धनगढी । सुदूरपश्चिम प्रदेशका नवनियुक्त भौतिक पूर्वाधार विकासमन्त्री ओमविक्रम भाट ‘सरल’ ले मन्त्रालयअन्तर्गत सञ्चालित बहुवर्षीय ठेक्काको अवस्था अध्ययन गर्न समिति गठन गरेका छन् । सोमबार पदभार ग्रहण गर्दै मन्त्री भाटले तीनवटा निर्णयमा हस्ताक्षर गरेका हुन् ।

मन्त्रालयको प्रादेशिक सडक तथा यातायात व्यवस्थापन महाशाखाका प्रमुख सिनियर डिभिजनल इन्जिनियर रामचन्द्र खत्रीको संयोजकत्वमा गठित समितिमा मन्त्रालयका सम्बन्धित महाशाखा प्रमुखहरू सदस्य छन् । समितिलाई बहुवर्षीय ठेक्काको अध्ययन गरी एक महिनाभित्र प्रतिवेदन बुझाउन समय दिइएको छ ।

समितिको प्रतिवेदनका आधारमा लामो समयदेखि काम अघि बढ्न नसकेका बहुवर्षीय ठेक्का’bout आवश्यक निर्णय लिइने मन्त्री भाटले बताए । वर्षौँदेखि ठेक्का अलपत्र हुँदा नागरिकले सास्ती भोग्नुपरेको उल्लेख गर्दै उनले सम्बन्धित निर्माण व्यवसायीलाई काममा फर्काउने र काम अघि नबढाउने ठेक्का रद्द गर्ने चेतावनी दिए ।

यसैगरी, कैलालीको चिसापानीदेखि कञ्चनपुरको गड्डाचौकीसम्मको राजमार्ग तथा धनगढी–अत्तरिया सडकखण्डमा दुर्घटना न्यूनीकरणका उपाय पहिचान गर्न अर्को समिति गठन गर्ने निर्णय पनि गरिएको छ । उक्त समितिको संयोजकमा पनि इन्जिनियर खत्रीलाई तोकिएको छ । मन्त्रालयका सचिव विष्णु भण्डारीका अनुसार समितिले १५ दिनभित्र प्रतिवेदन बुझाउनुपर्नेछ ।

सडक दुर्घटना न्यूनीकरणका लागि सडक बत्ती, ट्राफिक व्यवस्थापनलगायतका क्षेत्रमा आवश्यक काम अघि बढाइने मन्त्री भाटले बताए । उनले मन्त्रालयको काममा सुशासन र पारदर्शिता कायम गर्ने प्रतिबद्धता पनि व्यक्त गरे ।

मन्त्री भाटले प्रदेशको बजेट निर्माण प्रक्रियालाई समेत तीव्रता दिइने बताए । भूगोल, जनसंख्या र स्थानीय आवश्यकताका आधारमा योजना छनोट गरी बजेट निर्माण प्रक्रिया अघि बढाउने उनको भनाइ छ ।

सम्बन्धित समाचार

एक करोड ९४ लाख राजस्व सङ्कलन सुन तोलामै ६ हजार ४०० रुपैयाँले बढ्यो, कतिमा भइराखेको छ आज कारोबार ? ग्लोबल आइएमई बैंकको नाइमा अफर सेती प्रादेशिक अस्पतालमा विस्तारित सेवा बन्द सुदूरपश्चिम सरकार गठन : भोलि बिहान ११ बजेभित्र दाबी पेस गर्न आह्वान बाजुराका ठाउँठाउँमा बाढी पहिरोको वितण्डा नाइमा मोबिलिटी एक्स्पोको आज अन्तिम दिन, लक्ष्यभन्दा बढीले अवलोकन गरिसकेको दाबी चिनियाँ युआन एकको बिक्रीदर २२ रुपैयाँ ६९ पैसा हुँदा अन्य विदेशी मुद्राको कति ?