काठमाडौं । नेपाल वायुसेवा निगमले मलेसियाको क्वालालम्पुरमा बिना प्रतिस्पर्धा क्रु ट्रान्सपोर्टेसन सेवा प्रदायक छनोट गरेको तथ्य फेला परेको छ । प्रतिस्पर्धा बिनै सेवा प्रदायक छानेको निगमले सम्झौताको म्याद सकिएपछि पनि पुरानै कम्पनीबाट विना सम्झौता सेवा लिइरहेको पाइएको हो ।

नेपाल वायुसेवा निगमले मलेसियाको क्वालालम्पुरमा चालक दलका सदस्य (क्रु मेम्बर) राख्ने होटेल छनोटमा साढे चार करोडको अनियमितता गरेको विषयमा राजधानी दैनिकले यसअघि समाचार प्रकाशन गरेको थियो ।

क्रु मेम्बर राख्ने होटेलसँग गरिएको शंकास्पद सम्झौतासँगै निगमको अपरेसन विभागका निर्देशककै पहलमा क्रु ट्रान्सपोर्ट सेवामा समेत मनपरी गरेको पाइएको हो ।

– म्याद सकिएपछि पनि सम्झौता बिनै निरन्तर सेवा

– अख्तियार र निगमले छानबिनको दायरामा राखेका निर्देशकलाई ७ वर्षपछि अर्को सम्झौताको जिम्मा

नेपाल वायुसेवा निगमले बनाएको छानबिन समितिले नै होटेल छनोटसँगै जोडिएको क्रु ट्रान्सपोर्टेसन सेवा प्रदायक छनोट बिना प्रतिस्पर्धा गराइएको र र सम्झौताको म्याद सकिएपछि पनि पुरानै कम्पनीबाट विना सम्झौता सेवा लिइरहेको उल्लेख गरेको छ ।

क्रु टा्रन्सपोर्टेसन छनोटको विवादित सम्झौतामा हस्ताक्षर गर्ने निगमका तत्कालीन अपरेसन विभाग निर्देशक वरिष्ठ पाइलट सुवास रिजाल हुन् । निगमले त्यस बेलाकै विवादित निर्देशक रिजाललाई पुनः सोही विभागको जिम्मेवारी दिएर क्वालालम्पुरमा क्रु मेम्बर र क्रु ट्रान्पोर्टेसन छनौटका लागि टेन्डर प्रक्रिया अघि बढाउने जिम्मेवारी दिएको छ ।

अघिल्लो अनियमिततामा निगमकै छानबिन समिति, पर्यटन मन्त्रालय र अख्तियार दुरुपयोग अनुसन्धान आयोगसमेतले प्रश्न उठाएका थिए । तर कुनै कारबाही नहुँदै उनकै समन्वयमा फेरि उस्तै प्रकृतिको सम्झौता अघि बढाइएको छ ।

निगमको छानबिन उपसमितिको प्रतिवेदनअनुसार निगमले क्रु ट्रान्सपोर्टेसनका लागि ‘प्यासिफिक लिमो सर्भिस’सँग १ अगस्ट २०१५ देखि ३१ जुलाई २०१७ सम्मका लागि सम्झौता गरेको थियो ।

प्रतिवेदनले बिना प्रतिस्पर्धा सेवा प्रदायक छनौट भएको भन्दै सम्झौता गर्ने पदाधिकारीले खरिद प्रतिस्पर्धा सम्बन्धी कुनै पनि कागजात उपलब्ध गराउन नसकेको प्रतिवेदनमै उल्लेख गरेको छ ।

उक्त सम्झौताको अवधि ३१ जुलाई २०१७ मै समाप्त भइसकेको तर, म्याद सकिएपछि पनि क्रु ट्रान्सपोर्टको सेवा पुरानै दरमा सोही कम्पनीबाट निरन्तर लिइरहेको प्रतिवेदनमा उल्लेख छ ।

प्रक्रियागत रूपमा नयाँ खरिद प्रक्रिया वा सम्झौता नवीकरण नगरी विना प्रतिस्पर्धा पुरानै प्रदायकलाई सेवा दिन लगाउनु सार्वजनिक खरिद प्रक्रियाको गम्भीर उल्लंघन हो ।

यो अनियमितता होटेल छनोट प्रक्रियासँग पनि प्रत्यक्ष जोडिएको छ । रिक्वेस्ट फर प्रपोजल (आरएपपी) सम्झौताको बुँदा २(डी) (४) मा होटेलको कोठा शुल्कमै चालक दलको यातायात व्यवस्था अर्थात् क्रु ट्रान्सपोर्ट समेत समावेश हुनुपर्ने प्रावधान राखिएको थियो । तर, छनोटमा परेको सेरी प्यासिफिक होटेलले यातायात शुल्क समावेश नगरे पनि उसैलाई छनोट गरिएको थियो । यो कार्यलाई समितिले समग्र खरिद र मूल्यांकन प्रक्रियामै मिलेमतो भएको आशंका गरेको छ ।

सात वर्षअघि भएको यो विवादित सम्झौतामा तत्कालीन अपरेसन विभाग निर्देशक वरिष्ठ पाइलट सुवास रिजाललगायतको संलग्नता रहेको भन्दै अख्तियार दुरुपयोग अनुसन्धान आयोगमा साढे ४ करोड अनियमितताको उजुरी परेको थियो ।

२८ असार २०७८ मा दर्ता भएको उजुरीका आधारमा अख्तियारले छानबिन गर्न पर्यटन मन्त्रालयलाई पत्राचार गरेपछि निगमकै उपसमितिले सम्झौतामा गम्भीर लापरबाही भएको प्रतिवेदन बुझाएको थियो ।

प्रतिवेदनमा आरएफपी जारी हुनुभन्दा झन्डै साढे दुई महिना अघि नै होटेलले सम्झौतामा हस्ताक्षर गरिसकेको र निगमका तर्फबाट तत्कालीन अपरेसन निर्देशक रिजालले करिब १६ महिनापछि (११ नोभेम्बर २०१८ मा) मात्र हस्ताक्षर गरेको औँल्याइएको छ ।

तर, अख्तियार र सरोकारवाला निकायले यति गम्भीर अनियमिततामाथि कारबाही गर्नुको सट्टा गुपचुप राख्दै फाइल तामेलीमा पठाएका छन् । त्यस्तो विवादित खरिद प्रक्रियाका नेतृत्वकर्तालाई नै निगम व्यवस्थापनले अहिले फेरि नयाँ होटेल छनोटको जिम्मा दिएको छ । कोभिड–१९ पछि नियमित उडान सुरु हुँदा औपचारिक सम्झौताविना नै ग्रान्ड इन्टरकन्टिनेन्टल होटेलमा चालक दल राख्दै आएको निगमले हाल नयाँ प्रक्रिया अघि बढाएको छ । अहिले पनि अपरेसन विभागको नेतृत्व उनै रिजालले गरिरहेका छन् र उनकै नेतृत्वमा गत ५ जुन २०२६ (२२ जेठ) मा क्वालालम्पुरमा होटेल छनोटका लागि सिलबन्दी कोटेसन आह्वान गरिएको छ ।

सम्बन्धित समाचार

धादिङको परेवाटार–मास्टार सडकमा एकतर्फी यातायात सञ्चालन बाढीले बगाएका गरगहना कसैलाई थाहा नदिई घरमा राखे, अहिले छन् प्रहरीको हिरासतमा इटहरीमा मोटरसाइकल दुर्घटना हुँदा सीडीओका स्वकीय सचिवसहित दुई जनाको मृत्यु कहाँ गए जितेन्द्र खड्का ? तनावमा परिवार भोटेकोशी बाढीले खोसेको खुसी : तीजको संघारमा रित्तिएका काख र सुनसान आँगन अर्थमन्त्री डा. वाग्ले र भारतीय समकक्षी निर्मला सीतारमणबीच भेटवार्ता भोटेकोशी बाढीपछि क्रमशः लयमा फर्कँदै पर्यटन नेपाल वायुसेवा निगममा अनियमितता: ७ वर्ष अघि नै विवादित निर्देशकलाई फेरि होटल छनोटको जिम्मा