पहिलो चौमासिकमा २३ प्रतिशत बजेट खर्च

काठमाडौं । चालु आर्थिक वर्ष २०८३/८४ को पहिलो चौमासिकमा सरकारको आम्दानी वार्षिक लक्ष्यको २३ दशमलव ३९ र खर्च २३ दशमलव ३७ प्रतिशत देखिएको छ ।

महालेखा नियन्त्रक कार्यालयको तथ्यांकअनुसार कात्तिक मसान्तसम्ममा सरकारले कूल चार खर्ब ९६ अर्ब ५२ करोड ११ लाख रुपैयाँबराबर खर्च गरेको हो । यो वार्षिक लक्ष्यको तुलनामा २३ दशमलव ३७ प्रतिशत हुन आउँछ ।

चालुगत शीर्षकमा यस आर्थिक वर्षका लागि १२ खर्ब ७० अर्ब ५८ करोड ९० लाख रुपैयाँ बजेट विनियोजन भएकोमा कात्तिक मसान्तसम्ममा वार्षिक विनियोजनको २७ दशमलव २९ प्रतिशतअर्थात् तीन खर्ब ४६ अर्ब ७५ करोड २४ लाख रुपैयाँ खर्च भएको छ ।

त्यस्तै, पुँजीगत शीर्षकमा चार खर्ब ३१ अर्ब १० करोड ६३ लाखबराबर विनियोजन भएको सात दशमलव ५३ प्रतिशतअर्थात् ३२ अर्ब ४४ करोड ८६ लाख रुपैयाँ खर्च भएको छ । वित्तीय व्यवस्था शीर्षकमा यस वर्ष चार खर्ब २२ अर्ब ६४ करोड ९१ लाख रुपैयाँबराबर बजेट विनियोजन भएकोमा कात्तिक मसान्तसम्ममा २७ दशमलव ७६ प्रतिशतअर्थात् एक खर्ब १७ अर्ब ३२ करोड रुपैयाँ खर्च भएको छ ।

सरकारले यस वर्ष १६ खर्ब ४२ अर्ब छ करोड ३७ लाख आम्दानी गर्ने लक्ष्य राखेकोमा कात्तिक मसान्तसम्ममा वार्षिक लक्ष्यको २३ दशमलव ३९ प्रतिशत अर्थात् तीन खर्ब ८४ अर्ब सात करोड रुपैयाँबराबर प्राप्ति गरेको छ । कूल १५ खर्ब ८० अर्ब ३१ करोड ८३ लाख राजस्व उठाउने लक्ष्य राखेको सरकारले पहिलो चौमासिकसम्ममा २३ दशमलव ५८ प्रतिशत अर्थात् तीन खर्ब ७२ अर्ब ७१ करोड ८० लाख रुपैयाँबराबर राजस्व उठेको छ ।

वैदेशिक अनुदानतर्फ यस वर्ष ६१ अर्ब ७४ करोड ५४ लाख रुपैयाँबराबरको वार्षिक लक्ष्य रहेकोमा कात्तिक मसान्तसम्ममा १४ दशमलव पाँच प्रतिशत अर्थात् आठ अर्ब ६७ करोड ३५ लाख रुपैयाँबराबर अनुदान प्राप्त भएको महालेखा नियन्त्रक कार्यालयको तथ्यांकबाट देखिएको छ ।

तपाइको प्रतिक्रिया
(Visited 1 times, 1 visits today)

epaper

ताजा समाचार

पहिलो चौमासिकमा २३ प्रतिशत बजेट खर्च