मेक्सिको सिटी । मेक्सिकोमा शुक्रबार एक पत्रकारको गोली हानी हत्या गरिएको छ । मानव अधिकारसम्बन्धी गैरसरकारी संस्था ‘आर्टिकल १९’ का अनुसार यस वर्ष देशमा हत्या गरिएका पत्रकारको संख्या नौ पुगेको छ ।

५२ हजारभन्दा बढी फलोअर्स रहेको समाचार वेबसाइट ‘पिनोटेपा कोमुनिका’ का सञ्चालक ५२ वर्षीय हामुराबी हुएस्का मान्जानोको दक्षिणी राज्य ओआक्साकामा हत्या गरिएको हो ।

राज्यका अभियोजकका अनुसार, एक सशस्त्र समूहले हुएस्का मान्जानो र अन्य दुई जनामाथि गोली प्रहार गरेको थियो । गोली लागेर गम्भीर घाइते भएका उनको मृत्यु भएको हो ।

हुएस्का मान्जानोले सञ्चालन गरेको वेबसाइटले उनी बसोबास गर्ने सहर सान्टियागो पिनोटेपा नासिओनालका राजनीतिक तथा स्थानीय विषयमा समाचार प्रकाशन गर्दै आएको थियो । पत्रकारिताका अतिरिक्त उनी ट्याक्सी चालकका रूपमा पनि काम गर्थे ।

मानव अधिकार संस्था ‘आर्टिकल १९’ ले घटनाको अनुसन्धान गर्दा उनको पत्रकारितासम्बन्धी कामलाई प्राथमिकतामा राख्न अभियोजकको कार्यालयसँग माग गरेको छ । संस्थाले सामाजिक सञ्जाल एक्समार्फत पत्रकारको हत्याको निष्पक्ष अनुसन्धान गर्नसमेत आग्रह गरेको छ ।

पत्रकारहरूको सुरक्षा र प्रेस स्वतन्त्रताका दृष्टिले मेक्सिको विश्वकै जोखिमपूर्ण देशमध्ये एक मानिन्छ । ‘रिपोर्टर्स विदाउट बोर्डर्स’ का अनुसार सन् १९९४ यता मेक्सिकोमा १५० भन्दा बढी सञ्चारकर्मीको हत्या भइसकेको छ ।

पत्रकारमाथि हुने हिंसा र हत्याका घटनाले देशमा स्वतन्त्र पत्रकारिता तथा स्थानीय मुद्दाको रिपोर्टिङमा गम्भीर चुनौती खडा गर्दै आएका छन् ।

सम्बन्धित समाचार

इरानसँगको तनाव बढेपछि तेलको मूल्य बढ्यो, विश्व बजारमा दबाब ट्रम्प–सी भेटवार्तापछि अमेरिका र चीनद्वारा ३० अर्ब डलरका वस्तुमा भन्सार कटौती राजधानी टोकियोमा जनसंख्या बढ्दा जापानको अन्य प्रान्तमा जनसंख्या उल्लेख्य रुपमा घट्दो, वृद्ध नागरिक बढ्दो एक दशकपछि इराकबाट हट्दै अमेरिकी सेना विमान दुर्घटनामा पारेर सबै यात्रुलाई मार्ने सह–पाइलटको योजना भताभुंग, भारतीय पाइलटको सर्वत्र प्रशंसा दुबईका युवराजले भेटे फ्लाईदुबईका पाइलट स्मित मच्छर अन्तर्राष्ट्रिय न्यायको पक्षमा उभिएकी नावी पिल्लेलाई नोबेल शान्ति पुरस्कार रियाद विमानस्थल र साउदी विमानमा आक्रमण, कप्तानसहित ३ जनाको मृत्यु