खोटाङ । दल परिवर्तन गरेका जिल्ला समन्वय समिति खोटाङका प्रमुख सनबहादुर राईसहित जिल्लाका आठ जना जनप्रतिनिधि पदमुक्त भएका छन् । जनता समाजवादी पार्टीको केन्द्रीय समितिले दल त्याग गरेको जानकारी दिएपछि निर्वाचन आयोगले मङ्सिर २ गते गरेको निर्णयबाट उनीहरू एकसाथ पदमुक्त भएका हुन् ।
आयोगले मङ्सिर ३ गते सूचना प्रकाशन गरेको छ । सूचनाअनुसार समन्वय प्रमुख सन बहादुर राई, केपिलासगढी गाउँपालिकाका उपाध्यक्ष गुरुराज राई, दिक्तेल रुपाकोट मझुवागढी नगरपालिका–१० पाथेकाका वडाअध्यक्ष मुगाधन राई, वडासदस्यहरू कल्पना राई, दलित महिला सदस्य गीता विश्वकर्मा, रामधन राई र सहरमणि राई तथा नगर कार्यपालिका सदस्य वीरेन्द्रकुमार दर्नालले पद गुमाएका छन् ।
समन्वय प्रमुख राई हाल नेपाली कम्युनिस्ट पार्टी (नेकपा)को केन्द्रीय सदस्य छन् भने उपाध्यक्ष गुरुराज र वडाअध्यक्ष मुगाधन श्रम संस्कृति पार्टीमा प्रवेश गरिसकेका छन् । दर्नाल अशोक राई नेतृत्वको जनता समाजवादी पार्टीमै आबद्ध छन् । सहरमणि र कल्पना तत्कालीन माओवादी केन्द्रबाट तथा रामधन एकीकृत समाजवादीबाट निर्वाचित भएका थिए ।
वडामा चुनावी तालमेल गर्दा जनता समाजवादी पार्टीको छाता चुनाव चिन्हबाट लडेका कारण उनीहरूले पद गुमाउनु परेको हो । पाथेका वडाका सबै जनप्रतिनिधिको पद गएपछि वडा जनप्रतिनिधिविहीन बनेको छ र सेवाग्राहीको काम अन्योलमा परेको छ । जनप्रतिनिधि नभएको र उपनिर्वाचनको सम्भावना नरहेको यस्तो विशिष्ट अवस्थामा कर्मचारीले नै वडाको कामकाज सञ्चालन गर्ने जिल्ला निर्वाचन आयोग खोटाङका प्रमुख रवीन मगरले जानकारी दिएका छन् ।
नगरप्रमुख तीर्थराज भट्टराईले संघीय मामिला तथा सामान्य प्रशासन मन्त्रालयको राय र कानुनी व्यवस्थाअनुसार वडा कार्यालयको सेवा प्रवाह निरन्तर गरिने बताए । जिल्लामा यसअघि बराहपोखरी गाउँपालिकाका उपाध्यक्ष भूबलराज राई, नगरपालिका–१४ बुइपाका वडाध्यक्ष दिनेश राई, केपिलासगढी–३ बास्पानीका वडाध्यक्ष तुलाराज राई र खोटेहाङ–३ सावाकटहरेका जेफर राई पदमुक्त भएका थिए ।
उनीहरू सबै श्रम संस्कृति पार्टीमा प्रवेश गरेका छन् । भूबलराज र तुलाराज एकीकृत समाजबाट, जेफर नेपाली काँग्रेसबाट र दिनेश एमालेबाट निर्वाचित भएका थिए । त्यसैगरी राष्ट्रिय स्वतन्त्र पार्टी (रास्वपा) प्रवेश गरेका खोटेहाङ–४ बड्कादियालेका वडासदस्य प्रदीप आचार्य (एमालेबाट निर्वाचित) पनि पदमुक्त भएका छन् ।
वडाध्यक्ष गुमाएका वडामा सम्बन्धित दलले जेष्ठ सदस्यलाई कार्यवाहक वडाध्यक्षको जिम्मेवारी दिएको छ । वि.सं. २०७९ को स्थानीय निर्वाचनमा विजयी भएकामध्ये पदमुक्त हुनेको संख्या अब १३ पुगेको छ । पार्टीको नीति, सिद्धान्त तथा निर्णयविपरीत दल त्याग गरेको दाबीसहित सम्बन्धित दलले सिफारिस गरेमा आयोगले पदमुक्त गर्न सक्ने कानुनी व्यवस्था छ ।
राजनीतिक दल सम्बन्धी ऐन, २०७३ को दफा ३२ को उपदफा (१) र नियमावली, २०७४ को नियम २२ बमोजिम दल त्याग गरेको देखिएकाले स्वतः पदमुक्त गरिएको आयोगले सूचनामा उल्लेख गरेको छ । खोटाङमा दुई नगरपालिका र आठ गाउँपालिकासहित दश स्थानीय तह र ७९ वटा वडा छन् ।
सम्बन्धित समाचार
आइजीपीमा पुनर्बहालीको माग गर्दै सर्वोच्च अदालत पुगे कार्की
दर्ता भएन दानबहादुर कार्कीको रिट
छठको तयारीमा जनकपुरधाम, प्रधानमन्त्री बालेन पनि आउने
घरमै सुतिरहेकी महिलामाथि हात्तीको आक्रमण, घटनास्थलमै मृत्यु
मधेशका मुख्यमन्त्री यादवद्वारा राजीनामाको घोषणा
यी हुन् चीन प्रस्थान गरेका रास्वपाका २० सांसद
इनम सापकोटामाथिको अनुसन्धान पारदर्शी नभएको एमालेको आरोप
दानबहादुर कार्कीको पक्षमा सर्वोच्चले दिएन अन्तरिम आदेश






