स्याङ्जा । स्याङ्जाको फेदिखोला गाउँपालिकामा गए राती (शनिबार) परेको असिनाले करोडौको क्षति भएको छ । गाउँपालिकाको वडा नम्वर १ र ४ मा असिनाले किसानको उव्जनीमा निकै क्षति बनाएको हो ।
असिनाले मौसमी र बेमौसमी तरकारी खेतीसंगै केही पशुपंक्षीमा समेत क्षति बनाएको गाउँपालिका प्रमुख घनश्याम सुवेदीले जानकारी दिए । गतबर्ष भन्दा यो बर्ष कृषि उत्पादन बढ्दो अवस्थामा थियो गाउँपालिका प्रमुख सुवेदीले भने, ‘प्राकृतिक विपतले गाँउपालिकालाई नराम्रो क्षति पु-यायो । नमुना कृषि गाउँको अभियान रहेको गाँउपालिकाले प्राकृतिक विपतको सामाना गर्नुप-यो’ उनले भने ।
गत बर्ष २ करोड बराबरको कृषि क्षेत्रमा कारोबार गरेको पालिकाले यस बर्ष उत्पादनमा आधारित अनुदान कार्यक्रम मार्फत कृषक उत्साहित भएका थिए । ‘मौसमी तथा बेमौसमी तरकारी खेती र पशुपंक्षी पालन गर्ने किसानको संख्या बढ्दो थियो’ गाउँपालिका प्रमुख सुवेदीले भने यो क्षतीले सिङ्गो गाँउपालिका चिन्तित रहेको छ ।’ भारी असिनाले सबै सखाप भएपछि किसान निकै चिन्तित बनेको बताइएको छ ।
यस बर्ष गाउँपालिकाले गत बर्षको तुलनामा ३० प्रतिशत उत्पादनमा बृद्धी गर्ने लक्ष्य बोकेको थियो तर असिनाले सबै लक्ष्य उडाइदिएको छ । स्थानीय कुमार सुवेदीले व्यवसायका लागि संचालन गरेको पोल्र्टी फार्ममा समेत असिनाले क्षति पु-याएको छ । भर्खरै स्थापना गरेको पोल्र्टी फर्ममा असिनाको असरले १२०० कुखुराको चल्लालाई क्षती पु-याएपछी फर्मका संचालक कुमार सुबेदीले दुखी बनेका छन् । बैदेशिक रोजगारी छाडेर आफ्नै माटोमा केही गर्छु भन्ने उदेश्यले शुरु गरेको पोल्र्टीफार्ममा असिनाले क्षती पु-याएपछि प्राकृतिकले पनि साथ नदिएको गुनासो व्यक्त गरे ।
असिनाले केही बाख्रा मरेको खबर प्राप्त भएको छ । यसैगरी नमुना कृर्षि गाउँको अभियानमा लागेको वडा नं १ को तरकारी बारी पनि असिनाले नष्ट भएको छ । ‘मौसमी तथा बेमौसमी तरकारी खेतीलाई असिनाले सखाप बनायो सिङ्गो गाउँबासीमानै रुवाबास मच्चिएको छ अगुवा कृषक बिष्णु सुबेदीले बताए । टमाटर, काउली, बन्दा, लसुन र आलुमा ठुलो क्षति भएको सुबेदीले जानकारी दिए । यहाँको वडा नं ४ आरुखर्क र १ नं वडामा सबैभन्दा बढी क्षती भएको छ भने २ र ३ नं वडामा भने आशिंक क्षति भएको छ । अहिले सम्म करिव ६ करोड भन्दा बढीको क्षती भएको अनुमान गरिएको छ । असिनाले गाँउपालिकामा कति रकम बराबरको क्षती भएको छ भन्ने विषयमा विवरण संकलन कार्य चलिरहेको बताइएको छ ।
