काठमाडौं । सत्तारूढ दल राष्ट्रिय स्वतन्त्र पार्टी (रास्वपा) नयाँ नेतृत्व चयनसहित अधिवेशनमा जुटेको छ । पार्टी गठनपछि पहिलोपटक रास्वपाले वडादेखि केन्द्रसम्म निर्वाचन विधिमार्फत नेतृत्व चयन गर्दैछ । वडा, पालिका, जिल्ला, प्रदेश अधिवेशन सम्पन्न गर्दै रास्वपाले आगामी ७, ८ र ९ असारमा चितवनमा पहिलो महाधिवेशन गर्न लागेको हो ।

रास्वपाले सार्वजनिक गरेको अधिवेशन कार्यक्रमअनुसार शनिबार र आइतबार जिल्ला अधिवेशन भएको छ । कतै शान्तिपूर्ण जिल्ला अधिवेशन सम्पन्न भएको छ भने केही जिल्लामा स्थगित भएको छ । झैझगडा, हात हालाहाल, नाराबाजीसहित विविध कारणले विवाद भएर केही जिल्लामा अधिवेशन स्थगित भएको छ ।

पहिलो ऐतिहासिक जिल्ला अधिवेशन देशभर सुरु भए पनि ७७ वटै जिल्लामा अधिवेशन सम्पन्न भएको छैन । रास्वपाले आगामी प्रथम राष्ट्रिय महाधिवेशन अगावै ६७ जिल्लामा मात्र अधिवेशन सम्पन्न गर्ने लक्ष्य राखेको छ । बाँकी १० जिल्लाको अधिवेशन भने महाधिवेशनपछि क्रमशः गरिने जनाएको छ ।

शनिबार र आइतबारमा कोशी प्रदेशका ८ जिल्लामा अधिवेशन सम्पन्न भएको छ । कोशी प्रदेशको झापा, मोरङ, सुनसरी, तेह्रथुम, ताप्लेजुङ, भोजपुर, संखुवासभा र ओखलढुंगा जिल्ला अधिवेशन सम्पन्न भएको छ ।

बागमती प्रदेशको काठमाडौं, भक्तपुर, नुवाकोट, धादिङ, मकवानपुर, काभ्रेपलान्चोक, दोलखा, रामेछाप र सिन्धुली, गण्डकी प्रदेशको स्याङ्जा, कास्की, पर्वत, बागलुङ र म्याग्दी, लुम्बिनी प्रदेशको गुल्मी, नवलपरासी, पाल्पा, कपिलवस्तु, दाङ, बाँके, बर्दिया र रोल्पा, कर्णाली प्रदेशको कालिकोट र सल्यान, सुदूरपश्चिम प्रदेशको बैतडी, बझाङ र दार्चुलासहितका जिल्लामा जिल्ला अधिवेशन सम्पन्न भएको छ ।

आन्तरिक विवाद, प्रक्रियागत त्रुटि, प्राविधिकसहित विभिन्न कारणले केही जिल्लामा जिल्ला अधिवेशन स्थगित भएको छ । महोत्तरीमा प्रतिनिधि छनोट र नेतृत्व चयनलाई लिएर दुई पक्षबीच तीव्र मतभेद भएपछि सुरक्षाको कारण देखाउँदै अधिवेशन अनिश्चितकालका लागि स्थगित गरिएको छ ।

सर्लाहीमा पालिका अधिवेशनका कागजात अपूर्ण रहेको, स्वीकृत कार्यविधिअनुसार प्राविधिक त्रुटि देखिएको र समूहगत विवाद बढेपछि अधिवेशन अनिश्चितकालका लागि स्थगित गरिएको छ ।

जिल्ला निर्वाचन संयोजक डा. जयप्रकाश महतोले मतदाता नामावली, पालिका अधिवेशनका कागजात र प्रतिनिधि विवरण अद्यावधिक नभएकाले निर्वाचन स्थगित गरिएको बताए । वर्तमान जिल्ला सभापति सरोज बानियाँले डिजिटल पोर्टलमा विवरण अद्यावधिक गर्ने क्रममा त्रुटि भएको भन्दै छानबिन र कारबाहीको माग गरेका छन् ।

सिन्धुपाल्चोकमा शनिबार सुरु भएको अधिवेशन आन्तरिक विवादका कारण बीचमै स्थगित गरिएको छ । कार्यवाहक सभापति पासाङ तामाङले आकांक्षीबीच सहमति खोज्न समय लागेको हुँदा अधिवेशन स्थगित गर्नुपरेको जनाएका छन् । अधिवेशनका लागि नयाँ मिति तोकिएको छैन । अधिवेशन गराउनका लागि पार्टीले खटाएका निर्वाचन समितिका सदस्य बिरामी परेर शनिबार नै काठमाडौं फर्केका थिए ।

बारामा विशेष सांगठनिक परिस्थितिका कारण अधिवेशन पहिले नै २६ जेठका लागि तय गरिएको छ । रास्वपा बाराका नेता÷कार्यकर्ताले आइतबार काठमाडौंको वनस्थलीस्थित पार्टी केन्द्रीय कार्यालय घेराऊ गर्दै नाराबाजी गरेका छन् । जिल्ला अधिवेशनबाट निर्वाचित पदाधिकारीहरूलाई पार्टी नेतृत्वले मान्यता नदिएको आरोप लगाउँदै उनीहरू विरोधमा उत्रिएका हुन् ।

धर्नामा सहभागी नेता–कार्यकर्ताहरूले लोकतान्त्रिक प्रक्रियाबाट निर्वाचित नेतृत्वमाथि अन्याय भएको दाबी गर्दै पार्टी नेतृत्वको निर्णयप्रति असन्तुष्टि व्यक्त गरेका छन् । उनीहरूले जिल्ला अधिवेशनबाट निर्वाचित पदाधिकारीहरूको वैधानिकता स्वीकार गरी तत्काल जिम्मेवारी हस्तान्तरण गर्न मागसमेत गरेका छन् ।

कलैया उपमहानगरपालिकाको नगर अधिवेशनको निर्वाचन परिणाम र शपथग्रहण सकिएपछि पुनः निर्वाचन गराउने सूचना जारी भएपछि विवाद सिर्जना भएको हो । प्रदर्शनकारीहरूले बिनाहस्ताक्षर सामाजिक सञ्जालमार्फत निर्वाचन रद्द गरिएको भन्दै पार्टी नेतृत्वसँग स्पष्ट जवाफ र पारदर्शिताको माग समेत गरेका छन् ।

मनाङ र मुस्ताङका दुई हिमाली जिल्लामा वडा र पालिका अधिवेशन नै नभएकाले हाललाई जिल्ला अधिवेशन नगरिने निर्णय रास्वपाले गरेको छ ।

केही जिल्लामा नेतृत्व हत्याउने होडबाजी, प्रतिनिधि छनोटको विषयलाई लिएर विवाद, झैझगडा तथा कुटपिट भएका कारण स्थगित भएको छ । पर्साको वीरगन्जमा जिल्ला अधिवेशनको प्रतिनिधि चयन पारदर्शी नभएको भन्दै विवाद चर्किएपछि होटलभित्रै दुई पक्षबीच हेलमेट प्रहार र हानाहान भएको थियो । स्थिति नियन्त्रणमा लिन प्रहरीले लाठीचार्जसमेत गर्नु परेको थियो । निर्वाचन प्रक्रिया केही समय स्थगित भएको थियो ।

महोत्तरीमा क्षेत्रीय तथा नगर अधिवेशनदेखि नै सुरु भएको विवाद बन्दसत्रसम्म आइपुग्दा हातपात र कुटपिटमा परिणत भयो । जसमा ३ जना घाइतेसमेत भएका थिए । धनुषाको जनकपुरधाममा जिल्ला अध्यक्षले मनोमानी गरेको आरोप लगाउँदै असन्तुष्ट पक्षले जनकपुरधामस्थित जिल्ला पार्टी कार्यालयमा तालाबन्दी गरेको छ भने विवाद अझै कायम छ । यसअघि धनुषाका पालिका अधिवेशनमा पनि कार्यकर्ताबीच हात हालाहाल भएको थियो । जनकपुर उपमहानगरको अधिवेशन विवादपछि धनुषा जिल्लाको अधिवेशन २६ जेठका लागि सारिएको छ ।

सुनसरी जिल्ला अधिवेशनका क्रममा पनि प्रतिनिधिहरूबीच हात हालाहाल र विवाद भएको थियो । तर सुनसरीमा विवाद भए पनि जिल्ला अधिवेशन सम्पन्न भएको छ ।

जिल्ला अधिवेशन सम्पन्न गर्दै रास्वपाले प्रदेश अधिवेशन गर्ने कार्यतालिका रहेको छ । त्यसका लागि रास्वपाले प्रदेश अधिवेशन कार्यविधि पनि बनाइसकेको छ । रास्वपाले पार्टीको विधान २०७९ को तेस्रो संशोधन २०८१ को धारा ३१ बमोजिम ‘प्रदेश अधिवेशन कार्यविधि, २०८३’ बनाइसकेको छ । यसलाई १८ जेठको सचिवालय बैठकले अनुमोदन पनि गरिसकेको छ ।

रास्वपाले प्रदेश अधिवेशनको मितिसमेत तय गरिसकेको छ । २६ जेठबाट प्रदेश अधिवेशन सुरु हुनेछ । २६ जेठमा बागमती प्रदेश, २७ जेठमा कोशी प्रदेश, २८ गते मधेश प्रदेश, २९ गते गण्डकी प्रदेश, ३० गते लुम्बिनी प्रदेश, ३१ गते कर्णाली प्रदेश र १ असारमा सुदूरपश्चिम प्रदेशको अधिवेशन हुनेछ ।

त्यसपछि राष्ट्रिय महाधिवेशन चितवनमा हुने कार्यतालिका रास्वपाको छ । महाधिवेशनमा २ हजार ५ सयभन्दा बढी महाधिवेशन प्रतिनिधि सहभागी हुने बताउँदै आएको रास्वपाले पछिल्लो समय तीन हजार भन्दा बढी प्रतिनिधि सहभागी हुने जनाएको छ ।

मौजुदा केन्द्रीय समितिमा एक सभापति, २ उपसभापति, २ महामन्त्री, २ सहमहामन्त्री, एक कोषाध्यक्ष र एक सहकोषाध्यक्षसहित १२९ सदस्यीय केन्द्रीय सदस्य छन् । रास्वपाको केन्द्रीय समितिमा सात प्रदेशका सभापति पदेन सदस्य रहने व्यवस्था छ । तर अब विधान संशोधन गर्दै केन्द्रीय समितिमा पदाधिकारीको संख्या बढाउने तयारीसमेत पार्टी नेतृत्वले गरेको छ ।

सम्बन्धित समाचार

सार्वजनिक पदाधिकारीका धर्मपुत्रीदेखि सासुसम्मका सम्पत्ति उच्च निगरानीमा कर्णाली प्रदेश मन्त्रिपरिषद् बैठकका छ निर्णय सार्वजनिक संसद् सञ्चालनको ‘डीपी मोडल’: कानुन मिचिन्छ, चलन मानिन्न पाँच दिने भ्रमणको लागि दिल्ली उडे लामिछाने राष्ट्रिय सभामा प्रधानमन्त्रीको भनाइलाई लिएर विरोध नेविसंघको अध्यक्षमा करुणा कटुवाल वीरगञ्ज प्रमुख सिंहलाई धरौटीमा रिहा गर्न अदालतको आदेश रवि–मोदी भेट आज