काठमाडौं । दक्षिण कोरियामा भएकोे याङ योङ जा टेबलटेनिस मिसन (वाइटिटिएम) अन्तरराष्ट्रिय प्रशिक्षण शिविरअन्तर्गत आयोजित वाइटिटिएम टेबलटेनिस च्याम्पियनसिपमा नेपालकी योङ्गी पौडेलले पहिलो स्थान हासिल गरेकी छन् ।

यही जेठ २ देखि १२ गतेसम्म दक्षिण कोरियाको इन्चोनमा भएको उक्त च्याम्पियनसिपमा नेपालकी युवा खेलाडी योङ्गी पौडेलले यू–१९ विधातर्फ उत्कृष्ट खेल प्रदर्शन गर्दै प्रथम स्थान हासिल गरेकोे अखिल नेपाल टेबलटेनिस सङ्घका कोषाध्यक्ष ज्याकी महर्जनले जानकारी दिइन् ।

प्रथम स्थान हासिल गरेकी पौडेललाई सन् १९८८ की ओलम्पिक स्वर्ण पदक विजेता तथा दक्षिण कोरियाकी चर्चित टेबलटेनिस खेलाडी याङ योङ जाले पुरस्कार तथा सम्मान प्रदान गरेको अखिल नेपाल टेबलटेनिस सङ्घका कोषाध्यक्ष महर्जनले जानकारी दिइन् ।

योङ्गीले पुरस्कारस्वरूप रु १५ हजारका साथै टेबलटेनिस रबर तथा अन्य खेल सामग्री प्राप्त गरेकी छन् । त्यसैगरी, नेपाली टोलीका रिजन शाक्य, रिभानमुनि बज्राचार्य, प्राज्ना महर्जन र सुरम्या शाक्य सहभागी रहेको टोली इभेन्टमा प्रथम स्थान हासिल गर्न सफल भएका छन् । विजेता टोलीलाई रु ४० हजारसहित टेबलटेनिस रबर तथा अन्य खेल सामग्री प्रदान गरिएको थियो ।

नेपालबाट यू–१३ तर्फ रिभानमुनि बज्राचार्य र प्राज्ञा महर्जन, यू–१६तर्फ रिजन शाक्य र सुरम्या शाक्य तथा यू–१९ तर्फ हिमाल बिष्ट र योङ्गी पौडेल सहभागी भएका थिए ।

प्रशिक्षणका दौरान खेलाडीहरूले दक्षिण कोरियाको राष्ट्रिय प्रशिक्षण केन्द्रको अवलोकन गरेका थिए । अवलोकनका क्रममा उनीहरूले कोरियाका थुप्रै राष्ट्रियस्तरका खेलाडीहरूसँग भेटघाट तथा अनुभव आदानप्रदान गर्ने अवसर पाएका थिए । प्रतियोगितामा नेपाल, फिलिपिन्स, लाओस र मङ्गोलियालगायत विभिन्न देशका प्रशिक्षार्थी खेलाडीहरूको सहभागिता रहेको थियो ।

सम्बन्धित समाचार

स्कटल्यान्डले अमेरिकालाई दियो ३२२ रनको चुनौती फुटबल महाकुम्भ ‘फिफा विश्वकप २०२६’ : उद्घाटन खेलमा मेक्सिको र दक्षिण अफ्रिका भिड्दै कोशी खेलकुद विकास बोर्डको उपाध्यक्षमा श्रेष्ठलाई नियुक्त गर्न माग टि-२० महिला क्रिकेटः नेपालद्वारा मलेसिया पराजित अभिक शाह र दानिसा पुरी बने जुनियर चेस च्याम्पियन चेस विशेष साधारणसभाले अविश्वासको प्रस्ताव अस्वीकृत सडक सुरक्षामा प्रविधि, जनचेतना र कानुन कार्यान्वयनमा जोड काठमाडौं महानगरमा एक हप्ताभित्र फाइल शून्य बनाउन निर्देशन