काठमाडौं । आकर्षक रोजगारी र उच्च आम्दानीको प्रलोभनमा पारेर भारतको उत्तर प्रदेशस्थित कुशीनगरमा पुर्‍याई बन्धक बनाइएका ४५३ नेपाली नागरिकको उद्धार गरिएको छ। दिल्लीस्थित नेपाली दूतावासले उनीहरूको उद्धार गरी नेपाल पठाइएको तथा रूपन्देही प्रहरीलाई जिम्मा लगाइएको जनाएको छ।

रोजगारीको प्रलोभनमा ठगी गर्ने गिरोहमाथि अनुसन्धान सुरु

दूतावासका अनुसार रोजगारीको नाममा विभिन्न प्रलोभन देखाएर नेपाली नागरिकलाई भारतका विभिन्न स्थानमा पुर्‍याउने, बन्धक बनाउने तथा ठगीका गतिविधिमा संलग्न गराउने घटना बढ्दै गएको भन्दै सर्वसाधारणलाई विशेष सतर्कता अपनाउन आग्रह गरिएको छ।

प्रहरीका अनुसार आकर्षक जागिर, राम्रो तलब तथा सहज आम्दानीको आश्वासन दिँदै नेपालीहरूकै एक गिरोहले नेपालका विभिन्न जिल्लाका युवायुवतीलाई कुशीनगर पुर्‍याएको थियो। त्यहाँ पुगेपछि उनीहरूलाई विभिन्न नेटवर्किङ तथा अनलाइन ठगी योजनामा संलग्न हुन दबाब दिइएको र स्वतन्त्र रूपमा हिँडडुल गर्न नदिई नियन्त्रणमा राखिएको प्रारम्भिक अनुसन्धानबाट खुलेको छ।

लुम्बिनी प्रदेश प्रहरी कार्यालय र जिल्ला प्रहरी कार्यालय रूपन्देहीले नेपाली नागरिकहरू बन्धक अवस्थामा राखिएको सूचना पाएपछि भारतीय प्रहरीसँग समन्वय गरी उद्धार अभियान सञ्चालन गरेका थिए। गएराति भारतीय प्रहरीको सहयोगमा लुम्बिनी प्रदेश प्रहरी र रूपन्देही प्रहरीको टोलीले कुशीनगरबाटै ४५३ नेपाली नागरिकको उद्धार गरेको हो।

उद्धार अभियानमा उत्तर प्रदेश सरकार, उत्तर प्रदेश प्रहरी, केआईएन इन्डिया, दिल्लीस्थित नेपाली दूतावास तथा नेपाल–भारतका सुरक्षा निकायबीच घनिष्ठ समन्वय भएको जनाइएको छ। उद्धारपछि उनीहरूलाई सुरक्षित रूपमा सीमा नाकासम्म ल्याई नेपाल प्रवेश गराइएको थियो।

उद्धार गरिएका नागरिकहरूलाई शनिबार भैरहवा ल्याएर आवश्यक प्रक्रिया पूरा गरी रूपन्देही प्रहरीलाई हस्तान्तरण गरिएको छ। उनीहरूको स्वास्थ्य अवस्था, पारिवारिक सम्पर्क तथा अन्य आवश्यक व्यवस्थापनको कामसमेत सुरु गरिएको छ।

प्रहरीले यस घटनामा संलग्न गिरोहको पहिचान तथा नेटवर्क’bout थप अनुसन्धान गरिरहेको जनाएको छ। प्रारम्भिक जानकारीअनुसार गिरोहले सामाजिक सञ्जाल, व्यक्तिगत सम्पर्क तथा रोजगारीका आकर्षक विज्ञापनमार्फत युवाहरूलाई फसाउने गरेको देखिएको छ।

दूतावासले वैदेशिक रोजगारी वा अन्य कुनै पनि रोजगारीको प्रस्ताव प्राप्त हुँदा त्यसको सत्यता अनिवार्य रूपमा बुझ्न, आधिकारिक निकायबाट जानकारी लिन तथा अपरिचित व्यक्ति वा संस्थाको प्रलोभनमा नपर्न सबै नेपाली नागरिकलाई आग्रह गरेको छ।

पछिल्लो समय भारतका विभिन्न सहरमा नेपाली नागरिकलाई रोजगारीको झूटा आश्वासन दिएर ठगी गर्ने, बन्धक बनाउने तथा अवैध गतिविधिमा संलग्न गराउने घटना बढ्दै गएको भन्दै सुरक्षा निकायले सचेतना अभिवृद्धि गर्नुपर्ने आवश्यकता औँल्याएका छन्।

४५३ नेपाली नागरिकको एकैपटक उद्धार गरिएको यो घटना हालसम्मकै ठूलो उद्धार अभियानमध्ये एक मानिएको छ। यसले रोजगारीको नाममा हुने मानव बेचबिखन, ठगी तथा संगठित अपराधका गतिविधिप्रति गम्भीर प्रश्नसमेत उठाएको छ।

सम्बन्धित समाचार

कामिरिताले तोडे आफ्नै विश्व कीर्तिमान, ३२औं पटक पुगे सगरमाथाको शिखरमा संघीय संसद्का दुवै सदनको बैठक बस्दै न्यायालयमा त्रिपक्षीय द्वन्द्वः बार–बेन्च मिल्दा न्याय प्रशासनको ‘भद्र विद्रोेह’ युवा, श्रम तथा रोजगार मन्त्रालय मातहतका कर्मचारीका लागि नयाँ आचारसंहिता लागू ‘मालती मंगले’ र ‘गुरुआमा’ चालेनन्, ‘लालीबजार’ नाफातिर फूल फुलेर रंगिएको धनगढी (फोटोफिचर) वनमन्त्री चौधरीसँग राजदूत पुजोलको भेटवार्ता आयोग प्रतिवेदन: भदौ २३–२४ को घटनाको मुख्य कारक तत्कालीन प्रधानमन्त्री ओली