काठमाडौँ। त्रिशूली नदीमा आएको बाढी पहिरोबाट प्रभावित नागरिकको राहत तथा पुनर्स्थापनाका लागि गैर आवासीय नेपाली संघ (एनआरएनए) ले ५ करोड रुपैयाँ बराबरको सहायता परिचालन गर्ने भएको छ। संघले प्रारम्भिक चरणमै प्रभावित क्षेत्रमा अत्यावश्यक राहत सामग्री पुर्‍याउन थालेको जनाएको छ।

संघका संस्थापक अध्यक्ष डा.उपेन्द्र महतो र केन्द्रीय उपाध्यक्ष रोजिना प्रधान राईसहितको टोलीले नुवाकोटको बट्टार, त्रिशूली बजारलगायत बाढी प्रभावित क्षेत्रको स्थलगत निरीक्षण गरी खाद्यान्न, लत्ताकपडा, औषधि तथा टेन्ट वितरण गरेको छ।

स्थलगत अवस्थाको निरीक्षणपछि डा. महतोले बाहिर सार्वजनिक भएका विवरणभन्दा घटनास्थलमा क्षतिको अवस्था निकै गम्भीर रहेको बताए। उद्धार र राहतलाई तत्कालको प्राथमिकता मानेर पहिलो चरणमा आवश्यक सामग्रीसहित प्रभावित क्षेत्रमा पुगेको उनको भनाइ छ।

महतोका अनुसार प्रारम्भिक राहतका लागि ५ करोड रुपैयाँ बराबरको सहायता परिचालन गरिनेछ। राहतको पहिलो चरणपछि नेपाल सरकारसँग समन्वय गरी प्रभावित क्षेत्रको पुनर्निर्माणमा गैर आवासीय नेपाली समुदायको सहभागिता’bout आवश्यक छलफल अघि बढाइने उनले बताए।

एनआरएनएकी केन्द्रीय उपाध्यक्ष राईले विपद्को अवस्थामा विदेशमा रहेका नेपालीहरू प्रभावित नागरिकको सहयोगमा जोडिन इच्छुक रहेको बताइन्। उनका अनुसार आपत्कालीन बैठकबाट ५ करोड रुपैयाँको राहत प्याकेज घोषणा गरिएलगत्तै संयुक्त राष्ट्रसंघीय मापदण्डअनुसारका टेन्ट, खाद्यान्न र औषधिलगायत सामग्री प्रभावित क्षेत्रमा पुर्‍याइएको हो।

राहत वितरणलाई व्यवस्थित बनाउन संघले स्थानीय प्रशासन, प्रमुख जिल्ला अधिकारीको कार्यालय तथा स्थानीय तहसँग समन्वय गर्ने जनाएको छ। यसअघि भूकम्प र कोभिड-१९ महामारीका समयमा पनि संघले सहयोग गरेको उल्लेख गर्दै राईले अब प्रभावित क्षेत्रको पुन:स्थापना र पुनर्निर्माणमा समेत सरकारसँग सहकार्य गर्ने प्रतिबद्धता व्यक्त गरिन्।

बाढी प्रभावित क्षेत्रमा नेपाली सेनासहितका सुरक्षा निकायबाट बेपत्ता व्यक्तिको खोजी तथा घाइतेको उद्धार कार्य जारी छ। एनआरएनएको टोलीले नुवाकोटमा राहत वितरण गरेपछि अन्य प्रभावित जिल्लामा समेत पुगेर आवश्यक सामग्री उपलब्ध गराउने योजना बनाएको छ।

सम्बन्धित समाचार

साइबर अपराधमा २० हजारभन्दा बढी उजुरी, १५५ जना पक्राउ प्रधानमन्त्री शाह र प्रधानसेनापति सिग्देलबीच भेटवार्ता जाजरकोटको रिसाङ पहिरोमा परी आमा छोरा बेपत्ता, सात घाइते बढ्यो सुन र चाँदी दुबैको मूल्य, कतिमा भइराखेको छ कारोबार ? परराष्ट्रको ‘नेपाली नागरिकको उद्धार तथा शव फिर्ती कार्यविधि’ अर्थ मन्त्रालयमा बीपी राजमार्गको चौडा दोब्बर पारिने, डीपीआर भयो तयार दुध बिक्रीबाटै मनग्य आम्दानी गर्दै सत्यवतीका किसान विज्ञ ल्याउने नाममा ‘सहकारी बद्मास’लाई मन्त्रालयको साँचो