धनगढी । झण्डै तीन महिनादेखि बजेटविहीन रहेको सुदूरपश्चिम प्रदेशमा बुधबार पनि बजेट आउन सकेन । बजेट प्रस्तुत गर्न बुधबार साँझ ५ बजेका लागि बोलाइएको प्रदेशसभा बैठक बस्दै नबसी २४ गतेसम्मका लागि स्थगित भएको छ ।

सरकारको आग्रहमा प्रदेशसभा सचिवालयले बैठक स्थगित गरेको हो । बुधबार साँझको बैठकमा बजेट प्रस्तुत गर्ने तयारी भए पनि प्राविधिक विषय मिलाउन बाँकी रहेको भन्दै बैठक बिहीबार बिहान ८ बजेसम्मका लागि स्थगित गरिएको थियो । तर, बिहीबार बिहान पनि बैठक नबसेपछि २४ गतेसम्मका लागि स्थगित गरिएको हो ।

अघिल्लो सरकारले प्रदेशसभामा प्रस्तुत गरेको बजेटसम्बन्धी विवाद सर्वोच्च अदालतमा पुगेपछि नयाँ बजेट ल्याउने सरकारको तयारी प्रभावित भएको हो । अधिवक्ता मनिराम उपाध्यायले दायर गरेको उत्प्रेषणसम्बन्धी रिटमा सर्वोच्च अदालतले अन्तरिम आदेशका लागि दुवै पक्षलाई असोज २३ गते छलफलमा बोलाएको छ ।

रिटमा मुद्दाको अन्तिम टुंगो नलागेसम्म अघिल्लो सरकारले प्रदेशसभामा प्रस्तुत गरेको बजेटबाहेक नयाँ बजेटको प्रक्रिया अघि नबढाउन अन्तरिम आदेश माग गरिएको उपाध्यायले बताए ।

सर्वोच्चले दुवै पक्षलाई छलफलमा बोलाएपछि नयाँ बजेट ल्याउने कि नल्याउने भन्नेमा सरकार अन्योलमा परेको एक मन्त्रीले बताए । यसअघि बुधबार नै बजेट ल्याउने सरकारको तयारी थियो । तर, बजेट स्वीकृत गर्ने मन्त्रिपरिषद् बैठक बस्न नसकेपछि प्रदेशसभा बैठकसमेत स्थगित गरिएको हो ।

सरकारले पटक–पटक बजेट ल्याउने मिति तोक्दै आए पनि प्रक्रिया टुंग्याउन नसक्दा चालु आर्थिक वर्ष सुरु भएदेखि नै सुदूरपश्चिम प्रदेश बजेटविहीन छ । बजेट पारित हुन नसक्दा प्रदेशका नियमित विकास निर्माण तथा प्रशासनिक कामसमेत प्रभावित हुँदै आएका छन् ।

सम्बन्धित समाचार

साल्ट ट्रेडिङको सुपथ मूल्य पसलमा उपभोक्ताको लाइन सुदूरपश्चिममा बजेट निर्माणमै अन्योल, असोज दोस्रो साताको भाका पनि टर्दै शनिवारीय महिला उद्यम बजार असोज २४ गतेदेखि पुनः सञ्चालन हुने सुदूरपश्चिममा आज रातिदेखि वर्षा बढ्ने, चार जिल्ला उच्च जोखिममा यस्तो छ आजका लागि विदेशी मुद्राको विनिमयदर सीमामा पर्यटकलाई स्वागत अर्थमन्त्री डा. स्वर्णिम वाग्ले अमेरिका प्रस्थान अर्थमन्त्री डा. वाग्ले र विश्व बैंक समूहका अध्यक्ष अजय बाङ्गाबीच अमेरिकामा उच्चस्तरीय द्विपक्षीय भेटवार्ता