काठमाडौं । हास्यव्यंग्य शृंखला ‘भद्रगोल’ र ‘सक्किगोनी’मा लामो समयसम्म सँगै काम गरेका कलाकार कुमार कट्टेल ‘जिग्री’ र दीपक प्रसाद आचार्य ‘काकु’बिच दुई वर्ष यता सम्बन्ध राम्रो थिएन । तर यति बेला चलचित्र ‘चिरञ्जीवी भव’बाट यी दुई जोडिएका छन् । अब आफूहरू सँगै अघि बढ्ने पनि यी दुईले बताएका छन् । यी दुवैले संयुक्त लगानीमा सोमबारबाट नयाँ चलचित्र ‘चिरञ्जीवी भव’ निर्माण सुरु गरेका छन् ।

कुमार कट्टेलले दुई वर्ष अघि आफ्नो निर्देशनमा बनेको चलचित्र ‘लाज शरणम्’मा एक मुख्य भूमिकामा दीपकलाई लिने भनेका थिए । तर उनको ठाउँमा अर्का अभिनेता महेश त्रिपाठीलाई लिएपछि ‘सक्किगोनी’बाट समेत दीपक अलग भएका थिए । पछि यो टिमबाट अर्जुन घिमिरे ‘पाँडे’ पनि अलग भएपछि ‘सक्किगोनी’ नै सक्कियो ।

सोही झोकमा दीपकले चलचित्र ‘परान’ निर्माण गरे । ‘परान’ले गत वर्षकै सबैभन्दा बढी व्यापार गर्ने चलचित्रको रेकर्ड राख्यो । कुमारको ‘लाज शरणम’ व्यावसायिक रूपमा सफल हुन सकेन । त्यसपछि बल्ल कुमार र दीपक नयाँ चलचित्र ‘चिरञ्जीवी भव’को लागि यति बेला जोडिएका हुन् । सोमबार ललितपुरको बंगलामुखीमन्दिरमा ‘चिरञ्जीवी भव’को शुभ मुहूर्त गर्दै यी दुईले यो चलचित्रको निर्माण सुरु गरेका छन् । यो चलचित्रको छायांकन भने १५ जेठबाट धनकुटादेखि सुरु गर्ने दीपकले जानकारी गराए ।

यो चलचित्रमा हरिवंश आचार्य, आशीर्वाद क्षेत्री, प्रियंका कार्की, सुवर्ण थापा, कमलमणि नेपाल, सरोज अर्याल, प्रशंसा रायमाझी, हरिस निरौला (कक्रोज), सुमन कार्की, सुस्मिता कुँवरलगायतका कलाकारको मुख्य भूमिका रहने छ ।

कुमारको जिग्री इन्टरटेनमेन्ट र दीपकको प्रिमियर प्रोडक्सनले यो चलचित्र निर्माण गर्दै छ । ‘चिरञ्जीवी भव’को निर्देशन दीपकले गर्दै छन् । यी दुवैले यो चलचित्र लेखेका हुन् । सामाजिक विषयमा निर्माण हुने ‘चिरञ्जीवी भव’ले दुई पुस्ताबिचको वैचारिक भिन्नता र सम्बन्धको कथालाई प्रस्तुत गर्ने निर्देशक दीपकले राजधानीलाई बताए ।

सम्बन्धित समाचार

जहाँ गुञ्जिँदै छन् प्रगतिशील सुरहरू, नयाँ पुस्ताका लागि चीनमा नेपाली चलचित्रको प्रदर्शनमा सरकारी चासो फिल्म ‘लालीबजार’ को प्रदर्शन रोक्न अस्विकार चलचित्र ‘आँखा’लाई ‘निर्देशन–क्राफ्ट’मा ‘गोल्ड अवार्ड’ महिला आयोग पुगेर नोराले पनि मागिन माफी सामाजिक सञ्जालमा गाली आएपछि साइबर ब्युरो पुगे रामकृष्ण महंगियो चलचित्र सम्बन्धी संघ संस्थाका उम्मेदवारी दस्तुर चलचित्र ‘आइ एम जीत बहादुर’ शीर्ष गीत सार्वजनिक