काठमाडौं । दाङमा आफ्नै साथीले पेट्रोल छर्केर आगो लगाउँदा घाइते भएका ४९ वर्षीय रूपलाल चौधरीको उपचारको क्रममा मृत्यु भएको छ ।
बाँकेको नेपालगञ्जस्थित भेरी अस्पतालमा उपचारको क्रममा उनको आज बिहान ६ बजे मृत्यु भएको जिल्ला प्रहरी कार्यालय दाङका डीएसपी डा. हेमबहादुर केसी जानकारी दिए ।
दाङको राजपुर गाउँपालिका–२ खालगैरास्थित मटेरियाका ४९ वर्षीय रूपलाल चौधरीमाथि उनकै साथी सोही ठाउँ बस्ने ३८ वर्षीय त्रिलोकसिंह कार्कीले शनिबार पेट्रोल छर्केर आगो लगाइदिएका थिए ।
चौधरीमाथि आगो लगाएपछि त्रिलोकसिंह भने फरार भएका थिए । उनीहरू दुवै जना साथी हुन । सँगै बसेर मदिरा सेवन गरेको खुलेको प्रहरीले जनाएको छ । मदिरा सेवनपछि एक अर्काबीच भनाभन भएको समेत खुलेको छ ।
सो क्रममा आफ्नो बाइकमा हाल्नका लागि बोतलमा भरेर ल्याइएको पेट्रोल त्रिलोकसिंहले चौधरीमाथि खनाएर आगो लगाएपछि फरार भएका रहेछन् । फरार भएका त्रिलोकसिंहलाई हिजै दाङको लमही नगरपालिका–५ रातोडाँडाबाट नियन्त्रणमा लिएर अनुसन्धान भइरहेको प्रहरीले जानकारी दिएको छ ।
