काठमाडौं । विश्व कीर्तिमानी आरोही कामीरिता शेर्पा २७औं पटक सगरमाथाको शिखरमा पुग्न सफल भएका छन् । सेभेन समिट ट्रेक्सका म्यानेजर थानेश्वर गुरागाईंले दिएको जानकारीअनुसार आरोही शेर्पा आफ्नो यसअघिको कीतिमानी तोड्दै बुधबार बिहान साढे ८ बजे २७ औंपटक सगरमाथाको शिखरमा पुगेका हुन् ।
‘एक जना विदेशी आरोहीलाई लिएर शेर्पा बिहान सगरमाथा शिखरमा पुगेको सो ट्रेक्सले जनाएको छ । यसअघि २६ पटक औं पटक सगरमाथाको सफल आरोहण गरिसकेका शेर्पाले २७ औं पटक सगरमाथा आरोहण गरेर आफ्नै कीर्तिमानी तोडेका हुन् ।
८८४९ मिटर उचाइको विश्व सर्वोच्च शिखर सगरमाथा शिखरमा लगातार २७ औंपटक पुगेर आरोहणको यस्तो नयाँ कीर्तिमान बनाउनु संसारभरका आरोहीका लागि गौरवको विषय भएको छ ।
५३ वर्षीय कीर्तिमानी आरोही शेर्पाले सगरमाथाको पहिलो आरोहण सन् १९९४ मा गरेका थिए । यसपछि उनले प्रायः वर्षहरूमा सगरमाथासँगै विभिन्न हिमाल आरोहणमा नयाँ कीर्तिमान कायम गर्दै आएका थिए ।
यसअघि सन् २०२२ मा कामीरिताले सगरमाथा शिखरमा २६ औं पटक सफल आरोहण गरेका थिए । सोलुखुम्बुको थामेमा जन्मेका कामीरिताले सगरमाथासँगै केटु, ल्होत्से, मनास्लु, चोयुलगायत विभिन्न हिमाल आरोहण गरिसकेका छन् ।
कामीरिताभन्दा अघि २१औं पटक सगरमाथा चढेका कीर्तिमानी आरोही भनेर चिनिएका आप्पा शेर्पा र फुर्वाटासी शेर्पाले २१औं पटकसम्म मात्र सगरमाथा आरोहण गरेका थिए । हाल उनीहरू दुवैले पर्वतारोहणबाट सन्यास लिइसकेका छन् । सोलुखुम्बुको थामे गाउँमा जन्मिएका कामीरिता शेर्पाले १३ मे १९९४ मा पहिलोपटक सगरमाथाको शिखर चुमेका थिए ।
विगतका वर्षहरूको तुलनामा यसवर्ष सबैभन्दा धेरै आरोहीले सगरमाथा आरोहणको अनुमति लिएको पर्यटन विभागले जनाएको छ । विभागका अनुसार यस वर्षको सगरमाथा आरोहणका लागि स्वदेशी र विदेशी गरी कुल ४४ वटा आरोहण दलका ४ सय ६७ जनाले आरोहण अनुमति लिएका थिए ।
यस वर्षको आरोहण गत शनिबारदेखि सुरु भएको हो । शनिबार आरोहणका लागि बाटो बनाउन जाने दक्ष कामदार (आइसफल डाक्टर)ले शिखरसम्म पुग्ने डोरी टाँगेपछि यस वर्षको वसन्त ऋतुको सगरमाथा आरोहण सुरु भएको थियो ।
यसपालि कामीरिताको यो नयाँ विश्व रेकर्डसँगै विभिन्न आरोहण दलबाट गएका आरोहीहरूले विविध कीर्तिमानी बनाउने लक्ष्यका साथ धमाधम सगरमाथा आरोहण गरिरहेका छन् । यो मौसममा पाकिस्तानकी नैला कियानी सगरमाथाको चुचुरोमा पुग्ने पहिलो अन्तर्राष्ट्रिय आरोही बनेकी छन् । उनले गत आइतबार नै सगरमाथाको शिखर चुमेकी थिइन् ।
यसवर्ष सगरमाथा आरोहणको ७०औं वर्ष पुगेको अवसरमा विशेष कार्यक्रम हुँदै छ ।
विभिन्न नयाँ कीर्तिमानी बनाउने प्रतिस्पर्धाबीच यसपालि १६ वर्षीया चिनियाँ युवती सुई चो युआनले पनि सबैभन्दा कान्छी आरोहीका रूपमा सगरमाथाको सफल आरोहण गरेकी छन् । चिनियाँ युवती सुई चो युआनले सोमबार बिहान ५ बजेर ४२ मिनेटमा सगरमाथाको दक्षिणी मोहडाबाट शिखर चुम्न सफल भएकी हुन् ।
नेपाल बिग माउन्टेन ट्राभलले बुधबार पत्रकार सम्मेलन गरी चनियाँ युवती सुई चो युआनले सगरमाथाको सफल आरोहण गरेको ’bout जानकारी दिएको हो ।
नेपाल बिग माउन्टेन ट्राभलले चिनियाँ युवतीको सगरमाथा आरोहणका क्रममा समन्वय गरेको प्रबन्ध निर्देशक सदर्शन नेपालले जानकारी दिए । उनी महिलामा हालसम्म सम्भवतः सबैभन्दा कम उमेरको सगरमाथा आरोही भएको नेपालको दाबी छ ।
चिनियाँ युवती सुई चो युआनले आफ्ना बुबा सुई चियाङ लेईले सन् २००७ मा सगरमाथाको उत्तरी मोहडाबाट सफल आरोहण गरेको सुनाउँदै त्यहींबाट आफूले आरोहण गर्ने प्रेरणा पाएको बताइन् । सुई चो युआनले आरोहणका क्रममा सुरुमा मौसम खराबीले केही चुनौतीको सामना गर्नुपरे पनि आरोहणको दिन भने मौसमले साथ दिएको बताइन् । उनले आरोहणका क्रममा सहयोगी शेर्पाहरूले सहयोग गरेकामा धन्यवादसमेत दिइन् ।
सोनाम पहिलोपटक पुगे सगरमाथा शिखरमा
सगरमाथा आरोहण गर्ने पहिलो नेपाली महिला स्वर्गीय पासाङ ल्हामु शेर्पाका श्रीमान् ल्हाक्पा सोनाम शेर्पाले विश्वको सर्वोच्च शिखर सगरमाथाको सफल आरोण गरेका छन् ।
आफ्नो श्रीमती पासाङ ल्हामु शेर्पाले सगरमाथा आरोहण गरेको ३० वर्षपछि सोनाम पहिलोपटक सगरमाथाको शिखरमा पुगेका हुन् । पासाङ ल्हामु शेर्पाको सगरमाथाको शिखरमा पुगेर फर्किने क्रममा निधन भएको थियो ।
बुधबार बिहान ७ बजेर ३४ मिनेटमा शेर्पा सगरमाथाको शिखरमा पुगेको उनको परिवारले जानकारी दिएको छ । सोनाम शेर्पासँगै आरोहण टोलीमा जाङ्बु शेर्पा, पेमटेंगी शेर्पा, पेम्बा शेर्पा र फ्रान्सका रोबर्ट मोराचिनी पनि रहेका छन् ।
मंगलबार दिउँसो सगरमाथाको क्याम्प ४ मा पुगेका उनीहरूले मंगलबार साँझ ८ बजे त्यहाँबाट शिखरतर्फ प्रस्थान गरेका थिए । सगरमाथाको सफल आरोहणसँगै लाक्पा सोनाम शेर्पाले विश्वका सात महादेशका सबै अग्ला हिमालको सफल आरोहण पूरा गरेका छन् ।
६३ वर्षीय शेर्पा सोलुखुम्बुको पासाङ ल्हामु गाउँपालिका–१ पाङ्गोममा जन्मेका हुन् । ५० वर्षदेखि नेपालको पर्यटन व्यवसायमा संलग्न शेर्पाले हजारौं आरोहीलाई नेपालका विभिन्न हिमाल आरोहण गराएका छन् ।
थमसेर्कु ट्रेकिङका संस्थापक, यती एयरलाइन्सका कार्यकारी अध्यक्षसमेत रहेका शेर्पा होटल तथा जलविद्युत्लगायतका व्यवसायमा संलग्न छन् । उनले यसअघि अन्टार्कटिकाको माउन्ट भिन्सन, ओसिनियाको माउन्ट पुनकक–माउन्ट कार्सटेन्ज, युरोपको माउन्ट एल्ब्रस, अफ्रिकाको माउन्ट किलिमन्जारो, उत्तर अमेरिकाको डेनाली र दक्षिण अमेरिकाको एकोनवागुआ हिमालको सफल आरोहण गरिसकेका छन् ।
यसैगरी, उनले युरोपको सर्वोच्च शिखर माउन्ट ब्लांक, नेपालमा अन्नपूर्ण प्रथम हिमाल, धौलागिरी हिमाल र थमसेर्कु हिमालको आरोहण पनि गरेका छन् ।
