काठमाडौं । इनम सापकोटा प्रकरण र नेपाल प्रहरीको महानिरीक्षक परिवर्तनले विपक्षी दलहरूमा तरंग उत्पन्न भएको छ ।

दलीय सहकार्यसँगै ठूला वामदल एकताको गृहकार्यमा

कांग्रेस सभापति गगन थापालाई १८ करोड रुपैयाँको आर्थिक लेनदेनमा मुछ्ने गरी अडियो सार्वजनिक भएको र त्यसलगत्तै सरकारले प्रहरी महानिरीक्षक दानबहादुर कार्कीलाई हटाएर मनोजकुमार केसीलाई नियुक्त गरेपछि आपसी दोषारोपणमा अल्झिरहेका विपक्षी तथा परम्परागत राजनीतिक दलहरू एकै ठाउँमा उभिन थालेका छन् ।

नेपाली कांग्रेस, नेकपा एमाले र नेपाली कम्युनिस्ट पार्टी (नेकपा) मात्र होइन, राष्ट्रिय प्रजातन्त्र पार्टी (राप्रपा) समेत सरकारका पछिल्ला गतिविधिविरुद्ध साझा धारणा बनाउन सक्रिय भएका छन् ।

आपसी दोषरोपणमा अल्झिरहेका विपक्षी र परम्परागत दललाई एकैपटक यो घटनाले एकठाउँमा उभ्याएको छ । कांग्रेस, एमाले र नेकपामात्र होइन राप्रपालाई समेत एठक ठाउँमा ल्याएको यो घटना बामपन्थीहरुबीचको एकीकरणको सुत्राधार पनि बन्ने देखिएको छ ।

एकताको बाँसुरी बजाइरहेका वामदल सरकारको कार्यशैलीको प्रतिरोध गर्ने र लोकतन्त्र तथा व्यवस्था बचाउने नाममा पार्टी एकीकरण गर्नेसम्मको एजेण्डा बोकेर घनिभूत छलफलमा जुटेका छन् ।

वामदल मिल्दा कांग्रेस भने एमाले र नेकपासँग सहकार्यका लागि तयार देखिएको छ । मधेश सरकारमा विश्वासको मतका नाममा सुरु भएको सत्ता सहकार्यको छलफल व्यवस्था बचाउने नाममा सडक सहकार्य सम्म पुग्न लागेको नेताहरु बताउँछन् ।

योसँगै इनम सापकोटा प्रकरणमा सार्वजनिक अडियोको निष्पक्ष अनुसन्धान, प्रहरी नेतृत्व परिवर्तनको औचित्य, पत्रकारमाथिको धरपकड, न्यायालयको स्वायत्तता र सरकारको स्वेच्छाचारी कार्यशैली विपक्षी दलका साझा चासो बनेका छन् ।

कांग्रेस सभापति थापाले बिहीबार भिडियो सन्देश जारी गर्दै आफूमाथि लागेको १८ करोड रुपैयाँको आर्थिक लेनदेनको आरोपलाई षड्यन्त्रको संज्ञा दिएका छन् । उनले पार्टीको आधिकारिकताको राजनीतिक तथा कानुनी लडाइँमा एक सुकाको पनि आर्थिक लेनदेन नभएको दाबी गर्दै सरकारमाथिको खबरदारी नरोकिने बताएका छन् ।

‘हामीले जतिखेर सरकारमाथि क्वेस्चन उठायौँ, ठ्याक्कै त्यही बेलाबाट एउटा म्यानुफ्याक्चर्ड न्यारेटिभ सुरु भएको छ । के यसले हामीलाई क्वेस्चन गर्ने कुरा हाम्रो बन्द हुन्छ ? हुँदैन,’ थापाले भनेका छन् ।

उनले इनम सापकोटाको भनिएको अडियोको निष्पक्ष अनुसन्धान हुनुपर्ने र त्यसमा जोडिएका सबै पक्षको भूमिका खोतल्नुपर्ने बताएका छन् । कांग्रेसका वरिष्ठ उपसभापति विश्वप्रकाश शर्माले पनि बुधबार पत्रकार सम्मेलन गरेर उक्त आरोपलाई बदनियतपूर्वक फैलाइएको हल्ला भन्दै खारेज गरेका थिए ।

इनम प्रकरण सार्वजनिक भएपछि कांग्रेसले राजनीतिक र कानुनी दुवै प्रतिवाद गर्ने रणनीति बनाएको छ । बिहीबार पार्टीका पदाधिकारीहरूको अनौपचारिक बैठक बोलाएर पछिल्लो राजनीतिक घटनाक्रम, पार्टी नेतृत्वमाथि लागेको आरोप र आईजीपी परिवर्तन’bout छलफल गर्ने तयारी गरेको छ । कांग्रेसले सरकारका पछिल्ला गतिविधि’bout संसदीय छानबिनको मागसमेत गर्दै आएको छ ।

यसअघि १६ कात्तिकमा कांग्रेसकै आह्वानमा सिंहदरबारस्थित संसदीय दलको कार्यालयमा बसेको विपक्षी दलहरूको बैठकले तत्काल संघीय संसद्को अधिवेशन बोलाउन माग गरेको थियो । बैठकमा कांग्रेस, एमाले, नेकपा र राप्रपासहितका दल सहभागी थिए । बैठकले अध्यादेशमार्फत शासन सञ्चालन गर्ने सरकारको प्रवृत्ति, प्रेस स्वतन्त्रतामाथिको हस्तक्षेप, न्यायालयको स्वायत्तता, संवैधानिक निकायको भूमिका, बाढीपहिरो प्रभावितको पुनःस्थापना र जनजीविकाका विषयमा साझा धारणा बनाउने निर्णय गरेको थियो ।

त्यसपछि इनम प्रकरणमा सार्वजनिक अडियोको अनुसन्धानका लागि संसदीय राज्य व्यवस्था तथा सुशासन समितिको बैठक बोलाउन नेकपा र राप्रपाका सांसदले छुट्टाछुट्टै माग गरेका छन् । राप्रपा संसदीय दलका नेता ज्ञानेन्द्र शाही र नेकपाका प्रमुख सचेतक युवराज दुलालले समिति सभापति हरि ढकाललाई पत्र लेखेर बैठक बोलाउन माग गरेका हुन् । उनीहरूले प्रधानमन्त्री, गृहमन्त्री, गृहसचिव र प्रहरी महानिरीक्षकलाई समितिमा बोलाएर घटना’bout जवाफ माग्नुपर्ने बताएका छन् ।

यसअघि सरकारका विभिन्न निर्णयमा फरक–फरक धारणा राख्दै आएका दलहरू पछिल्लो समय राज्यका निकायको स्वायत्तता र सरकारको कार्यशैलीका विषयमा नजिकिएका छन् ।

यता एमाले र नेकपा भने छठपछि सडक आन्दोलन चर्काउने तयारीमा छन् । एमाले सचिव महेश बस्नेतले दसैँ, तिहार र छठपछि मधेशदेखि देशभर आन्दोलन गर्ने घोषणा गरिसकेका छन् । एमाले अध्यक्ष केपी शर्मा ओलीले पनि संविधान, लोकतन्त्र र राष्ट्रियताको रक्षाका लागि संविधान निर्माणमा संलग्न राजनीतिक शक्तिहरू एकजुट हुनुपर्ने सन्देश दिँदै आएका छन् ।

नेकपाका संयोजक पुष्पकमल दाहाल ‘प्रचण्ड’ले पनि सरकार राष्ट्रियता, सामाजिक न्याय, आर्थिक समृद्धि र जनजीविकाका सवालमा अनुदार बनेको भन्दै प्रतिरोधको आवश्यकता औँल्याउँदै आएका छन् । नेकपाले सरकारका गतिविधिको भण्डाफोर र संगठन सुदृढीकरणका लागि राष्ट्रिय जागरण अभियानसमेत सञ्चालन गरिरहेको छ ।

यसैबीच, वामपन्थी दलहरूबीचको एकीकरण प्रक्रियाले पनि गति लिएको छ । प्रचण्ड र माधवकुमार नेपाल नेतृत्वको नेपाली कम्युनिस्ट पार्टी तथा नेपाल कम्युनिस्ट पार्टीबीच १७ कात्तिकमा एकता सहमतिमा हस्ताक्षर भएको छ । एकतापछि पार्टीको नाम नेपाली कम्युनिस्ट पार्टी र चुनाव चिह्न पाँचकुने तारा कायम गर्ने सहमति भएको छ । पार्टीको संगठनात्मक समायोजन गरी स्थानीय तह निर्वाचनपछि एकता राष्ट्रिय महाधिवेशन गर्ने तयारी छ ।

वाम एकीकरणको प्रक्रिया अघि बढिरहेका बेला कांग्रेस भने एमाले र नेकपासँग राजनीतिक सहकार्यका लागि संवादमा जुटेको छ । मधेश प्रदेश सरकारमा विश्वासको मत लिनुपर्ने बाध्यताबाट सुरु भएको कांग्रेस सभापति थापा र एमाले अध्यक्ष ओलीबीचको भेटवार्ता राष्ट्रिय राजनीतिक विषयसम्म विस्तार भएको छ ।

एमालेले समर्थन फिर्ता लिएपछि कांग्रेस नेता कृष्णप्रसाद यादव नेतृत्वको मधेश प्रदेश सरकार अल्पमतमा परेको छ । आगामी ३० कात्तिकभित्र विश्वासको मत लिनुपर्ने भएपछि थापाले प्रचण्ड, जनता समाजवादी पार्टी नेपालका अध्यक्ष उपेन्द्र यादव र एमाले अध्यक्ष ओलीसँग संवाद गरेका छन् ।

मंगलबार साँझ थापा एमाले अध्यक्ष ओलीलाई भेट्न भक्तपुरको गुण्डुस्थित निवास पुगेका थिए । करिब एक घण्टा भएको भेटमा मधेश प्रदेश सरकारको राजनीतिक समीकरणसँगै राष्ट्रिय राजनीतिका विषयमा पनि छलफल भएको नेताहरूले बताएका छन् । कांग्रेसका सहमहामन्त्री रामहरि खतिवडाले मधेश सरकारका विषयमा छलफल भएको स्वीकार गर्दै विपक्षी दल र पूर्वन्यायाधीशहरूसँग समेत संवाद भइरहेको बताएका छन् ।

ओलीनिकट एमाले सचिव महेश बस्नेतले उक्त भेटलाई राष्ट्रिय राजनीतिमा नयाँ मोडका रूपमा व्याख्या गरेका छन् । उनका अनुसार राष्ट्रिय हित, लोकतान्त्रिक व्यवस्था र संस्थागत स्थायित्वका विषयमा साझा दृष्टिकोण बनाउन संवाद अघि बढेको छ । एमाले स्रोतले ओली र थापाबीच केही दिनभित्रै पुनः भेटवार्ता हुने सम्भावना रहेको जनाएको छ ।

कांग्रेस भने एमाले र नेकपाले अघि सारेको सडक आन्दोलनमा तत्काल सहभागी हुने निर्णयमा पुगिसकेको छैन । थापाले सरकारलाई पाँच वर्षको जनादेश रहेको स्वीकार गर्दै राम्रा काममा सहयोग गर्ने तर लोकतान्त्रिक अधिकार र संस्थामाथि हस्तक्षेप भए प्रतिवाद गर्ने बताएका छन् । कांग्रेसको प्राथमिकता तत्काल सडक आन्दोलनभन्दा संसदीय र राजनीतिक खबरदारीमा देखिएको छ ।

सम्बन्धित समाचार

नक्कली भगवान् जन्मिएर हैरान पारेका छन्: ओली जाग्यो कांग्रेस, पछ्याउँदै देउवा पक्ष सिंहदरबारमा प्रतिपक्षी दलहरूको बैठक छठलगत्तै संसद् बैठक बोलाउन विपक्षी दलको माग मन्त्रिपरिषद् बैठक बस्दै ‘भोटेकोशी बाढीबाट क्षतिग्रस्त संरचनाको पुनर्निर्माणमा सहयोग गर्न भारत तयार छ’ बिहीबार मध्याह्नदेखि शुक्रबार रातिसम्म भीषण वर्षा र हिमपात हुने शरद् ऋतुमा ४४ हिमाल आरोहण गर्न ७६ देशका आरोहीलाई अनुमति