राजविराज । चरम गरिबीका कारण थप उपचार गराउन असमर्थ भएकी सप्तरीको खडक नगरपालिका ४ की जलिफन खातुनको ज्यान जोगाउन चन्दा सङ्कलन अभियान चलाइएको छ ।

५० बर्सिया भूमिहीन खातुनको श्रीमान्को ६ वर्ष अघि निधन भइसकेको छ । घरमा १० वर्षीय एक मात्र छोरा छन् । घरमा कमाउने कोही नभई बेसहारा जीवन बिताई रहेकी उनलाई अहिले ब्रेन ट्युमर रोगले सताएपछि थप विपत्ति आइपरेको छ ।

अमहा टोल स्थित पोखरी डिलमा रहेको ऐलानी जग्गामा फुसको एउटा सानो झुप्रो बनाई बसोबास गर्दै आएकी खातुनको दयनीय अवस्था हेरेर टोलकै केही व्यक्तिले डेढ लाख जति चन्दा उठाएर दुई महिना अघि विराटनगरमा प्रारम्भिक उपचार गराइ दिएका थिए ।

विराटनगरमा जाँचका क्रममा चिकित्सकले ब्रेन ट्युमर भएको तथा उपचारका लागि ६ लाख रुपैयाँ थप खर्च लाग्ने बताएपछि रकम अभावमा उपचारै नगरी उनी घर फर्किएकी छिन् ।

काठमाडौँमा भने पाँच लाख रुपैयाँमा उपचार हुने गाउँका स्वास्थ्यकर्मीहरुले बताएको खातुनले सुनाइन । तर, पैसाको जोहो हुन नसक्दा रोग पालेर घरमै बसिरहेको उनले लाचारी व्यक्त गरेकी छिन् ।

यसैबिच खातुनको ज्यान जोगाउन र नयाँ जीवनका लागि उपचार खर्च जुटाउन चन्दा सङ्कलन अभियान थालिएको छ । सामाजिक अभियन्ता अनवर अलीको अगुवाइमा उपचार खर्च जुटाउन शुक्रवारदेखि चन्दा सङ्कलन अभियान थालिएको छ ।

आफूले समेत केही नगद सहयोग गरी सुरु गरेको “खातुन बचाउ, चन्दा सङ्कलन अभियान” मा सबैको सहयोगबाट उपचार खर्च सङ्कलन हुने र खातुनले नयाँ जीवन प्राप्त गर्ने विश्वास गरिएको सामाजिक अभियन्ता अलीले बताए ।

उपचारका लागि पैसाको खोजीमा भौँतारिएकी खातुनलाई उपचार खर्चमा सहयोग गर्न उनले स्वदेश तथा विदेशमा रहेका सम्पूर्ण नेपाली दाजुभाइ र दिदी–बहिनीलाई अपिल गरेका छन् ।

सम्बन्धित समाचार

सरकारले कप्तानगन्ज घटनापीडितलाई राहत प्रदान गर्ने न्यायको पर्खाइमा महिला अधिकारकर्मी सुनसरी तनावग्रस्त : झडपपछि एक जनाको मृत्यु, पाँच स्थानमा अनिश्चितकालीन कर्फ्यु सुनसरीमा सामाजिक सद्भाव कायम राख्न सर्वपक्षीय सहमति आज गुरु पूर्णिमा र व्यास जयन्ती पर्व मनाइँदै राजविराजमा रात्रीकालिन हवाइ उडान अनिश्चित बज्रधातु चैत्यकोे सार्वजनिक जग्गा व्यक्तिको नाममा पाकिस्तानको ब्रोड पिकमा हिमपहिरो जाँदा कीर्तिमानी आरोही निर्मल पुर्जासहित १० जना बेपत्ता