खोटाङ । खोटाङको ऐसेलुखर्क गाउँपालिकाका दुई वडामा एकैसाथ सञ्चालनमा आएका तीनवटा खानेपानी आयोजनाबाट स्थानीय ३७० घरपरिवार लाभान्वित भएका छन् । गाउँपालिका कार्यालय, एक्सन फर नेपाल र सम्बन्धित समितिबीचको त्रिपक्षीय लागत साझेदारीमा वडानम्वर(२ बाकाचोलमा लुबेरा–बादेल र झाँक्रीवास खानेपानी आपूर्ति आयोजना तथा वडानम्वर(७ माक्पामा रोलुखोला नोरुङ खानेपानी आपूर्ति आयोजना निर्माण सम्पन्न भएको हो ।

गाउँपालिकाका प्रवक्ता तथा वडानम्बर(३ का वडाध्यक्ष टेकेन्द्र राजभण्डारीका अनुसार उक्त तीन आयोजनामार्फत उपभोक्ताका घर र सार्वजनिक स्थानहरूमा गरी जम्मा ३७२ धारा निर्माण गरिएको छ । वडाध्यक्ष राजभण्डारीका अनुसार तोकिएको समयभन्दा अगावै तीनवटै आयोजना सम्पन्न गरी सञ्चालनमा ल्याइएको हो र आयोजनाको प्रभावकारी सञ्चालनका लागि अनुगमन तथा मर्मत समिति र हेरालु समेत नियुक्त गरिएको छ ।

एक करोड ३६ लाख भन्दा बढी लागतमा सम्पन्न बाकाचोलको लुबेरा–बादेल आयोजनाबाट २०४ धारा निर्माण भएको छ, जसमा उपभोक्ता समितिले करिब १३ लाख ६८ हजार रुपैयाँ बेहोरेको थियो । उक्त खानेपानी आयोजना गत असार–१६ गते सम्पन्न भएको हो । त्यसैगरी ४२ लाख ७२ हजार भन्दा बढी लागतमा बनेको माक्पाको रोलुखोला नोरुङ आयोजनाबाट ४४ घर र सार्वजनिक स्थानमा दुई धारा निर्माण भएको छ, जुन गत जेठ–६ गतेदेखि नै सञ्चालनमा छ ।

साविकमा पानीको सबैभन्दा बढी समस्या भोगेको झाँक्रीवासमा भने १२२ धारा निर्माण गरिएको छ; करिब सात किलोमिटर टाढाको मुहानबाट पाइपमार्फत ल्याइएको उक्त आयोजना जेठ–१२ गते औपचारिक रूपमा उद्घाटन गरिएको थियो । गाउँपालिका प्रमुख गीरेन्द्र बहादुर राईले नेपाल सरकारको “एक घर, एक धारा“ नीतिअनुसार आफूहरू अघि बढेको र निर्वाचित भएयता करिब ५० प्रतिशत उपभोक्तालाई उक्त सेवा पुर्याइसकेको जानकारी दिए । गाउँपालिकामा रहेका तीन हजार ३५५ घरपरिवार मध्ये बाँकी सबैलाई आगामी वर्षभित्रै खानेपानी सुविधा दिने लक्ष्यसहित बजेट विनियोजन गरिएको उनले बताए ।

लामो समयदेखि कुवा र खोलाको पानीमा भर पर्दै आएका दुवै वडाका स्थानीयवासी अब घरघरमै धारा पुगेपछि खुसी बनेका छन् । जिल्लाको उत्तरी भेगमा पर्ने बाकाचोलमा पहिले कादुरीले सञ्चालन गरेको खानेपानी योजना जीर्ण भइसकेपछि नयाँ आयोजना निर्माण गरिएको हो ।

गाउँपालिकाका दुई वडामा एकैसाथ तीन आयोजना सञ्चालनका लागि २०८२ मङ्सिर–२७ गते गाउँपालिका प्रमुख राई, प्रमुख प्रशासकीय अधिकृत रेखबहादुर थापा, एक्सन फर नेपालका कार्यकारी प्रमुख लाक्पाछिरिङ शेर्पा र लेखा संयोजक अजिला लिम्बू तथा सम्बन्धित वडाध्यक्षहरूबीच त्रिपक्षीय सम्झौता भएको थियो ।

क्याप्नसनः ऐसेलुखर्क गाउँपालिका र एक्सन फर नेपालद्धारा उपभोक्तालाई स्वच्छ खानेपानी वितरण गर्न निर्माण गरिएको खानेपानी आयोजनाको टंयाङ्की ।

सम्बन्धित समाचार

गछिया युवा समाजको वार्षिकोत्सवमा ६० विद्यार्थीलाई शैक्षिक सामग्री इनरुवाको ग्रीनसिटीमा १२ हजार बिरुवा रोपिँदै शुभशेर राई स्मृति प्रतिष्ठानद्वारा शिक्षक, विद्यार्थी पुरस्कृत, चारजना सम्मानित इनरुवाको ग्रीनसिटीमा १२ हजार बिरुवा रोप्ने अभियान सुरु मोटरसाइकलको ठक्करबाट साइकल चालकको ज्यान गयो ३२ वर्षपछि दोबेला प्रहरी चौकी आफ्नै भवनमा काठमाडौं विश्वविद्यालयका उपकुलपतिमा विवेक बराल नियुक्त निर्वाचन क्षेत्र पुगेर ‘१० गोल हान्ने’ ओलीको घोषणा