काठमाडौं । अभिनेत्री रेखा थापा यसपटक प्रहरीको वर्दीमा पर्दामा देखिने भएकी छन्।

एक्सन र सशक्त अभिनयमार्फत नेपाली चलचित्रमा छुट्टै पहिचान बनाएकी रेखाको नयाँ अवतारले यतिबेला सिनेवृत्तमा चर्चा बटुल्न थालेको छ। उनको अभिनय रहेको चलचित्र ‘३६ को आँकडा’को टिजर सार्वजनिक भएसँगै प्रहरी अधिकृतको भूमिकामा उनको प्रस्तुतिलाई लिएर दर्शकको चासो बढेको हो।

सार्वजनिक टिजरमा रेखा प्रहरी अधिकृतको पोशाकमा गम्भीर, निडर र आत्मविश्वासपूर्ण देखिएकी छन्। उनको हाउभाउ र पर्दामा देखिएको प्रभावशाली उपस्थितिले यसपटक उनी फरक चरित्रमा प्रस्तुत हुन लागेको संकेत गर्छ। एक्सन भूमिकामा दर्शकको मन जित्दै आएकी रेखाका लागि प्रहरी अधिकृतको चरित्र नयाँ प्रयोगसमेत हो।

रेखाले आफ्नो भूमिका’bout भनेकी छन्, ‘चरित्रलाई न्याय दिने प्रयास गरेकी छु। पक्कै पनि फरकपन पाउनुहुनेछ।’

रेखाको यो भनाइले पनि चलचित्रमा उनको भूमिका कस्तो रहनेछ भन्ने जिज्ञासा थपेको छ। यद्यपि टिजरले उनको चरित्रको पूर्ण पक्ष खुलाएको छैन। प्रहरी अधिकृतको जिम्मेवारीमा उनले कस्तो अभिनय प्रस्तुत गरेकी छन् भन्ने थाहा पाउन भने चलचित्र नै हेर्नुपर्नेछ।

सविर श्रेष्ठको निर्देशनमा बनेको चलचित्र ‘३६ को आँकडा’मा रेखासँगै निरुता सिंह, पूजा शर्मा, पुष्प खड्का, महेश त्रिपाठी, सुवर्ण थापा, निशा अधिकारी र रमेशचन्द्र सिडारीलगायत कलाकारको अभिनय रहेको छ।

चलचित्रको कथावस्तु आमा–छोरीबीचको सम्बन्ध, पारिवारिक असमझदारी, विभेद र संघर्षमा केन्द्रित छ। टिजरमा निरुता सिंह आमाको भूमिकामा देखिएकी छन् भने रेखा थापा र पूजा शर्मा छोरीको भूमिकामा प्रस्तुत छन्। पारिवारिक सम्बन्धभित्रको द्वन्द्व र त्यसविरुद्ध छोरीहरूले गर्ने संघर्षलाई चलचित्रले मुख्य विषय बनाएको छ।

रेखा फिल्म्स र काइट्स इन्टरटेनमेन्टको ब्यानरमा निर्माण भएको चलचित्रका निर्माता सरस्वती थापा, दुर्गा सापकोटा र गीता श्रेष्ठ हुन्। निर्देशक सविर श्रेष्ठकै कथा रहेको चलचित्रको पटकथा शिवम् अधिकारीले लेखेका छन्।

चलचित्रमा ईश्वर सिन्केमनको छायांकन, रोशन श्रेष्ठको द्वन्द्व निर्देशन तथा बनिश शाह र रामप्रसाद चौधरीको सम्पादन रहेको छ।

पारिवारिक कथाको भावनात्मक पक्षसँगै प्रहरी अधिकृतको भूमिकामा रेखाको नयाँ अवतार चलचित्रको चर्चाको एउटा प्रमुख विषय बनेको छ। टिजरले दर्शकमाझ उत्सुकता जगाए पनि रेखाको प्रहरी चरित्रले कथामा कस्तो मोड ल्याउँछ भन्ने खुल्न बाँकी छ।

सम्बन्धित समाचार

विद्या बालन र सैफ अली खान १९ वर्षपछि पुनः सँगै आउँदै दर्शकबाट ‘रामायण’ को अभूतपूर्व प्रतिक्रिया अर्थमन्त्री वाग्लेमाथि खनिए अभिनेता राजेश हमाल, भारतको चाकडी गरेको आरोप शाहरुख खानले सार्वजनिक गरे ‘किङ’ को नयाँ पोस्टर ‘गौँथली’ लाई ‘वेस्ट फरेन सिनेमा’ को अवार्ड प्रकृतिको काखमा कला उत्सव, रूखका हाँगामा मोहक चित्र सञ्जय दत्त र सलमान खान सँगसँगै देखिने ‘३६ को आँकडा’को टिजर सार्वजनिक