खोटाङ । खोटाङको दिक्तेलबजारमा “प्रथम राष्ट्रिय बाँस सम्मेलन–२०८१” को औपचारिक उद्घाटन गरिएको छ । “जहाँ बाँस त्यहाँ जीवन, जहाँ जीवन त्यहाँ बाँस” भन्ने मूल नारासहित आयोजित सम्मेलनको संघीय वन तथा वातावरण मन्त्री ऐनबहादुर शाही ठकुरीले यलम्बर बाजा बजाएर उद्घाटन गरेका हुन् ।

दिक्तेलबजारस्थित माटिकोरे कभर्ड हलमा आयोजित उद्घाटन समारोहमा स्थानीय किरात समुदायको परम्परागत मौलिक बाजाको रुपमा परिचित यलम्बर बाजा प्रयोग गरिएको थियो, जुन बाँसबाटै निर्माण गरिने लोकबाजा हो । सम्मेलनमा संघीय मन्त्रीहरु, विभिन्न प्रदेशका मन्त्रीहरु, सांसदहरु, कोशी प्रदेशका गभर्नर महाप्रसाद अधिकारी, विभिन्न विश्वविद्यालयका प्राध्यापक एवं विशेषज्ञहरु, वन मन्त्रालयका विशिष्ट कर्मचारीहरु लगायतको उपस्थिति रहेको छ ।

साथै राष्ट्रिय तथा अन्तर्राष्ट्रिय गैरसरकारी संघसंस्थाका प्रमुख तथा प्रतिनिधिहरु र बाँस व्यवसायी लगायत विविध क्षेत्रका व्यक्तित्वहरुको पनि उल्लेखनीय सहभागिता रहेको मेयर तीर्थराज भट्टराईले जानकारी दिए । आयोजक दिक्तेल रुपाकोट मझुवागढी नगरपालिकाले जिल्ला बाहिरबाट विज्ञहरुसहित करिब साढे तीन सयजनाको सहभागिता रहेको उल्लेख गरेको छ। सहभागीहरुको आवासको व्यवस्था होटल व्यवसायी संघ खोटाङसँगको समन्वयमा मिलाइएको छ ।

सम्मेलनमा जिल्ला बाहिरबाट २८ र जिल्लाभित्रबाट ५२ भन्दा बढी स्टलहरु राखिएको छ, जहाँ विविध बाँसजन्य उत्पादन तथा प्रविधिहरु प्रदर्शनीमा राखिएका छन् । फागुन १७ गतेसम्म चल्ने यस तीन दिवसीय सम्मेलनको मुख्य उद्देश्य बाँसको संरक्षण, व्यवस्थापन, दिगो उपयोग र उद्यमशीलता प्रवद्र्धन गर्दै प्रकृतिको संरक्षण, स्थानीय रोजगारी तथा राष्ट्रिय अर्थतन्त्रमा वृद्धि गरी समृद्ध स्थानीय तह, प्रदेश र राष्ट्र निर्माणमा योगदान पुर्याउनु रहेको छ । सम्मेलनको अवधिमा बाँसजन्य सामग्रीहरुको प्रदर्शनी तथा बिक्री वितरणका साथै विज्ञहरुबाट विविध कार्यपत्रहरु प्रस्तुत गरिँदैछ । सम्मेलनमा बाँससँग सम्बन्धित ४४ जना विशिष्ट व्यक्तिहरुबाट कुल २३ वटा कार्यपत्र प्रस्तुत हुने कार्यक्रम रहेको छ ।

दिक्तेल नगरप्रमुख भट्टराईले यस सम्मेलनले केवल तीन दिने औपचारिक कार्यक्रमको रुपमा मात्र सीमित नरही राष्ट्रिय स्तरमै बाँससम्बन्धी नीति निर्माणमा महत्वपूर्ण भूमिका खेल्ने विश्वास व्यक्त गरे । उनका अनुसार सम्मेलनबाट दिक्तेल घोषणापत्र सार्वजनिक गरिने र सोही घोषणापत्रका आधारमा नेपालभर लागु हुने बाँससम्बन्धी नीति तयार हुनेछ ।

सम्मेलनको क्रममा यलम्बर बाजा, बाँसुरी, बिनायो लगायत विविध बाँसजन्य बाजाहरु बजाउने कार्यक्रम पनि समावेश गरिएको छ । साथै बाँसको महत्व र उपयोगिता प्रवद्र्धन गर्न परम्परागत लिङ्गे पिङ खेल्ने, बाँसमाथि चढेर भाले झिक्ने प्रतियोगिता लगायत विविध सांस्कृतिक तथा मनोरञ्जनात्मक कार्यक्रमहरुको पनि आयोजना गरिएको नगरपालिकाले जनाएको छ ।

सम्बन्धित समाचार

२८ बिदेशीसहित जनप्रतिनिधिहरु जुटे श्रमदानमा सङ्खुवासभामा मुआब्जा वितरणबाट ५ करोड बढी राजश्व इलामको ठ्याउरे खोलाको फ्याउरे सिँचाई योजना अलपत्र प्रथम राष्ट्रिय बाँस सम्मेलनमा सहभागीको दिक्तेल आगमन सुरु सात महिनामा २६ अर्ब ८४ करोडको लगानी प्रतिबद्धता सडकमा फोहोर खाँदै हिड्ने चौधरीले पाए नागरिकता घरजग्गाको कारोबारमा शिथिलता यथावतै बलान विहुलले कार्यसम्पादन मूल्यांकनमा बाजी मार्‍यो बिस्कुट उद्योगले ९७ जना मजदुर निकालिएपछि आन्दोलन लमजुङ क्याम्पसले नगरपालिकासँग सहकार्य गर्ने तुलसीपुर उपमहानगरमा अनावश्यक खर्चमा व्यापक कटौती पर्यटन प्रर्वद्धनमा सुरक्षाकर्मी र होटल व्यवसायीको समन्वय