डडेल्धुरा । डडेल्धुरामा पहिलो पटक सुदूरपश्चिम प्रदेशस्तरीय १६औं राष्ट्रपति रनिङ शिल्ड प्रतियोगिता सुरु भएको छ । तीन दिनसम्म सञ्चालन हुने प्रतियोगितामा सुदूरपश्चिमका नौ वटै जिल्लाका माध्यमिक तहका विद्यार्थी खेलाडीहरूको सहभागिता रहेको छ ।

जिल्ला सदरमुकाम स्थित अमरगढी नगरपालिका ४ तल्लो खलंगाको टेडीखेलामा ओजित प्रतियोगिताको नगबिहीबारसुदूरपश्चिम प्रदेश सरकारका सामाजिक विकास मन्त्री मेघराज खड्काले दीप प्रज्वलन गर्दै प्रतियोगिताको उद्घाटन गरे

उद्घाटन कार्यक्रममा बोल्दै मन्त्री खड्काले प्रतियोगिता पहिलो पटक डडेल्धुरामा आयोजना हुनु पहाडी जिल्लाका लागि सकारात्मक सुरुवात भएको बताए । उनले विगतमा अधिकांश प्रदेशस्तरीय खेल प्रतियोगिता कैलाली र कञ्चनपुरमै सीमित हुने गरेको उल्लेख गर्दै अब अन्य पहाडी जिल्लाले पनि यस्ता प्रतियोगिता आयोजना गर्न सक्ने वातावरण बनेको बताए ।

तराईमा अहिले ४५ डिग्रीसम्म तापक्रम पुगेको छ । यस्तो अवस्थामा डडेल्धुराजस्तो शितल ठाउँमा प्रतियोगिता आयोजना हुनु भविष्यका लागि राम्रो संकेत हो, उनले भने ।

मन्त्री खड्काले सुदूरपश्चिम प्रदेश सामाजिक सूचकांकमा अझै पछाडि रहेको स्वीकार गर्दै प्रदेश खेलकुदमा भने निकै अगाडि रहेको दाबी गरे । उनले सुदूरपश्चिममा गरिबी, शिशु मृत्युदर, मातृ मृत्युदर र बाल मृत्युदर उच्च भए पनि खेलकुद क्षेत्रमा सुदूरपश्चिमले देशमै पहिचान बनाएको उल्लेख गरे ।

हामी एउटै कुरामा धनी छौं, त्यो हो खेलकुद र खेलाडी, उनले भने, सुदूरपश्चिमका खेलाडीले देशकै लागि खेलेका छन् । क्रिकेटमा दीपेन्द्रसिंह ऐरीले राष्ट्रिय टोलीको नेतृत्व गरिरहनुभएको छ भने तेक्वान्दोमा दीपक बिष्टले इतिहास बनाउनु भएको छ ।

उनले भलिबल, एथलेटिक्सलगायत विभिन्न खेलमा पनि सुदूरपश्चिमका खेलाडीले राष्ट्रिय तथा अन्तराष्ट्रिय स्तरमा सफलता हासिल गरेको उल्लेख गर्दै खेलकुदको विकाससँगै समग्र प्रदेशको विकास जोडिएको बताए ।

यद्यपि पर्याप्त बजेट अभावका कारण खेल पूर्वाधार निर्माण र खेलाडी व्यवस्थापनमा समस्या रहेको उनको भनाइ थियो । प्रदेश सरकारका प्राथमिकतामा कृषि, शिक्षा, स्वास्थ्य, सडक, खानेपानी र सिँचाइ जस्ता क्षेत्र पर्ने भएकाले खेलकुदले अपेक्षित प्राथमिकता पाउन नसकेको उहाँले स्वीकार गरे ।

सुदूरपश्चिम प्रदेश खेलकुद परिषद्का सदस्य सचिव लोकराज खड्काले पनि बजेट अभावकै कारण प्रतियोगिता आयोजना गर्न चुनौती हुने गरेको बताए । उनका अनुसार फागुनमै सम्पन्न हुनुपर्ने प्रतियोगिता बजेट निकासा ढिलो हुँदा जेठमा गर्नु परेको हो ।

वर्षको अन्तिममा मात्रै बजेट आउँछ, त्यो पनि पर्याप्त हुँदैन, उनले भने, कुल बजेटको कम्तीमा एक प्रतिशत खेलकुद क्षेत्रमा छुट्याइए खेलाडी पलायन हुने अवस्था अन्त्य हुन सक्छ ।

डडेल्धुरा खेलकुद समितिका अध्यक्ष जगत ऐरले खेलकुदलाई सरकारले पर्याप्त प्राथमिकता दिनुपर्नेमा जोड दिए । खेलकुदको विकासले पर्यटन, कृषि र सामाजिक क्षेत्रमा समेत सकारात्मक प्रभाव पार्ने उनको भनाइ थियो ।

प्रतियोगिता टुँडिखेल, कभर्डहल, धोबीखोला सुन्धारा मैदान तथा वडा नं. ५ मा रहेको महेन्द्र माविको मैदानमा सञ्चालन भइरहेको छ ।

सुदूरपश्चिमका नौ वटै जिल्लाबाट आएका करिब एक हजार खेलाडी, प्रशिक्षक, रेफ्री तथा खेलप्रेमीहरूको उपस्थितिले अहिले डडेल्धुराको वातावरण खेलमय बनेको छ । जेठ १६ गतेसम्म सञ्चालन हुने प्रतियोगिताले जिल्लामा खेलकुदसँगै उत्साह र चहलपहल थपिएको स्थानीयको भनाइ छ ।

सम्बन्धित समाचार

फुटबल महाकुम्भ ‘फिफा विश्वकप २०२६’ : उद्घाटन खेलमा मेक्सिको र दक्षिण अफ्रिका भिड्दै प्रथम छायाँनाथ अल्ट्रा रेसमा धीरबहादुर र सुनमाया प्रथम रानीसैन संरक्षणका लागि संघीय सरकारलाई मेयर हमालको आग्रह काभा महिला भलिबल: नेपालकाे सामना गर्दै भारत भीमनारायण गोल्डकपः आयोजक सेमिफाइनलमा भागेश्वरमा विद्युतीकरणको काम अलपत्र, अन्धकारमै दुर्गम बस्ती चीनलाई १९ रनले पराजित गर्दै नेपालको विजयी सुरुवात भीमनारायण गोल्डकपको दोस्रो सेमिफाइनल खेल आज