काठमाडौं । बिगतमा नयाँ वर्षमा नेपाली चलचित्रको व्यापार निकै राम्रो हुने गरेको थियो । तर, यो नयाँ वर्षमा नेपाली चलचित्रले उल्लेख्य व्यापार गर्न सकेन । पछिल्लो दुई महिना यताबाट सुरु भएको नेपाली चलचित्रको व्यवासायिक असफलताको क्रम अहिले पनि जारी छ । नयाँ वर्षको अवसर पारेर २७ चैतमा रिलिज भएको नेपाली चलचित्र ‘राम नाम सत्य’को व्यापार पनि उत्साहजनक छैन ।

चलचित्र विकास बोर्डले सोमबार जारी गरेको बक्स अफिस रिपोर्ट अनुसार यो चलचित्रले पहिलो सातामा बक्स अफिसमा कुल २ करोड ७८ लाख १८ हजार ८४१ रुपैयाँको व्यापार गरेको छ । चलचित्रको लागत अनुसार पहिलो साताको व्यापारलाई न्यून मानिएको छ ।

बिराज भट्ट, सुपुष्पा भट्ट, सुशील श्रेष्ठ, दिव्या रायमाझी, सुनिल थापा, प्रशान्त ताम्राकार, आयुष सिंह ठकुरी, खुसी कार्की लगायतका कलाकारहरूको मुख्य भूमिका रहेको यो चलचित्र गत शुक्रवार रिलिज भएको थियो । चलचित्र ‘राम नाम सत्य’लाई शनिवार रातीसम्म ९ दिनमा ९७ हजार २०६ जना दर्शकले चलचित्र घरमा टिकट काटेर हेरेको बोर्डले जनाएको छ ।

माइकल इन्टरटेन्मेन्ट हाउसको प्रस्तुति रहेको यो चलचित्रलाई माइकल चन्दले निर्देशन गरेका हुन् । चलचित्रको लागत मात्रै करिब चार करोड रुपैयाँ रहेको छ । यो चलचित्रले आफ्नो लागत उठाउन चलचित्र घरमा १० करोडको व्यापार गर्नु पर्नेछ । पहिलो सातामा पौने तीन करोडको व्यापार गरेको यो चलचित्र अझै पनि ठुलो घाटामा छ ।

यस्तै गत मंगलबार १ वैशाखमा रिलिज भएको तुलसी घिमिरे निर्देशित चलचित्र ‘पहाड’को व्यापार पनि उत्साहजनक छैन । यो चलचित्रले रिलिज भएको पाँच दिनमा नेपालको बक्स अफिसमा जम्मा ४६ लाख ७६ हजार ६३७ रुपैयाँको व्यापार गरेको छ । यो चलचित्रलाई रिलिज भएको पाँच दिनमा १४ हजार ३१८ जना दर्शकले चलचित्र घरमा यसलाई हेरेर बोर्डको बक्स अफिस रिपोर्टमा उल्लेख गरिएको छ ।

सुरुको दुई दिनमा चलचित्र ‘पहाड’को राम्रो व्यापार थियो । तर तेस्रो दिनबाट यसको व्यापार खस्कन सुरु भएको हो । पाँचौँ दिनमा आइपुग्दा शनिवार समेत चलचित्रले राम्रो व्यापार गर्न सकेको छैन । चलचित्र ‘पहाड’को स्क्रिप्ट कमजोर भएको टिप्पणी समीक्षकहरूले गरिरहेका छन् ।

यो चलचित्रमा शिव श्रेष्ठ, मदनकृष्ण श्रेष्ठ, सुनिल थापा, अरुण क्षत्री, पञ्चमी घिमिरेको मुख्य भूमिका रहेको छ । चलचित्रलाई निर्देशक घिमिरे आफैँले लेखेका हुन् । आठ वर्ष पछि चलचित्र निर्देशनमा फर्किएका तुलसीले यस पटक पनि राम्रो चलचित्र दिन सकेनन् । दुई करोड भन्दा माथिको बजेटमा निर्माण भएको यो चलचित्रले लगानी उठाउन मात्र करिब पाँच करोडको व्यापार गर्नु पर्ने हुन्छ । तर पहिलो साताको व्यापार हेर्दा चलचित्र घरबाट यसले लगानी उठाउने सम्भावना न्यून छ ।

अब ११ वैशाखबाट चलचित्र ‘परालको आगो’ रिलिज हुँदै छ । सुहाना थापा, प्रकाश सपुत, सौगात मल्ललगायतको अभिनय रहेको ‘परालको आगो’ रिलिजसँगै यति बेला प्रदर्शन भइरहेको चलचित्र ‘राम नाम सत्य’ र ‘पहाड’को व्यापारमा ठुलो प्रभाव पर्ने छ ।

सम्बन्धित समाचार

उषा खड्गीको जाहेरीपछि जीपी तिमल्सिना पक्राउ श्रष्टा सुवेदीलाई ‘चुडामणि साहित्य पुरस्कार’ चलचित्र ‘कुम्भ’ले रोज्यो प्रदर्शन मिति पहिलो उपन्यास ‘सलह’ लिएर आए कवि श्रवण राष्ट्रिय कौराहा सम्मेलन सुरु ‘परालको आगो’ ट्रेलरमा लोग्ने स्वानीको झगडा प्रसँग ‘वल्ड अफ डान्स नेपाल २०२६’ सुरु केकीले थालिन चलचित्र ‘स्टेसन’को निर्माण