काठमाडौं । प्रधानमन्त्री वालेन्द्र शाह (बालेन) ले असोज ८ गते संयुक्त राष्ट्रसंघको ८१औँ महासभामा सम्बोधन गर्ने तय भएको छ । नेपालको अनुरोधपछि संयुक्त राष्ट्रसंघले वक्ताहरूको सूची संशोधन गरी प्रधानमन्त्री शाहलाई उक्त दिन महासभामा सम्बोधनको समय तोकेको हो ।

न्यूयोर्कस्थित नेपाली नियोगले परराष्ट्र मन्त्रालयमार्फत पठाएको संशोधित तालिका प्रधानमन्त्री सचिवालयमा पुगेको छ । त्यसअनुसार अमेरिका भ्रमणको तयारी अगाडि बढाइएको छ ।

परराष्ट्र मन्त्रालयका एक अधिकारीका अनुसार न्यूयोर्कस्थित नेपाली नियोगबाट प्रधानमन्त्रीको सम्बोधन असोज ८ अर्थात् सेप्टेम्बर २४ मा तोकिएको जानकारी प्राप्त भएको छ । यससँगै मन्त्रालयले उक्त जानकारी प्रधानमन्त्री कार्यालयमा पठाइसकेको छ ।

अहिलेसम्म न्यूयोर्कस्थित संयुक्त राष्ट्रसंघीय मुख्यालयमा हुने ८१औँ महासभामा ११८ देशका प्रतिनिधिहरू सम्बोधनका लागि सूचीकृत भइसकेका छन् । अधिकांश वक्ता राष्ट्रप्रमुख, सरकारप्रमुख वा परराष्ट्रमन्त्री नै रहने अपेक्षा गरिएको छ ।

परराष्ट्र मन्त्रालय र प्रधानमन्त्री सचिवालयका अधिकारीहरूका अनुसार भोटेकोशी विपद्पछि प्रधानमन्त्री शाह आफैं महासभामा सम्बोधन गर्न जाने तयारी भएको हो । यसअघि परराष्ट्रमन्त्री शिशिर खनालले नेपाली प्रतिनिधिमण्डलको नेतृत्व गरी सम्बोधन गर्ने तयारी गरिरहेका थिए । प्रधानमन्त्री शाहले विशेषगरी विश्वव्यापी तापक्रम वृद्धिसँग जोडिएका विपद्प्रति नेपालको संवेदनशीलतालाई ध्यानमा राख्दै क्षतिपूर्ति र जलवायु न्यायका विषय उठाउने अपेक्षा गरिएको छ ।

भोटेकोशी विपद्पछिको उद्धार तथा राहत कार्य जारी रहेकाले अमेरिका भ्रमणलाई सकेसम्म छोटो राखिने अधिकारीहरूले बताएका छन् । न्यूयोर्क बसाइका क्रममा प्रधानमन्त्रीले कतिवटा द्विपक्षीय तथा अन्य साइडलाइन बैठकमा सहभागी हुने भन्ने अहिलेसम्म टुंगो लागिसकेको छैन ।

यो प्रधानमन्त्री बनेपछि शाहको पहिलो विदेश भ्रमण हुनेछ । प्रधानमन्त्री बनेयता उनले कुनै पनि देशका राष्ट्रप्रमुख वा सरकारप्रमुखसँग प्रत्यक्ष भेट गरेका छैनन् । न्यूयोर्कमा रहँदा सम्भव भएसम्म अमेरिका, चीन र भारतका नेताहरूसँगको भेटलाई प्राथमिकता दिने अपेक्षा गरिएको छ । तर भारतीय प्रधानमन्त्री नरेन्द्र मोदीसँग महासभामा जाने अझै निश्चित छैन ।

त्यस्तै चिनियाँ राष्ट्रपति सी जिन्पिङ सेप्टेम्बर २३ देखि २५ सम्म अमेरिकाको औपचारिक भ्रमणमा रहने भए पनि महासभामा सहभागी हुने तालिका छैन। त्यसैले न्यूयोर्कमा छिमेकी भारत र चीनका सरकार प्रमुखसँग शाहको भेट असम्भवप्रायः देखिएको छ ।

प्रधानमन्त्री सहभागी हुने भएपछि परराष्ट्रमन्त्री खनाल प्रतिनिधिमण्डलका सदस्यका रूपमा रहनेछन् । परराष्ट्र मन्त्रालयका अधिकारीका अनुसार अहिलेसम्मको अवस्था हेर्दा प्रधानमन्त्री शाहले महासभामा सम्बोधन गरेर फर्कने र परराष्ट्रमन्त्री खनालले अन्य द्विपक्षीय तथा साइडलाइन बैठकहरूको नेतृत्व गर्ने देखिन्छ।

प्रधानमन्त्री कार्यालयका स्रोतअनुसार शाहको भ्रमण दलमा प्रमुख सल्लाहकार कुमार बेन, निजी सचिव सुवास शर्मा, निजी सचिव प्रदीप परियार र फोटोग्राफर विनय शाक्य समावेश हुनेछन् । परराष्ट्र सचिव अमृतबहादुर राई, परराष्ट्र मन्त्रालयको संयुक्त राष्ट्रसंघीय मामिला महाशाखा प्रमुख कृष्णप्रसाद ढकाल र अधिकारी कुमारराज खरेल पनि प्रधानमन्त्रीको प्रतिनिधिमण्डलमा रहने अपेक्षा गरिएको छ । न्यूयोर्कस्थित संयुक्त राष्ट्रसंघका लागि नेपालको स्थायी नियोग प्रमुख लोकबहादुर थापा प्रतिनिधिमण्डलका सदस्यका रूपमा महासभामा सहभागी हुनेछन् ।

सम्बन्धित समाचार

पर्यटन विधेयकमा आरोहीको बीमादेखि ‘फेक रेस्क्यु’ नियन्त्रणसम्मका सुझाव संघीय संसद्का दुवै सदनको बैठक बस्दै, यस्ता छन् सम्भावित कार्यसूची बाढीको कारण हिउँ–चट्टानको हिमपहिरो, ल्यान्डस्लाइड ड्याम सम्बन्धमा अनुसन्धान जारी प्राकृतिक सौन्दर्यले पर्यटक लोभ्याउँदै ‘अरुण डाँडा’ राजर्षिजनक विश्वविद्यालयका पदाधिकारी तथा कर्मचारीले प्रधानमन्त्री दैवी प्रकोप उद्धार कोषमा रकम जम्मा गर्ने संयुक्त राष्ट्रसंघीय महासभामा सहभागी हुन प्रधानमन्त्री शाह न्युयोर्क जाने त्रिशूली–३ ‘ए’ जलविद्युत् आयोजनाको सुरुङभित्रबाट उद्धार गरिएका महर्जनको अवस्था जटिल कृष्णभीरमा खोलिएको ‘ट्र्याक’ लाई फराकिलो बनाइँदै