पत्रकारमाथिको धरपकडविरुद्ध महासंघ सडकमा, मंसिर ९ गते देशव्यापी प्रदर्शन

काठमाडौं । पत्रकारमाथि भइरहेको धरपकड, पक्राउ र प्रेस स्वतन्त्रतामाथिको हस्तक्षेपविरुद्ध नेपाल पत्रकार महासंघ काठमाडौं शाखाले जिल्ला प्रशासन कार्यालयअगाडि धर्ना दिने भएको छ ।

महासंघले आगामी मंसिर ९ गते ‘पत्रकारलाई सामूहिक गिरफ्तार गर’ भन्ने ब्यानरसहित काठमाडौं जिल्ला प्रशासन कार्यालयअगाडि विरोध प्रदर्शन गर्ने तयारी गरेको हो ।

नेपाल पत्रकार महासंघको केन्द्रीय समितिको सर्कुलरअनुसार धर्ना कार्यक्रम आयोजना गर्न लागिएको काठमाडौं शाखाकी अध्यक्ष शोभा अर्यालले जानकारी दिइन् ।

उनका अनुसार समाचार कक्षमै प्रवेश गरेर पत्रकारलाई धरपकड गर्ने, साइबर कानुनको प्रयोग गरी पत्रकार पक्राउ गर्ने तथा सरकारले ल्याएको प्रेस काउन्सिलसम्बन्धी अध्यादेशविरुद्ध प्रदर्शन गर्न लागिएको हो ।

अध्यक्ष अर्यालले सरकारले पछिल्लो समय प्रेस तथा अभिव्यक्ति स्वतन्त्रतामाथि अंकुश लगाउने गतिविधि बढाएको आरोप लगाइन् । पत्रकार महासंघसँग कुनै छलफल नगरी प्रेस काउन्सिलसम्बन्धी अध्यादेश ल्याइनु सञ्चार क्षेत्रलाई नियन्त्रण गर्ने उद्देश्यबाट प्रेरित रहेको उनको भनाइ छ ।

उनले प्रेसका समस्या समाधान गर्नुको सट्टा तिनै समस्यालाई आधार बनाएर सञ्चारमाध्यमलाई नियन्त्रण गर्न खोजिएको बताइन् । समाचार कक्षमै प्रवेश गरेर पत्रकारलाई पक्राउ गर्ने घटना बढिरहेको र पक्राउको जिम्मेवारी सरकारले नलिने गरेको भन्दै उनले आपत्ति जनाइन् ।

‘समाचार कक्षमै गएर पत्रकारलाई धरपकड गर्ने काम सरकारले गरेको छ । तर, त्यसको जिम्मेवारी लिएको छैन । संविधान, कानुन र नियमलाई बेवास्ता गर्दै प्रेस स्वतन्त्रता र अभिव्यक्ति स्वतन्त्रताजस्तो नागरिकको मौलिक हकलाई खेलको विषय बनाइएको छ,’ उनले भनिन् ।

अर्यालले सरकारी तथा निजी सञ्चारमाध्यममा पत्रकारलाई विनाकारण कामबाट निष्कासन गर्ने प्रवृत्ति बढेको भन्दै श्रम अधिकारको समेत उल्लंघन भइरहेको बताइन् । राष्ट्रिय समाचार समिति (रासस), गोरखापत्रलगायतका सञ्चारमाध्यममा पत्रकार निष्कासन गरिएको उनको दाबी छ ।

त्यस्तै, निजी सञ्चारमाध्यमको प्रमुख आम्दानीको स्रोत विज्ञापनमा समेत सरकारले हस्तक्षेप गरेको उनको आरोप छ । सरकारी विज्ञापन रोक्ने निर्णय र लोककल्याणकारी विज्ञापनको रकम कटौती गर्ने कदमले सञ्चार क्षेत्र थप प्रभावित भएको उनले बताइन् ।

सञ्चार मन्त्रालय सञ्चार क्षेत्रका समस्याप्रति उत्तरदायी हुनुपर्नेमा प्रधानमन्त्री कार्यालयको आदेश पालना गर्ने निकायजस्तो देखिएको भन्दै उनले असन्तुष्टि जनाइन् ।

उनले सञ्चारमाध्यमअगाडि गाडी तेस्र्याउने तथा पत्रकारमाथि धरपकड गर्ने घटनामा प्रहरीको प्रयोग भएको विषयमा समेत छानबिन र कारबाही हुनुपर्ने माग गरिन् ।

महासंघले वार्ताबाट समाधान भइसकेका विषयलाई पुनः विवादमा ल्याइएको भन्दै आन्दोलन गर्नुपर्ने अवस्था सिर्जना भएको जनाएको छ ।

नेपाल पत्रकार महासंघले मंसिर ९ गते देशभरका जिल्ला शाखामार्फत जिल्ला प्रशासन कार्यालयअगाडि विरोध कार्यक्रम गर्ने निर्णय गरेको थियो । सोही निर्णयअनुसार काठमाडौं शाखाले पनि धर्ना दिन लागेको हो ।

तपाइको प्रतिक्रिया
(Visited 10 times, 1 visits today)

epaper

ताजा समाचार

एम्बुलेन्स चालक कुट्ने गाउँपालिका अध्यक्ष पक्राउ