धनगढी । आइतबारदेखिको अविरल वर्षासँगै विभिन्न स्थानमा पहिरो, नदी कटान तथा खोलामा पानीको सतह बढेपछि सुदूरपश्चिम प्रदेशका प्रमुख राजमार्ग तथा सडकखण्डको यातायात प्रभावित भएको छ । प्रदेशका विभिन्न जिल्लामा सडक अवरुद्ध हुनुका साथै कतिपय सडकखण्डमा एकतर्फी तथा जोखिमपूर्ण रूपमा यातायात सञ्चालन भइरहेको छ ।

सुदूरपश्चिम प्रदेश प्रहरी कार्यालय धनगढीले सार्वजनिक गरेको विवरणअनुसार कञ्चनपुर, बैतडी, बझाङ, बाजुरा, डडेल्धुरा र कैलालीका विभिन्न सडकखण्डमा वर्षाका कारण समस्या देखिएको छ । कञ्चनपुरको भीमदत्त नगरपालिका–९, खल्ला मस्टेटीस्थित महाकाली करिडोरमा भीषण पहिरो खसेपछि सडक पूर्ण रूपमा अवरुद्ध भएको छ ।

यस्तै, बैतडीको सिगास–सुर्नया गाउँपालिका–२, लिम्किटा क्षेत्रमा पहिरो खसेपछि सतबाँझ–श्रीभावर सडकखण्ड अवरुद्ध भएको थियो। पहिरो पन्छाएपछि सडक सञ्चालनमा ल्याइएको जिल्ला प्रहरी कार्यालय बैतडीका सूचना अधिकारीले जानकारी दिएका छन् ।

कैलालीको भजनी नगरपालिका–७, हिक्मतपुरस्थित हुलाकी सडकखण्डमा वर्षाका कारण ढलेका रुख हटाएर यातायात सञ्चालनमा ल्याइएको छ । कञ्चनपुरको वेदकोट नगरपालिका–३ र ४ जोड्ने चौधर नदीको झोलुंगे पुल नदी कटानका कारण भासिएपछि आवतजावत पूर्ण रूपमा बन्द गरिएको छ ।

बझाङको बित्थडचिर गाउँपालिका–२, लिमस्थित जयपृथ्वी राजमार्गमा पहिरो खसेपछि जेसीबी प्रयोग गरी पहिरो पन्छाउने काम भइरहेको जिल्ला प्रहरी कार्यालय बझाङले जनाएको छ ।

बाजुराको मार्तडी–अछाम (साँफेबगर) सडकखण्डका विभिन्न स्थानमा पहिरो खसेका कारण सडक पूर्ण रूपमा सञ्चालनमा आउन सकेको छैन । सडक खुलाउन जेसीबीमार्फत पहिरो पन्छाउने काम भइरहेको जिल्ला प्रहरी कार्यालय बाजुराले जनाएको छ ।

यस्तै, डडेल्धुराको आलिताल गाउँपालिका–८, सुनखोलास्थित जोगबुढा–बुडर सडकखण्डमा पहिरो खसेपछि दुईतर्फी यातायात अवरुद्ध भएको छ । सडकमा दुई–तीन वटा सवारीसाधन जाममा रहेका छन् । भंगाडी खोलामा पानीको सतह बढेका कारणसमेत सडक अवरुद्ध भएको प्रहरीले जनाएको छ । अहिले जेसीबीमार्फत सडक सफा गर्ने काम भइरहेको छ भने प्रहरी टोलीसमेत परिचालन गरिएको छ ।

अविरल वर्षाका कारण सुदूरपश्चिमका सडक तथा राजमार्गमा पहिरो र बाढीको जोखिम कायमै रहेकाले प्रहरीले यात्रु तथा सवारी चालकलाई आवश्यक सावधानी अपनाउन आग्रह गरेको छ । यात्रा गर्नुअघि सम्बन्धित सडकखण्डको पछिल्लो अवस्था बुझेर मात्र यात्रा गर्नसमेत प्रहरीले अनुरोध गरेको छ ।

सुदूरपश्चिमका विभिन्न भूभागमा वर्षा भइरहेको छ । वर्षा आगामी तीन दिनसम्म कायमै रहने सम्भावना रहेको जल तथा मौसम विज्ञान कार्यालय अत्तरियाले जनाएको छ ।

कार्यालय प्रमुख इञ्जिनियर सञ्जयकुमार साहका अनुसार मौसम पूर्वानुमानअनुसार सोमबारदेखि २४ गतेसम्म हिमाल, पहाड र तराईका अधिकांश भूभागमा मौसम साधारणतया बदली रहनेछ । यस अवधिमा विभिन्न स्थानमा मेघगर्जन र चट्याङसहित मध्यम वर्षाको सम्भावना छ ।

सम्बन्धित समाचार

बाजुराको सरकारी टोली बडीमालिका प्रस्थान बडीमालिका क्षेत्रमा पुग्यो टेलिफोन र इन्टरनेट सेवा विपद्मा धनगढीको ऐक्यबद्धतास् बाढीपीडितका लागि ४१ लाख सहयोग पहिराले साँफे–मार्तडी सडकखण्ड अवरुद्ध कञ्चनपुरका नदी तटीय क्षेत्रका बासिन्दालाई सतर्क रहन आग्रह सुदूरपश्चिममा अझै तीन दिन वर्षाको सम्भावना, सतर्कता अपनाउन आग्रह बाजुरामा पहिरोले सडक र विद्युत् अवरुद्धः जनजीवन प्रभावित महाकालीमा पानीको बहाव बढ्यो, बनवासा पुलमा आवागमन प्रभावित