनुमति नलिएको पाइएको छ ।

स्वास्थ्य कार्यालय कैलालीले यसअघि पनि अस्पताल आसपास अनुमति नलिई सञ्चालनमा रहेका स्वास्थ्य संस्थालाई कानुनी दायरामा ल्याउन पहल गरेको थियो । तर ऐनको व्यवस्था प्रभावकारी रूपमा कार्यान्वयन हुन नसकेपछि मन्त्रालयले पुनः कडाइका साथ कार्यान्वयन गर्न निर्देशन दिएको हो ।

अब सेती अस्पताल आसपासमा मात्रै नभई कैलालीसहित सुदूरपश्चिमका अन्य सरकारी अस्पताल तथा स्वास्थ्य संस्थाको ३०० मिटर क्षेत्रभित्र सञ्चालनमा रहेका निजी स्वास्थ्य संस्थाको वैधानिकता जाँच र अनुगमन गरिने भएको छ ।

अनुगमनका क्रममा अनुमति नलिई सञ्चालनमा रहेका वा कानुनविपरीत सञ्चालन भएका स्वास्थ्य संस्थामाथि आवश्यक कारबाही प्रक्रिया अघि बढाइने मन्त्रालयले जनाएको छ ।

सम्बन्धित समाचार

बाजुरा अस्पतालमा बिरामीको चाप बढ्यो दल बदलेपछि बर्दगोरियाका उपाध्यक्ष गिरीको पद गयो धनगढीमा टोल, चोक र सार्वजनिक स्थलको नाम जथाभावी परिवर्तन गर्न रोक स्वास्थ्यकर्मीको सुरक्षा सुनिश्चित गर्न ऐन संशोधनको तयारी ‘प्याब्सन डिजिटल क्विज कन्टेस्ट–२०८३’ हुँदै भारी वर्षाको पूर्वानुमानपछि सुदूरपश्चिममा सुरक्षा संयन्त्र तयारी अवस्थामा देशभरका अस्पताललाई तयारी अवस्थामा रहन स्वास्थ्य मन्त्रालयको निर्देशन त्रिविद्वारा अध्ययन बिदापछि काममा नफर्कने कर्मचारीबाट १६ करोड रुपैयाँ असुल