काठमाडौं । गत प्रतिनिधिसभा निर्वाचनमा कमजोर नतिजा बेहोरेपछि आन्तरिक असन्तुष्टि र सांगठनिक चुनौती सामना गरिरहेको नेकपा एमालेले पार्टी पंक्तिमा नयाँ उत्साह भर्ने उद्देश्यसहित राष्ट्रिय कार्यकर्ता भेला आयोजनामा जुटेको छ ।

आगामी २ र ३ मंसिरमा काठमाडौंमा हुने भेलालाई पार्टीले आगामी निर्वाचनको तयारी, संगठनात्मक पुनर्संरचना र राजनीतिक कार्यदिशामा साझा बुझाइ निर्माण गर्ने अवसरका रूपमा अघि सारेको छ ।

भेला एमालेका लागि नियमित सांगठनिक कार्यक्रम मात्रै नभइ निर्वाचनको धक्कापछि नेतृत्वमाथि उठेका प्रश्न, पार्टीभित्र देखिएको असन्तुष्टि, कार्यकर्ता तहको निराशा र अध्यक्ष केपी शर्मा ओली तथा वरिष्ठ नेता विद्यादेवी भण्डारीबीच विकसित नयाँ सम्बन्धको परीक्षण समेत हुने एमाले नेताहरु बताउँछन् ।

भेलामा केन्द्रीय कमिटी, केन्द्रीय निकाय, प्रदेश तथा जिल्ला कमिटीका पदाधिकारी, पालिका कमिटीका अध्यक्ष र उपाध्यक्ष, जनसंगठनका प्रतिनिधि तथा विभिन्न तहका जनप्रतिनिधिसहित ३ हजार १ सय ६४ जना सहभागी हुनेछन् । पार्टी सचिव तथा संगठन विभाग प्रमुख भानुभक्त ढकालको संयोजनमा तयारी भइरहेको भेलामा अध्यक्ष ओली, वरिष्ठ नेता भण्डारी, उपाध्यक्ष विष्णु पौडेल र महासचिव शंकर पोखरेलले सम्बोधन गर्ने कार्यक्रम छ । पार्टीले सहभागीलाई निजी सवारीसाधनको सट्टा सार्वजनिक यातायात प्रयोग गर्न आग्रह गरेको छ ।

भेलामा तीनवटा मुख्य प्रतिवेदन तथा प्रस्तावमाथि छलफल हुनेछ । पहिलो, अध्यक्ष ओलीले केन्द्रीय कमिटी बैठकमा प्रस्तुत गरी पारित गराएको राजनीतिक प्रतिवेदनको सारसंक्षेप पेस हुनेछ । यसमा गत २१ फागुनमा सम्पन्न प्रतिनिधिसभा निर्वाचनको समीक्षा, जेनजी आन्दोलनपछि बदलिएको राजनीतिक परिस्थिति, वर्तमान सरकारका कदमप्रतिको पार्टीको दृष्टिकोण र लोकतन्त्र तथा संविधानको रक्षाका लागि एमालेले खेल्नुपर्ने भूमिका’bout चर्चा हुनेछ ।

संगठन विभाग प्रमुख ढकालले सांगठनिक प्रतिवेदन र अधिवेशन कार्ययोजना प्रस्तुत गर्ने कार्यसूची छ । पार्टीभित्र देखिएको गुटबन्दी, अनुशासनहीनता र सांगठनिक अराजकता अन्त्य गर्ने, सदस्यता व्यवस्थापन गर्ने तथा तल्लो तहसम्म कमिटी पुनर्गठन गर्ने विषय यसमा समेटिनेछ । २६ मंसिरमा वडा अधिवेशन र ४ पुसमा पालिका अधिवेशन गर्ने कार्यतालिकालाई प्रभावकारी बनाउने तथा अधिवेशन हुन बाँकी जिल्ला कमिटीलाई आयोजक कमिटीमा रूपान्तरण गर्ने विषय पनि छलफल हुने बताइएको छ ।

भेलामा आगामी स्थानीय तह निर्वाचन केन्द्रित रणनीति र समसामयिक प्रस्तावमाथि छलफल हुनेछ । देशभरबाट आएका प्रतिनिधिको सुझाव संकलन गरी पार्टीको सम्पूर्ण शक्ति निर्वाचनमा परिचालन गर्ने योजना एमालेको छ । भोटेकोशी बाढीपहिरोलगायत प्राकृतिक विपद्पछिको पुनर्निर्माण, जनजीविका, रोजगारी र आर्थिक सुधारका विषय पनि समसामयिक प्रस्तावमा समेटिने छ ।

एमाले महासचिव शंकर पोखरेलका अनुसार भेलाको उद्देश्य आगामी स्थानीय निर्वाचनलाई केन्द्रमा राखेर देशभरका नेता तथा कार्यकर्तामाझ एकीकृत र स्पष्ट सन्देश प्रवाह गर्नु रहेको छ ।

उनले वडा र पालिका अधिवेशनलाई व्यवस्थित र एकताबद्ध रूपमा सम्पन्न गर्ने वातावरण निर्माण गर्न तथा पार्टी पंक्तिमा नयाँ जागरण ल्याउन भेलाले भूमिका खेल्ने बताएका छन् । प्रचार विभाग प्रमुख निरज आचार्यले देशभरबाट आउने कार्यकर्ताको सुझावका आधारमा पार्टीको सम्पूर्ण शक्तिलाई चुनावकेन्द्रित गरिने बताए ।

ओली–विद्या सहकार्यको परीक्षण
एमालेको पछिल्लो आन्तरिक शक्ति समीकरणमा आएको परिवर्तनपछि राष्ट्रिय भेला हुन लागेको हो । पूर्वराष्ट्रपति विद्यादेवी भण्डारी सक्रिय राजनीतिमा फर्कन खोज्दा अध्यक्ष ओलीसँग दूरी बढेको थियो । २०८२ असारमा उनको सदस्यता नवीकरणको विषय विवादमा परेको थियो । ओलीले पूर्वराष्ट्रपति सक्रिय दलगत राजनीतिमा फर्कनु उपयुक्त नहुने तर्क अघि सारेका थिए । तर, गत असोजमा बसेको केन्द्रीय कमिटी बैठकमा ओलीकै प्रस्तावमा भण्डारीलाई पार्टीको वरिष्ठ नेता बनाउने निर्णय भयो ।

भण्डारीलाई वरिष्ठ नेता बनाउने निर्णयलाई एमालेभित्रको शक्ति सन्तुलनमा आएको परिवर्तनका रूपमा हेरिएको नेता कार्यकर्ताहरु बताउँछन् ।

गत निर्वाचनमा पार्टीले अपेक्षित नतिजा ल्याउन नसकेपछि ओलीनिकट मानिएका उपाध्यक्ष विष्णु पौडेल, महासचिव पोखरेल र पृथ्वीसुब्बा गुरुङलगायत नेताहरूबाटै नेतृत्व र पार्टी पुनर्गठनको बहस उठेको थियो । त्यसपछि ओली र भण्डारीबीच संवाद अघि बढेको र सम्बन्ध सुधारको वातावरण बनेको हो ।

भण्डारीको वरिष्ठ नेताका रूपमा पुनरागमनले तत्कालका लागि पार्टीभित्र नेतृत्व परिवर्तनको बहसलाई मत्थर पार्न र असन्तुष्ट पक्षलाई एउटै राजनीतिक मञ्चमा ल्याउन मद्दत गर्ने उमाले पंक्तिको विश्वास छ । भण्डारीलाई पार्टी सञ्चालन र निर्णय प्रक्रियामा कति भूमिका दिइन्छ भन्ने विषयले ओली–विद्या सम्बन्धको दिशा निर्धारण गर्ने नेताहरु बताउँछन् ।

भेलाको बाह्य राजनीतिक प्रभाव पनि एमालेले तय गर्ने कार्यदिशामा निर्भर हुनेछ । सरकारले चालेका कदम, सुशासन, महँगी, भ्रष्टाचार र जनजीविकाका सवालमा सडक तथा सदनबाट दबाब सिर्जना गर्ने निर्णयलाई एमालेले कसरी कार्यान्वयन गर्छ भन्नेले सरकारप्रतिको उसको प्रतिपक्षी भूमिकालाई आकार दिनेछ ।

एमालेले यो भेलाबाट स्थानीय निर्वाचनका लागि राजनीतिक सन्देश, संगठन परिचालनको योजना र कार्यकर्तामा उत्साह निर्माण गर्ने लक्ष्य राखेको छ । त्यसको सफलता भने भेलामा पारित हुने प्रस्तावभन्दा पनि त्यसपछिका अधिवेशन, संगठन पुनर्गठन र नेतृत्वको व्यवहारमा देखिनुपर्ने कार्यकर्ताको माग छ

सम्बन्धित समाचार

निरन्तर छलफलमा रास्वपा सभापति रवि लामिछाने बालेन सरकार ‘रुल बाइ ल’ अनुसार चलेको गगन थापाको आरोप विवादित न्यायाधीशविरुद्ध महाभियोग प्रस्ताववारे कांग्रेस ‘पर्ख र हेर’ मा कार्यभार सम्हाल्न नेपाल आइपुगे भारतका नवनियुक्त राजदूत दलेला पार्टी नेतृत्व र वैधानिकतामाथि भ्रम फैलाउने प्रयासको सशक्त प्रतिवाद गर्ने कांग्रेसको निर्णय विश्वमा बढ्दो तापक्रमले तताएको बहस छठ मनाउन रवि लामिछाने सर्वसाधारणको घरमा बस्ने, श्रीमतीसहित व्रतमा सहभागी हुने पशुपति विकास कोषमा बोर्ड सदस्यकै मिलेमतोमा अनियमितता