भैंसीलाई संसारमा कालो मोतीका रूपमा लिन थालिएको छ । मोतीको भन्दा कम मूल्य छैन यिनीहरूको ! संसारमा कालो मोतीका रूपमा चिनिने भैंसीको पनि नयाँनयाँ रेकर्ड कायम भएका छन् । पशु जगतमा यो नौलो कुरा भने होइन । पछिल्लो रेकर्डअनुसार भारतमा एउटा भैंसी ५१ लाखमा खरिद बिक्री गरिएको छ ।
भारतको हरियानामा यो कारोबार भएको हो । यसको नेपाली रुपैयाँ ८१ लाख ६० हजार हुन आउँछ । तर, यो भैंसीको अहिले १ करोडभन्दा बढी मूल्य तोकिएको छ । सरस्वती नाम दिइएको सो भैंसीलाई पछिल्लोपटक भारत लुधियानाको जगराँवमा आयोजित डेरी एन्ड एग्रो प्रदर्शनीमा लगिएको थियो ।
सो भैंसीले प्रतिस्पर्धात्मक प्रतियोगितामा ३३ दशमलव १३१ किलो दूध दिएर संसारलाई अचम्म बनाएको छ । प्रतियोगितामा विश्वमै प्रथम घोषणा भएपछि सरस्वतीले भारतीय २ लाख रुपैयाँ पुरस्कार जितेको थियो, अर्थात् नेपाली रुपैयाँ ३ लाख ८० हजार !
यससँगै पहिले कायम रहेको संसारको सबैभन्दा बढी दूध दिने पाकिस्तानी भैंसीको रेकर्ड तोडिएको छ । पाकिस्तानको भैंसीले ३२ दशमलव शून्य ५० किलो दूध दिएर सो रेकर्ड कायम गरेको थियो ।
गत वर्ष भारतको हिसार क्षेत्रमा आयोजित प्रतियोगितात्मक मेलामा सरस्वती नामको सो भैंसीले २९ दशमलव ३१ किलो दूध दिएर प्रथम पुरस्कार हासिल गरेको थियो । त्यस्तै, हिसारमै गरिएको केन्द्रीय भैंसी अनुसन्धान इन्स्टिच्युटमा भैंसी अनुसन्धान कार्यक्रममा २८ दशमलव ८ किलो दूध दिएर सो भैंसीले पुरस्कार जितेको थियो ।
यो मूर्रा जातको भैंसी हो । मूर्रा जातको भैंसीलाई अहिले संसारमा सबैभन्दा बढी दुधालु भैंसीका रूपमा लिइन्छ । भारतले यस जातको भैंसीमा ‘प्याटेन्ट राइट’को स्वामित्व लिन पनि पहल गरिरहेको छ ।
