धनगढी । बजेटविहीन भएको झण्डै तीन महिनापछि सुदूरपश्चिम प्रदेश सरकारले चालु आर्थिक वर्ष २०८३/८४ को बजेट प्रदेशसभामा प्रस्तुत गरेको छ । आर्थिक मामिलामन्त्री चक्रबहादुर मल्लले आइतबार ३७ अर्ब ७० करोड ३९ लाख ६६ हजार रुपैयाँको बजेट प्रस्तुत गरेका हुन् ।

तत्कालीन नेपाली कांग्रेस नेतृत्वको सरकारले गत असार १ गते प्रस्तुत गरेको बजेटकै आकारमा नयाँ सरकारले बजेट ल्याएको हो । बजेटसम्बन्धी विवाद र सरकार परिवर्तनका कारण अघिल्लो बजेट पारित हुन सकेको थिएन ।

आइतबारको प्रदेशसभा बैठकले अघिल्लो सरकारले पेस गरेका विनियोजन विधेयक र आर्थिक विधेयक फिर्ता लिने प्रस्ताव स्वीकृत गरेपछि नयाँ बजेट प्रस्तुत गरिएको हो ।

मन्त्री मल्लले प्रस्तुत गरेको बजेटमा चालु र पुँजीगत खर्चतर्फको छुट्टाछुट्टै रकम भने खुलाइएको छैन ।

बजेटका लागि आन्तरिक राजस्वबाट १ अर्ब ७२ करोड रुपैयाँ प्राप्त हुने अनुमान गरिएको छ ।

त्यस्तै, नेपाल सरकारबाट राजस्व बाँडफाँडबापत १० अर्ब २४ करोड ९२ लाख ६५ हजार, वित्तीय समानीकरण अनुदानबाट ९ अर्ब ६ करोड ३३ लाख, समपूरक अनुदानबाट ३८ करोड ८० लाख, ससर्त अनुदानबाट ६ अर्ब ३ करोड ५८ लाख, विशेष अनुदानबाट ५२ करोड ७६ लाख र रोयल्टी बाँडफाँडबाट ७ करोड रुपैयाँ प्राप्त हुने अनुमान गरिएको छ ।

मन्त्री मल्लले गत वर्षको बचत ९ अर्ब ६५ करोड रुपैयाँ रहेको उल्लेख गरेका छन् । तर, आर्थिक मामिला मन्त्रालयका अनुसार यथार्थ बचत ४ अर्ब ७४ करोड रुपैयाँ मात्रै छ । यसले प्रदेश सरकारले प्रस्तुत गरेको बजेटमा स्रोत व्यवस्थापनसम्बन्धी प्रश्न उठाएको छ ।

यसैगरी, प्रदेश सरकारले स्थानीय तहलाई वित्तीय हस्तान्तरण गर्न ४ अर्ब ३७ करोड ६८ लाख रुपैयाँ विनियोजन गरेको मन्त्री मल्लले जानकारी दिए ।

सम्बन्धित समाचार

डडेल्धुरामा जंगलमा प्रहरी जवान मृत फेला कैलालीमा विद्यालयमै जातीय विभेद गरेको आरोपमा तीन शिक्षक पक्राउ भारतको धौलीगंगा बाँध खोलिँदै, महाकाली तटीय क्षेत्रमा सतर्क रहन आग्रह चामेमा थुनिएको मर्स्याङ्दी नदी मंगलबार नेपाली सेनाले खोल्ने यस्ता छन्– मन्त्रिपरिषद्को ६ निर्णय अध्ययन बिदा दुरुपयोग सम्बन्धमा कृषि तथा वन विज्ञान विश्वविद्यालयमा छानबिन समिति गठन १० वर्षपछि फुक्यो निजामती कानुनको गाँठो संघीय संसद्को चालु अधिवेशन अन्त्य गर्न राष्ट्रपतिसमक्ष सिफारिस