उदयपुर । भोटेकोशी नदिमा आएको विनाशकारी बाढीमा परी उदयपुरका १२ जना सम्पर्क बिहीन भएका छन् । जिल्ला प्रहरी कार्यालय उदयपुरका अनुसार विभिन्न कामको सिलसिलामा भोटेकोशी तटीय क्षेत्रमा कार्यरत उदयपुरका १२ जना सम्पर्क बिहीन भएको जानकारी आएको छ ।

१२ जनाको परिवारबाट सम्पर्क बिहीन भएको पुष्टि भएको प्रहरीले जनाएको छ । जिल्ला प्रहरी कार्यालय उदयपुरका प्रमुख प्रहरी उपरिक्षक राजन चापागाईंका अनुसार बिहिवार सम्म सम्पर्क बिहीन व्यक्तिका परिवारसँग सामाजिक सञ्जाल लगायतका माध्यमबाट जानकारी लिएर १२ जनाको पुष्टि गरिएको हो । उनका अनुसार थप एक जनाको परिवार पत्ता लगाउने काम भइ रहेको छ । उनले भने, ‘सामाजिक सञ्जालमा सम्पर्क बिहीन भएको सूचना परिवारले हालेका छन् । तर, हामीले पुष्टी गर्न सकेका छैनौँ । पत्ता लगाउँदैछौँ ।

बेपत्ता भएका व्यक्तिहरूमा त्रियुगा नगरपालिका–१४, साउने धाप्लाङघाटका १८ वर्षीय भेषराज माझी, २० वर्षीय मिलन माझी र ३२ वर्षीय चन्द्रबहादुर माझी रहेका छन् । प्रहरीका अनुसार उनीहरू सबै रसुवा हाइड्रोपावरमा मजदुरका रूपमा कार्यरत थिए । त्यसैगरी कटारी नगरपालिका–५ का ३२ वर्षीय बुद्धिमान नेपाली पनि सम्पर्क बिहीन छन् ।

उनी रसुवाको टिमुरे बजारस्थित एक ग्यारेजमा कामदारका रूपमा कार्यरत थिए । लिम्चुङबुङ गाउँपालिका–४, बलम्ताका २४ वर्षीय सुमन समीर राई पनि सम्पर्क बिहीन भएको प्रहरीले जनाएको छ । नेपाली सेनामा कार्यरत राई रसुवा क्षेत्रकै ब्यारेकमा कार्यरत रहेको जानकारी आएको प्रहरी उपरिक्षक चापागाईंले जानकारी दिए ।

त्यसैगरी त्रियुगा नगरपालिका–४ का ४२ वर्षीय देवेन्द्र घिमिरे पनि त्रिशूली हाइड्रोबाट सम्पर्क बिहीन भएका छन् । उनी माथिल्लो त्रिशूली हाइड्रोमा कामदारका रूपमा कार्यरत थिए । त्यसैगरी गोसाइँकुण्ड घुम्न गएका त्रियुगा नगरपालिका–९ का २५ वर्षीय भोलाराज भनिने कुशल कार्की पनि सम्पर्क बिहीन भएका छन् ।

त्यसैगरी उदयपुरगढी गाउँपालिका–७ तिरिबासका स्थानीय अरुन मगर र सार्के मगर बेपत्ता भई परिवारको सम्र्पकमा नआएको जनाएका छन । त्यसैगरी त्रियुगा नगरपालिका– १० बोक्सेकी मनिका विश्वकर्मा र रियाज विश्वकर्मा नुवाकोटबाट बेपत्ता भएको परिवारले जनाएको छ । त्यसैगरी त्रियुगा नगरपालिका–७ का धु्रव बस्नेत पनि रसुवाको टिमुरेबाट सम्पर्क बिहीन भएका छन् । उनी रसुवा हाइड्रोपावरमा सवारी चालकका रूपमा कार्यरत थिए ।

जिल्ला प्रशासन कार्यालय उदयपुरका प्रमुख जिल्ला अधिकारी मेखबहादुर मंग्रातीले दिएको जानकारी अनुसार उदयपुरका १३ जना सम्पर्क बिहीन भएको सुचना आएको बताए । उनका अनुसार बिहीवार बिहानसम्म १२ जनाको पुष्टि भएको र बाँकी एक जनाको विवरण यकिन गर्ने काम भइ रहेको छ । हामीले हालसम्म १२ जनाको पुष्टि गरेकाछौँ ।

सामाजिक सञ्जालमा परिवारका सदस्यले सार्वजनिक गरेको विवरण अनुसार सम्पर्क बिहीनको संख्या १३ पुगेको छ । बाँकी व्यक्तिको पनि पहिचान तथा परिवारसँग सम्पर्क गर्ने काम भइरहेको छ,’ प्रमुख जिल्ला अधिकारी मंग्रातीले भने ।

प्रमुख जिल्ला अधिकारी मंग्रातीका अनुसार जिल्ला प्रशासन कार्यालय उदयपुरले भोटेकोशीमा आएको बाढीबाट प्रभावित क्षेत्रमा उदयपुरबाट रोजगार, व्यापार तथा अन्य कामको सिलसिलामा गएका र अहिले सम्म आफन्तको सम्पर्कमा नआएका व्यक्तिको यकिन विवरण संकलन गरी खोज तथा उद्धारका लागि सूचना जारी गरेको छ ।

प्रशासनले त्यस्ता व्यक्तिका आफन्तलाई नजिकको प्रहरी कार्यालय, सम्बन्धित वडा कार्यालय वा जिल्ला प्रशासन कार्यालय उदयपुरमा जानकारी गराउन आग्रह गरेको छ ।

सम्बन्धित समाचार

गछिया युवा समाजको वार्षिकोत्सवमा ६० विद्यार्थीलाई शैक्षिक सामग्री इनरुवाको ग्रीनसिटीमा १२ हजार बिरुवा रोपिँदै शुभशेर राई स्मृति प्रतिष्ठानद्वारा शिक्षक, विद्यार्थी पुरस्कृत, चारजना सम्मानित इनरुवाको ग्रीनसिटीमा १२ हजार बिरुवा रोप्ने अभियान सुरु मोटरसाइकलको ठक्करबाट साइकल चालकको ज्यान गयो ३२ वर्षपछि दोबेला प्रहरी चौकी आफ्नै भवनमा ऐसेलुखर्कमा तीनवटा खानेपानी आयोजना सञ्चालन, ३७० घरपरिवार लाभान्वित पूर्वी पहाडी जिल्लामा सोमबारदेखि लाखे जात्रा मनाउन सुरु