धनगढी । ऐनविपरीत प्रयोग भइरहेका सरकारी गाडी सुदूरपश्चिम प्रदेश संसदीय दलका तीनै नेताले फिर्ता गरेका छन् । प्रदेशसभाको सार्वजनिक लेखा समितिले सरकारी गाडी फिर्ता गराउन सचिवालयलाई निर्देशन दिएपछि तीनवटै गाडी फिर्ता आएका हुन् ।
सत्ता पक्षबाट संसदीय दलको नेताको हैसियतले माओवादी केन्द्रका नेता खगराज भट्टले सुदूरपश्चिम प्रदेश ०१००१ झ ०४३४, एकीकृत समाजवादी पार्टीका तर्फबाट प्रदेश संसदीय दलका नेता दीर्घबहादुर सोडारीले से१झ २७६ र नागरिक उन्मुक्ति पार्टीबाट संसदीय दलका नेता घनश्याम चौधरीले से१झ ३०९ नम्बरको सरकारी गाडी प्रयोग गर्दै आएका थिए ।
नागरिक उन्मुक्ति पार्टीबाट संसदीय दलका नेता चौधरीले प्रयोग गर्दै आएको गाडी केही दिनपहिला फिर्ता गरेका हुन् भने भट्ट र सोडारीले ढिलो गरी फिर्ता गरेका छन् ।
प्रदेशसभाका पदाधिकारी तथा सदस्यहरूको पारिश्रमिक तथा सेवा सुविधासम्बन्धी ऐनको पहिलो संशोधन २०७९ को दफा ६ को उपदफा १ ले सत्तारूढ दलका नेतालाई गाडी सुविधा हुने व्यवस्था गरेको थियो । तर, अनुसूची १ बमोजिम सुविधा उपलब्ध गराउनुपर्ने भनिए पनि अनुसूचीमा सो व्यवस्था राखिएको थिएन । सोही कारण प्रदेशको सार्वजनिक लेखा समितिले कानुनविपरीत प्रयोग गरिरहेका सरकारी गाडी फिर्ता गर्न निर्देशन दिएको थियो ।
